ന്യൂഡൽഹി: 2008 ലെ അണ്ടർ 19 ലോകകപ്പിലെ ടോപ് സ്കോറർ തന്മയ് ശ്രീവാസ്തവ 30ാം വയസ്സിൽ വിരമിക്കൽ പ്രഖ്യാപിച്ചു. വിരാട് കോഹ്ലിയുടെ നേതൃത്വത്തിൽ ഇന്ത്യ കിരീടം നേടിയ 2008 ലെ അണ്ടർ ലോകകപ്പിലെ ടോപ്സ്കോററായിരുന്ന തന്മയ് ശ്രീവാസ്തവ ഇന്ത്യയുടെ ഭാവി വാഗ്ദാനമായി അറിയപ്പെട്ടിരുന്നു.
കോഹ്ലിക്ക് പുറമേ രവീന്ദ്ര ജദേജ, മനീഷ് പാണ്ഡേ, സൗരഭ് തിവാരി അടക്കമുള്ളവർ തന്മയിെൻറ സഹതാരങ്ങളായിരുന്നു. ലോകക്രിക്കറ്റിലെ നിലവിലെ അതികായരായ കെയ്ൻ വില്യംസൺ, സ്റ്റീവൻ സ്മിത്ത്, മാർകസ് സ്റ്റോയ്നിസ്, ഇമാദ് വസിം, ഡാരൻ ബ്രാവോ, കോറി ആൻഡേഴ്സൺ, തിസാര പെരേര എന്നിവരെല്ലാം അണിനിരന്ന ടൂർണമെൻറിലെ ടോപ്സ്കോററായ തന്മയ് ഏറെ ശ്രദ്ധിക്കപ്പെട്ടിരുന്നു. മലേഷ്യയിൽ നടന്ന ലോകകപ്പിൽ 52.40 റൺസ് ശരാശരിയിൽ 262 റൺസാണ് ശ്രീവാസ്തവ അടിച്ചുകൂട്ടിയത്.
2008ൽ 18ാം വയസ്സിൽ കിങ്സ് ഇലവൻ പഞ്ചാബുമായി ശ്രീവാസ്തവ കരാറിലെത്തിയിരുന്നു. 90 ഫസ്റ്റ് ക്ലാസ് മത്സരങ്ങളിൽ നിന്നായി 4,918 റൺസ് നേടിയിട്ടുണ്ട്. ഐ.പി.എല്ലിെൻറ ആദ്യ രണ്ട് സീസണുകളിൽ കിങ്സ് ഇലവൻ പഞ്ചാബിനായി ഏതാനും മത്സരങ്ങളിൽ കളത്തിലിറങ്ങിയെങ്കിലും തിളങ്ങാനായിരുന്നില്ല. കൊച്ചി ടസ്കേഴ്സ് ക്യാമ്പിലുണ്ടായിരുന്നെങ്കിലും ടീമിൽ അവസരം ലഭിച്ചില്ല.
ജോലി ചെയ്യുന്ന ഒ.എൻ.ജി.സിക്ക് വേണ്ടി മാത്രമാകും താരം ഇനി കളിക്കുക. ഇന്ത്യയുടെ സീനിയർ ടീമിൽ ഒരു മത്സരം പോലും കളിക്കാതെയാണ് ശ്രീവാസ്തവ കളിക്കളം വിടുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.