മികച്ച ​ബൗളിങ് ശരാശരി ഇനി​ ഓസീസ് പേസർ ബോളണ്ടിന് സ്വന്തം; തകർത്തത് 110 വർഷത്തെ റെക്കോഡ്

മെൽബൺ: ആസ്ട്രേലിയൻ ഫാസ്റ്റ് ബൗളർ സ്കോട്ട് ബോളണ്ടിന് റെക്കോഡ്. ടെസ്റ്റ് ക്രിക്കറ്റിൽ കഴിഞ്ഞ 110 വർഷത്തിനിടെ ഏറ്റവും മികച്ച ബൗളിങ് ശരാശരി എന്ന റെക്കോഡാണ് ബോളണ്ട് സ്വന്തമാക്കിയത്.​

ബോളണ്ടിന്റെ ബൗളിങ് ​ശരാശരി 17.33ആണ്. ടെസ്റ്റിൽ കുറഞ്ഞത് 2000 പന്ത് എറിഞ്ഞിട്ടുള്ള ബൗളർമാരുടെ പ്രകടനത്തെ വിലയിരുത്തിയാണ് റെക്കോഡ്. സബീന പാർക്കിൽ നടക്കുന്ന വെസ്റ്റിൻഡീസിനെതിരെയുള്ള മൂന്നാം ടെസ്റ്റിലാണ് ബോളണ്ട് ഇൗ നേട്ടം ​സ്വന്തമാക്കിയത്. 34 റൺസ് വഴങ്ങി മൂന്നു വിക്കറ്റുകൾ വീഴ്ത്തിയതോടെയാണ് ബോളണ്ടിനെതേടി അംഗീകാരമെത്തിയത്.

​ക്രിക്കറ്റിന്റെ ആരംഭഘട്ടമായ 1800 കളിലെ ആറു​ ബൗളർമാരും 1900 കാലഘട്ടത്തിലെ ഇംഗ്ലണ്ട് ബൗളറായ സിഡ് ബാൺസ് മാത്രമാണ് ബോളണ്ടിന് മുന്നിലുള്ളത്. ആസ്​ട്രേലിയയുടെ ആദ്യ ഇന്നിങ്സ് 225റൺസിലൊതുങ്ങി.

എന്നാൽ ആസ്ട്രേലിയൻ പേസ് പട ആതിഥേയരെ വെറും 143 റൺസിന് ചുരുട്ടിക്കെട്ടി ആദ്യ ഇന്നിങ്സിൽ ലീഡ് നേടി. ​​​വെസ്റ്റിൻഡീസ് ടോപ്സ്കോറർ ജോൺ കാമ്പെല്ലിന്റെ (36) വിക്കറ്റ് വീഴ്ത്തിയതും ബോളണ്ടാണ്.

1915 മുതലുള്ള ടെസ്റ്റ്ക്രിക്കറ്റ് ബൗളർമാരുടെ മികച്ച ശരാശരി ഇവ്വിധമാണ്.

സ്കോട്ട് ബോളണ്ട് (2021 മുതൽ ഇന്നുവരെ) 17.33 ശരാശരി -59 വിക്കറ്റ്

ബെർട്ട അയേൺമോങ്കർ (1928-1933) 17.97 ശരാശരി -74 വിക്കറ്റ്

ഫ്രാങ്ക് ടൈസൻ (1954- 1959) 18.56 ശരാശരി -76 വിക്കറ്റ്

അക്ഷർ പട്ടേൽ (2021- ഇന്നുവരെ) 19.34 ശരാശരി -55 വിക്കറ്റ്

ജസ്പ്രീത് ബുംറ (2018- ഇന്നുവരെ) 19.48 ശരാശരി -217 വിക്കറ്റ്