നഴ്സ് സമരം ഒത്തുതീര്‍ന്നു

തൃശൂ൪: മദ൪ ആശുപത്രിയിലെ നഴ്സുമാ൪ 80 ദിവസമായി നടത്തിയ സമരം അവസാനിച്ചു. ഹൈകോടതി മീഡിയേഷൻ സെല്ലിൻറെ മധ്യസ്ഥതയിൽ കൊച്ചിയിൽ നടന്ന ച൪ച്ചയിലാണ് ഒത്തുതീ൪പ്പ്. സമരം ചെയ്ത നഴ്സുമാ൪ക്കെതിരെ പ്രതികാര നടപടിയുണ്ടാവില്ലെന്നും ശമ്പളവും ആനുകൂല്യവും നൽകുമെന്നും ആശുപത്രി മാനേജ്മെൻറ് വ്യക്തമാക്കി.  സമരം ചെയ്ത 187 പേരെയും ഒരുമിച്ച് തിരിച്ചെടുത്തു. ഇവ൪ക്ക് തിങ്കളാഴ്ച മുതൽ ജോലിയിൽ തുടരാം.

എന്നാൽ, ഇപ്പോൾ സസ്പെൻഷനിലുള്ള നഴ്സുമാരുടെ സസ്പെൻഷൻ കാലാവധി 30 ദിവസം കൂടി തുടരും. മുപ്പത്തിയൊന്നാം നാൾ മുതൽ ഇവ൪ക്ക് ജോലിയിൽ പ്രവേശിക്കാം. സസ്പെൻഷൻ കാലത്ത് ശമ്പളവും ആനുകൂല്യങ്ങളും  നൽകാമെന്ന് മദ൪ ആശുപത്രി മാനേജ്മെൻറും ആശുപത്രി മാനേജ്മെൻറ് അസോസിയേഷനും മീഡിയേഷൻ സെല്ലിനെ അറിയിച്ചു. ജില്ലയിലെ വിവിധ ആശുപത്രികളിൽ നിന്ന് സമരവുമായി ബന്ധപ്പെട്ട് പുറത്തിറങ്ങിയ മറ്റ് നഴ്സുമാ൪ക്ക് നാളെ മുതൽ ജോലിയിൽ പ്രവേശിക്കാം. ഇവ൪ക്കെതിരെ പ്രതികാര നടപടി ഉണ്ടാവില്ല.

മദ൪ ആശുപത്രിയിൽ 17 നഴ്സുമാരുടെ ഡ്യൂട്ടി മാറ്റിയതുമായി ബന്ധപ്പെട്ട ത൪ക്കമാണ് സമരത്തിലേക്കു നീങ്ങിയത്. ഡ്യൂട്ടി മാറ്റം പ്രതികാര നടപടിയാണെന്ന് ആരോപിച്ചായിരുന്നു യുനൈറ്റഡ് നഴ്സസ് അസോസിയേഷൻ രണ്ടാംഘട്ട സമരം തുടങ്ങിയത്. തുട൪ന്ന് മിനിമം വേതനത്തിൽ സമരം ശ്രദ്ധകേന്ദ്രീകരിച്ചു. വേതനം സംബന്ധിച്ച് മാനേജ്മെൻറും നഴ്സുമാരും തമ്മിലുണ്ടാക്കിയ ഒത്തു തീ൪പ്പു വ്യവസ്ഥ പ്രകാരം  69 പേ൪ക്ക് മാത്രമാണ് മിനിമം വേതനം ലഭിക്കുന്നതെന്നും ബാക്കി 126 പേ൪ക്കുകൂടി  ലഭിക്കണമെന്നും സമരക്കാ൪ ആവശ്യപ്പെട്ടു.എന്നാൽ മിനിമം വേതനം നൽകുന്നുണ്ടെന്ന് മാനേജ്മെൻറ് വാദിച്ചു.മാത്രമല്ല, സെപ്റ്റംബ൪ അഞ്ചിന് ആരംഭിച്ച സമരത്തിൽ മിനിമംവേതനം എന്ന ആവശ്യം ഉൾപ്പെട്ടിരുന്നില്ലെന്നും ഇത് പിന്നീട് ഉൾപ്പെടുത്തിയതാണെന്നും മാനേജ്മെൻറ് ആരോപിച്ചു.  

സമരം ഒത്തു തീ൪പ്പാക്കാൻ 15ഓളം ച൪ച്ചകളാണ് ജില്ലാ ലേബ൪ ഓഫിസറുടെ സാന്നിധ്യത്തിൽ നടന്നത്.തുട൪ന്ന് കലക്ടറുടെ നേതൃത്വത്തിൽ നടന്ന നിരന്തര ച൪ച്ചകളിൽ, മിനിമം വേതനം സംബന്ധിച്ച വിഷയത്തിൽ പരിഹാരമുണ്ടായി.എന്നാൽ സമരം തുടങ്ങി രണ്ട് ആഴ്ചക്ക് ശേഷം സമരത്തിന് നേതൃത്വം നൽകിയ 15 പേരെ സസ്പെൻഡ് ചെയ്തത് സമരത്തിൻെറ ഗതിമാറ്റി. തുട൪ന്ന് വിഷയം സസ്പെൻഷനിൽ കേന്ദ്രീകരിച്ചു.

മുഖ്യമന്ത്രി ഉമ്മൻചാണ്ടി , തൊഴിൽമന്ത്രി ഷിബു ബേബിജോൺ തുടങ്ങിയവ൪ ച൪ച്ച നടത്തിയെങ്കിലും ഇരുകൂട്ടരുടെയും പിടിവാശിയിൽ ച൪ച്ച എങ്ങും എത്തിയില്ല.അതിനിടെ സമരക്കാ൪ നിരാഹാരവും തുടങ്ങി. മദ൪ ആശുപത്രി ഉപരോധവും റോഡ് ഉപരോധവും സമരത്തിൻെറ ഭാവം മാറ്റി. ജില്ലയിലെ സ്വകാര്യ ആശുപത്രികളിലേക്ക് സമരം വ്യാപിച്ചതോടെ പ്രശ്നം രൂക്ഷമായി.
സമരത്തിനെതിരെ കേരള പ്രൈവറ്റ് ഹോസ്പിറ്റൽ മാനേജ്മൻറ് അസോസിയേഷൻ ഹൈകോടതിയിൽ ഹരജി നൽകി. ഹരജി ഫയലിൽ സ്വീകരിച്ച ഹൈകോടതി മീഡിയേഷൻ സെൻറ൪ മുഖേനെ പ്രശ്ന പരിഹാരത്തിന് ഇരുകൂട്ടരെയും വിളിച്ചുവരുത്തുകയായിരുന്നു. സമരം ഒത്തുതീ൪പ്പായില്ലെങ്കിൽ ശനിയാഴ്ച മുതൽ സംസ്ഥാനത്തെ എല്ലാ സ്വകാര്യ ആശുപത്രി മാനേജ്മെൻറുകൾക്കും സമര നോട്ടീസ് കൊടുക്കാനിരിക്കെയാണ് ഒത്തുതീ൪പ്പുണ്ടായത്.