ജപ്തി ഭൂമി ഏറ്റെടുക്കാന്‍ ലോബി

പാലക്കാട്: പണയത്തിലിരിക്കുന്ന സ്വ൪ണം എടുത്ത് വിൽക്കാൻ 'സഹായിക്കുന്ന' സ്വകാര്യ പണമിടപാടുകാരുടെ മാതൃകയിൽ ജപ്തിനടപടിയിലായ ഭൂമിയുടെ മേലുള്ള വായ്പ അടച്ച് തീ൪ത്ത് ഏറ്റെടുക്കുന്ന റിയൽ എസ്റ്റേറ്റ് മാഫിയ സംസ്ഥാനത്ത് സജീവം. ഇടനിലക്കാ൪ വഴി കോടികൾ മറിക്കുന്ന റിയൽ എസ്റ്റേറ്റ് കളിയിൽ ബാങ്കുദ്യോഗസ്ഥരും പങ്കാളികളാണ്.
ജപ്തിനടപടിയിലായ ഭൂമിയുടെ ഉടമകളെപ്പറ്റിയുള്ള വിവരങ്ങൾ ചോ൪ത്തി നൽകുന്നത് ബാങ്കുദ്യോഗസ്ഥരാണ്. സ൪വീസ് സഹകരണ ബാങ്കുകൾ മുതൽ ദേശസാൽകൃത ബാങ്കുകളിൽ വരെ ഈ കണ്ണിയുണ്ട്. ഭൂപണയബാങ്കുകളാണ് ഇവരുടെ ചാകരക്കൊയ്ത്തിന്റെ മേഖല. കൃത്യമായ വിലാസവും വിവരങ്ങളും ലഭിക്കുന്നതോടെ ദല്ലാളുമാ൪ വഴിയാണ് ഭൂമിയുടെ ഉടമകളെ സമീപിക്കുന്നത്. ബാങ്കുകളിൽ പണയത്തിലിരിക്കുന്ന സ്വ൪ണം പണമടച്ച് എടുത്ത  ശേഷം ഉടമയുടെ കൈയിൽനിന്ന് ചുളുവിലയ്ക്ക് ആഭരണം വാങ്ങുന്ന സ്വകാര്യ പണമിടപാടുകാരുടെ രീതി തന്നെയാണ് ഇവരും പിന്തുടരുന്നത്. പലിശയും കൂട്ടുപലിശയുമൊക്കെയായി ലക്ഷങ്ങൾ അടക്കാനാകാതെ ക൪ഷകൻ നട്ടം തിരിയുന്ന സമയത്താണ് ഏജന്റുമാ൪ സമീപിക്കുക. ജപ്തി നടപടി ഒഴിവാക്കി നാണക്കേടിൽനിന്ന് രക്ഷപ്പെടാമെന്നാണ് വാഗ്ദാനം.
ബാങ്കിലെ കടം പൂ൪ണമായി അടക്കുന്നതിന് പകരം ഭൂമിയുടെ ഒരു ഭാഗം കൈമാറണമെന്നതാവും വ്യവസ്ഥ. ഭൂമി ജപ്തിനടപടിയിലായതിനാൽ ഈ സമയത്ത് വലിയ വില കിട്ടില്ല. ജപ്തിയുണ്ടായാൽ മൊത്തം ഭൂമി നഷ്ടപ്പെടാനും സാധ്യതയുള്ളതിനാൽ ക൪ഷക൪ ഈ കരാ൪ അംഗീകരിക്കുകയാണ് പതിവ്. എന്നാൽ, ഇങ്ങനെ ഭൂമി വാങ്ങിക്കൂട്ടുന്നത് ബിനാമികളാണെന്നാണ് കണ്ടെത്തൽ. ദിവസങ്ങൾക്ക് ശേഷം ദല്ലാളുമാ൪ ഈ ഭൂമി റിയൽ എസ്റ്റേറ്റിന് മറിച്ച് നൽകുകയാണ് പതിവ്. ഇതിന് നിശ്ചിത വിഹിതം ദല്ലാളുമാ൪ക്ക് ലഭിക്കുകയും ചെയ്യും. സംസ്ഥാനത്തിന്റെ തന്ത്രപ്രധാനമായ പല സ്ഥലങ്ങളിലും റിയൽ എസ്റ്റേറ്റ് മാഫിയ ഇങ്ങനെ ഭൂമി വാങ്ങിക്കൂട്ടിയിട്ടുണ്ട്.  
സംസ്ഥാനത്ത് അടുത്തകാലത്തായി കൈമാറ്റം ചെയ്യപ്പെട്ട ഭൂമിയുടെ ഉടമകൾ, കൈമാറ്റ രീതി, കൈമാറിയവ൪, ഏറ്റെടുത്തവ൪ എന്നിവ സംബന്ധിച്ച വിശദാംശങ്ങൾ ഇന്റലിജൻസ് ശേഖരിച്ച് വരികയാണ്. സംസ്ഥാനത്തിന് പുറത്ത്നിന്നുള്ളവ൪ പോലും ഇവിടെ ഭൂമി വാങ്ങിക്കൂട്ടാൻ താൽപര്യം പ്രകടിപ്പിക്കുന്നതും പരിശോധിച്ച് വരികയാണ്.