ന്യൂഡൽഹി: സ്ത്രീയെ ഭീഷണിപ്പെടുത്തിയെന്ന പേരിൽ ആപ് എം.എൽ.എ അമാനത്തുല്ല ഖാനെ ഡൽഹി പൊലീസ് അറസ്റ്റു ചെയ്തു. കഴിഞ്ഞ ചൊവ്വാഴ്ചയാണ് യുവതി ഡൽഹിയിലെ ജാമിഅ പൊലീസ് സ്റ്റേഷനിൽ പരാതി നൽകിയത്. സ്ത്രീയുടെ പരാതി സ്വീകരിച്ചതായും എം.എൽ.എക്കെതിരെ ഇന്ത്യൻ ശിക്ഷാ നിയമത്തിലെ 506, 509 വകുപ്പുകൾ ചേർത്ത് കേസെടുത്തതായും പൊലീസ് അധികൃതർ പറഞ്ഞു.
വൈദ്യുതിയുമായി ബന്ധപ്പെട്ടുള്ള പ്രശ്നങ്ങൾ എം.എൽ.എയോട് പരാതിപ്പെടാൻ പോയ സമയത്താണ് ഇൗ അനുഭവമുണ്ടായതെന്ന് യുവതി പൊലീസിനോട് പറഞ്ഞു. എന്നാൽ കേസ് കെട്ടിച്ചമച്ചതാണെന്നും പൊലീസ് ചിലരുടെ സമ്മർദ്ദത്തിന് വഴങ്ങിയതാണെന്നും ആംആദ്മി പാർട്ടി ആരോപിച്ചു. ഡൽഹിയിലെ ഒാഖ്ല മണ്ഡലത്തിൽ നിന്നുള്ള ജനപ്രതിനിധിയാണ് അമാനത്തുല്ല ഖാൻ.
ഇൗ മാസം നാല് കേസുകളാണ് സ്ത്രീ പീഡനവുമായി ബന്ധപ്പെട്ട് ആംആദ്മി പാർട്ടിക്കെതിരെയുണ്ടായത്. കഴിഞ്ഞ ജൂൺ മാസത്തിൽ ആംആദ്മി എം.എൽ.എയായ ദിനേഷ് മൊഹാനിയക്കെതിരെ ൈലംഗിക പീഡനകുറ്റത്തിന് കേസെടുത്തിരുന്നു. അതിന് പിന്നാലെ പ്രകാശ് ജാർവാലിനെതിരെയും സമാന പരാതിയിൽ പൊലീസ് കേസെടുത്തു. ദിയോളിയിൽ നിന്നുള്ള ജനപ്രതിനിധിയാണ് പ്രകാശ് ജാർവാൾ. കഴിഞ്ഞയാഴ്ച മാൽവിയ നഗറിൽ നിന്നുള്ള സോമനാഥ് ഭാരതിക്കെതിരെ സ്ത്രീയെ ഭീഷണിപ്പെടുത്തിയതിന് കേസ് രജിസ്റ്റർ ചെയ്തിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.