തിരുവനന്തപുരം: കോസ്റ്റല് പൊലീസിന് പ്രത്യേക വെബ്സൈറ്റ്. പൊലീസ് ആസ്ഥാനത്ത് നടന്ന ചടങ്ങില് മുഖ്യമന്ത്രി പിണറായി വിജയന് ഉദ്ഘാടനം ചെയ്തു. മത്സ്യത്തൊഴിലാളികള്ക്കും തീരദേശവുമായി ബന്ധപ്പെട്ട മറ്റുള്ളവര്ക്കും തീരസുരക്ഷ സംബന്ധിച്ച വിവരങ്ങള് കൃത്യമായി ലഭ്യമാക്കുക എന്ന ലക്ഷ്യത്തോടെയാണ് coastal.keralapolice.gov.in എന്ന വിലാസത്തില് സൈറ്റ് ആരംഭിച്ചത്. എട്ട് തീരദേശ പൊലിസ് സ്റ്റേഷനുകള് സംബന്ധിച്ച വിശദാംശങ്ങള്, കടല്ക്ഷോഭം തുടങ്ങി കാലാവസ്ഥ സംബന്ധിയായ വിവരങ്ങള്, മത്സ്യത്തൊഴിലാളികള്ക്കുള്ള സന്ദേശങ്ങള്, അപകടമുന്നറിയിപ്പുകള്, പൊലീസ് ഉദ്യോഗസ്ഥരുടെ ഫോണ് നമ്പറുകള് തുടങ്ങി തീരസുരക്ഷയുമായി ബന്ധപ്പെട്ട വിവരങ്ങള് വെബ്സൈറ്റ് വഴി ലഭിക്കും. പൊലീസ് ആസ്ഥാനത്ത് മുഖ്യമന്ത്രി നടത്തിയ വിഡിയോ കോണ്ഫറന്സിനോടനുബന്ധിച്ചു നടന്ന ചടങ്ങില് കോസ്റ്റല് പൊലീസ് ഡി.ജി.പി മുഹമ്മദ് യാസിന് ആമുഖാവതരണം നടത്തി. ആഭ്യന്തരവകുപ്പ് അഡീഷനല് ചീഫ് സെക്രട്ടറി നളിനി നെറ്റോ, സംസ്ഥാന പൊലീസ് മേധാവി ലോക്നാഥ് ബെഹ്റ, ഇന്റലിജന്സ് ഡയറക്ടര് എ. ഹേമചന്ദ്രന്, ഇന്റലിജന്സ് എ.ഡി.ജി.പി ആര്. ശ്രീലേഖ, ബറ്റാലിയന് എ.ഡി.ജി.പി. നിതിന് അഗര്വാള്, ഐ.ജിമാരായ മനോജ് എബ്രഹാം, സുരേഷ് രാജ് പുരോഹിത്, ഐ.ജി.(പി.സി.ആര്) ടി.ജെ. ജോസ്, കോസ്റ്റല് പൊലീസ് എ.ഐ.ജി എസ്. സുരേന്ദ്രന് തുടങ്ങിയവര് പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.