പാറമടയിലെ വെള്ളക്കെട്ടിൽ വീണ കുട്ടികളെ നാട്ടുകാർ രക്ഷപ്പെടുത്തി

ചിറ്റൂർ: നല്ലേപ്പിള്ളി മേപ്പള്ളം ആനക്കൽ പാറയിലെ വെള്ളം നിറഞ്ഞ പാറമടയിൽ വീണ കുട്ടികളെ നാട്ടുകാർ രക്ഷപ്പെടുത്തി. ആനക്കൽ പാറ വേലായുധ‍​െൻറ മക്കളായ അമൽ (12), അഭിജിത്ത് (10) എന്നിവരാണ് അപകടത്തിൽപെട്ടത്. ശനിയാഴ്ച ഉച്ചക്ക് 12ഓടെയാണ് അപകടം. പാറമടയിൽ മീൻ പിടിക്കാൻ ചൂണ്ടയിടുകയായിരുന്നു രണ്ടുപേരും. അഭിജിത്ത് കാൽ വഴുതി പാറമടയിൽ വീഴുകയായിരുന്നു. രക്ഷപ്പെടുത്താനുള്ള ശ്രമത്തിനിടെ അമലും പാറമടയിൽ വീണു. കുട്ടികൾ മുങ്ങിത്താഴുന്നത് സമീപത്തെ മരണാനന്തര ക്രിയകൾ നടക്കുന്ന വീട്ടിലെത്തിയ ആളുകൾ കണ്ടത് മൂലമാണ് രക്ഷിക്കാനായത്. കുട്ടികളെ ചിറ്റൂർ താലൂക്ക് ആശുപത്രിയിലെ പ്രാഥമിക ചികിത്സക്ക് ശേഷം അമലിനെ ജില്ല ആശുപത്രിയിലും അഭിജിത്തിനെ പാലക്കാട്ടെ സ്വകാര്യ ആശുപത്രിയിലെ അത്യാഹിത വിഭാഗത്തിലും പ്രവേശിപ്പിച്ചു.