യു.എ.ഇ പുണ്യനാട്​, കേരളത്തിലെ ഖുര്‍ആന്‍ അച്ചടിക്കുന്നത്​‌ അറബി മലയാളത്തിൽ -ജെയ്ക്ക്

കോഴിക്കോട്​: കേരളത്തിൽ പ്രിൻറ്​ ചെയ്യുന്ന ഖുർആൻ അറബി മലയാളത്തിലാണെന്ന്​ എസ്​.​എഫ്​.ഐ നേതാവ്​ ജെയ്​ക്ക്​​​ സി. തോമസ്​. മന്ത്രി കെ.ടി. ജലീലിനെ എൻഫോഴ്​സ​്​മെൻറ്​ ഡയറക്​ടറേറ്റ്​ ചോദ്യം ചെയ്​തതിന്​ പിന്നാലെ സ്വകാര്യ ചാനലിൽ നടന്ന ചർച്ചയിലായിരുന്നു ജെയ്​ക്കി​െൻറ പ്രതികരണം. 'അറബി മലയാളത്തിലാണ്​ എന്നതാണ് കേരളത്തിൽ പ്രിൻറ്​ ചെയ്യുന്ന ഖുർആ​െൻറ സവിശേഷത. അതുകൊണ്ടു തന്നെ ഈ ഖുർആൻ പുറത്തേക്ക്​ അയക്കപ്പെടുന്ന അപൂർവം പ്രദേശങ്ങളിലൊന്ന്​ ആൻഡമാൻ നിക്കോബാറാണ്​. മറ്റു സ്​ഥലങ്ങളിലേക്ക്​ അയക്കപ്പെടുന്നത്​ അപൂർവമാണ്​.

എന്താണ്​ യു.എ.ഇയിൽനിന്ന്​ കൊണ്ടുവരുന്ന വിശുദ്ധ ഖുർആ​െൻറ പ്രത്യേകത. അത്​ അസ്സൽ അറബിക്കാണ്​. കേരളത്തിലെ ​​ക്രിസ്​ത്യാനികൾക്ക്​ കൊന്തമാല കോട്ടയത്തും കോഴിക്കോട്ടും ലഭിക്കും. ഇവിടെനിന്ന്​ വാങ്ങിയാൽ പോരെ. എന്തിനാണ്​ ജറുസലേമിൽനിന്ന്​ കൊണ്ടുവരുന്നത്​. എന്തിനാണ്​ അവരുടെ വിശുദ്ധ നാടുകളിൽനിന്ന്​ കൊണ്ടുവരുന്നത്​. നമ്മുടെ നാട്ടിൽനിന്ന്​ 10 രൂപക്ക്​ കിട്ടുന്നതുപോലെയാണ്​ അവ വിശുദ്ധ നാടുകളിൽനിന്ന്​ കൊണ്ടുവരുന്നത്​.

ലോകത്തെമ്പാടുമുള്ള ഇസ്​ലാം മത വിശ്വാസികളെ സംബന്ധിച്ചിട​ത്തോളം അറേബ്യൻ നാടുകൾ വിശുദ്ധനാടാണ്​. ഈ വിശുദ്ധ നാടുകളിൽനിന്ന്​ കൊണ്ടുവരുന്ന ഖുർആനെ അവർ അസാധാരണ വിശുദ്ധിയോടെ അവർ സ്വീകരിക്കും' -എന്നായിരുന്നു ജെയ്​ക്ക്​​​ പറഞ്ഞത്​. മുസ്​ലിം യൂത്ത്​ ലീഗ്​ ജനറൽ സെക്രട്ടറി പി.കെ. ഫിറോസിന്​ മറുപടി നൽകുകയായിരുന്നു ജെയ്​ക്ക്​​​.

എന്നാൽ, യു.എ.ഇ പുണ്യനഗരമല്ലെന്നും അറബി മലയാളത്തിൽ ഖുർആൻ അച്ചടിക്കുന്നില്ലെന്നും പി.കെ. ഫിറോസ്​ മറുപടി നൽകി. 'ജെയ്​ക്കിനെ കുറിച്ചോർത്ത്​ സങ്കടമുണ്ട്​. ആരാണിത്​ അദ്ദേഹത്തിനോട്​ പറഞ്ഞുകൊടുത്തതെന്ന്​ ആലോചിച്ചാണ്​​ അദ്​ഭുതം തോന്നുന്നത്​. ജെയ്​ക്കിനെ മോശമാക്കണമെന്ന്​ കരുതി ആരെങ്കിലും പറഞ്ഞുകൊടുത്തതായിരിക്കും. ​അല്ലെങ്കിൽ അവരുടെ അറിവില്ലായ്​മ കൊണ്ട്​ പറഞ്ഞ്​ കൊടുത്തതായിരിക്കും.

മന്ത്രി ജലീൽ എന്തായാലും ഇങ്ങനെ പറഞ്ഞുകൊടുക്കില്ലെന്ന്​ ഉറപ്പാണ്​. ക്രൈസ്​തവർക്ക്​ റോം പോലെയും യഹൂദർക്ക്​ ജറുസലേം പോലെയും ഏതെങ്കിലും നിലക്ക്​ വിശുദ്ധമായ നാടല്ല യു.എ.ഇ. അറബി മലയാളത്തിൽ ഖുർആൻ തന്നെ അച്ചടിക്കുന്നില്ല. മാത്രമല്ല അറബിയിലുള്ള ഖുർആൻ കേരളത്തിലെ ഏത്​ കടയിൽ പോയാൽ ലഭിക്കുകയും ചെയ്യും' -ഫിറോസ്​ പറഞ്ഞു.