നിർത്തിയിട്ട ട്രെയിനിന് മുകളിൽ കയറി മറുവശത്തെ പ്ലാറ്റ്​ഫോമിലേക്ക്​ കടക്കവേ ഷോക്കേറ്റ വിദ്യാർഥി മരിച്ചു

വൈക്കം: വൈക്കം റോഡ് റെയിൽവേ സ്റ്റേഷനിൽ നിർത്തിയിട്ടിരുന്ന ഇന്ധന വാഗൺ ട്രെയിനിന്​ മുകളിലൂടെ കയറി അടുത്ത പ്ലാറ്റ്​ഫോമിൽ ഇറങ്ങാൻ ശ്രമിക്കുന്നതിനിടയിൽ വൈദ്യുതാഘാതമേറ്റ്​ ഗുരുതര പൊള്ളലോടെ ചികിത്സയിലിരുന്ന വിദ്യാർഥി മരിച്ചു.

കടുത്തുരുത്തി ഗവ. പോളിടെക്നിക് കോളജ് രണ്ടാംവർഷ കമ്പ്യൂട്ടർ സയൻസ്​ വിദ്യാർഥിയും എറണാകുളം കുമ്പളം ‘ശ്രീനിലയ’ത്തിൽ രതീഷ്​-സന്ധ്യ ദമ്പതികളുടെ ഏക മകനുമായ എസ്.ആർ. അദ്വൈതാണ്​ (18) ചൊവ്വാഴ്ച മരിച്ചത്. തൊണ്ണൂറുശതമാനം​ പൊള്ളലേറ്റ അദ്വൈത്​ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലായിരുന്നു.

ഈമാസം ഒമ്പതിന്​ വൈകീട്ട്​ 4.45ന്​ വൈക്കം റോഡ്​ (ആപ്പാഞ്ചിറ) റെയിൽവേ സ്​റ്റേഷനിലായിരുന്നു അപകടം. കോളജിൽനിന്ന്​ ക്ലാസ്​ കഴിഞ്ഞ്​ എറണാകുളത്തെ വീട്ടിലേക്ക്​ പോകാൻ കൂട്ടുകാർക്കൊപ്പം സ്​റ്റേഷനിൽ എത്തിയതായിരുന്നു.

നിർത്തിയിട്ട പെട്രോൾ വാഗണിന്​ മുകളിൽ കയറി മറുവശത്തെ പ്ലാറ്റ്​ഫോമിലേക്ക്​ കടക്കാൻ ശ്രമിച്ചതാണ്​. 25,000 കിലോവോൾട്ട് കടന്നുപോകുന്ന വൈദ്യുതി ലൈനിൽനിന്ന്​​ ഷോക്കേറ്റ്​ വിദ്യാർഥി തീപിടിച്ച്​ താ​ഴേക്ക്​ തെറിച്ചുവീണു​. ചൊവ്വാഴ്ച രാവിലെയാണ്​ മരണം സംഭവിച്ചത്​. നടപടിക്രമങ്ങൾക്കുശേഷം സംസ്കാരം നടന്നു.