കൽപറ്റ: ക്രിസ്മസ് -പുതുവത്സരാഘോഷങ്ങളുടെ ഭാഗമായി വൈദ്യുതി ദീപാലങ്കാരങ്ങള് നടത്തുമ്പോള് അപകടങ്ങള് ഒഴിവാക്കുന്നതിന് സുരക്ഷ നിർദേശങ്ങള് നല്കി ഇലക്ട്രിക്കല് ഇൻസ്പെക്ടറേറ്റ്.
ആഘോഷ വേളയില് ജാഗ്രത പുലര്ത്തണമെന്ന് ഇലക്ട്രിക്കല് ഇൻസ്പെക്ടർ വി. സുമേഷ് അറിയിച്ചു. പുതുതായി വയറിങ് ആവശ്യമുള്ളവര് അംഗീകൃത ലൈസന്സ് ഉള്ളവരെക്കൊണ്ട് ചെയ്യിക്കണം. ഐ.എസ്.ഐ മുദ്രയുള്ള 30 എം.എ സെന്സിറ്റിവിറ്റിയുള്ള ആര്.സി.സി.ബി സര്ക്യൂട്ടില് ഉണ്ടെന്ന് ഉറപ്പാക്കണം. ആര്.സി.സി.ബിയുടെ മുകളിലുള്ള പുഷ്ബട്ടണ് അമര്ത്തി പ്രവര്ത്തനക്ഷമത ഉറപ്പുവരുത്തണം. ഗുണമേന്മ കുറഞ്ഞ പ്ലാസ്റ്റിക് ഇന്സുലേറ്റഡ് വയറുകള് ഉപയോഗിക്കരുത്.
പകരം മൂന്നു വയറുകളുള്ള ഡബിള് ഇന്സുലേറ്റഡ് കേബിളുകള് ഉപയോഗിക്കുക. മൂന്നാമത്തെ വയര് നിര്ബന്ധമായും എര്ത്തുമായി ബന്ധിപ്പിക്കണം. ഐ.എസ്.ഐ മുദ്രയുള്ള വയറുകള്, അനുബന്ധ ഉപകരണങ്ങള് എന്നിവ മാത്രം ഉപയോഗിക്കുക. പ്രത്യേകം സ്വിച്ചോട് കൂടിയ ത്രീപിന് പ്ലഗ് സോക്കറ്റ് വഴി മാത്രം വൈദ്യുതി എടുക്കുക.
ഒരു കാരണവശാലും വയര് നേരിട്ട് പ്ലഗ് സോക്കറ്റില് കുത്തരുത്. അലങ്കാരവുമായി ബന്ധപ്പെട്ട എല്ലാ ലോഹഭാഗങ്ങളും കൃത്യമായി എര്ത്ത് ചെയ്യുക. പരമാവധി ജോയന്റ് ഇല്ലാത്ത കണക്ഷന് നല്കാന് ശ്രമിക്കുക. അത്യാവശ്യമുണ്ടെങ്കില് ഐ.എസ്.ഐ മുദ്രയുള്ള ഇന്സുലേഷന് ടേപ്പ് ഉപയോഗിച്ച് ഇന്സുലേറ്റ് ചെയ്ത് കൈയെത്താത്ത വിധം ഉറപ്പിക്കുക. വീടിനോ കെട്ടിടത്തിനോ പുറത്തേക്ക് അലങ്കാരങ്ങള് ചെയ്യുമ്പോള് അതിനടുത്ത് വൈദ്യുതി ലൈന് ഇല്ലെന്ന് ഉറപ്പു വരുത്തണം.
സ്ഥാപനത്തിലെ എര്ത്തിങ് സംവിധാനം കാര്യക്ഷമമാണെന്ന് ഉറപ്പുവരുത്തണമെന്നും ഇലക്ട്രിക്കല് ഇൻസ്പെക്ടർ വ്യക്തമാക്കി. വിവരങ്ങള്ക്ക് ഇലക്ട്രിക്കല് ഓഫിസുമായി ബന്ധപ്പെടാം. ഫോണ്: 295004.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.