വെല്ലുവിളിയായി പേവിഷബാധ; സംസ്ഥാനത്ത്​ നാലുമാസത്തിനിടെ നാല്​ മരണങ്ങൾ

* വന്ധ്യംകരണവും വാക്സിനേഷനും പ്രഖ്യാപനത്തിൽ ഒതുങ്ങി തിരുവനന്തപുരം: ആരോഗ്യ- മൃഗസംരക്ഷണ വകുപ്പുകൾക്ക്​ വെല്ലുവിളിയായി സംസ്ഥാനത്ത്​ പേവിഷബാധ മരണങ്ങളിൽ വർധന. ഈ വർഷം നാലുമാസത്തിനിടെ നാല്​ പേവിഷബാധ മരണങ്ങളാണ്​ ഉണ്ടായത്​. റിപ്പോർട്ട്​ ചെയ്ത നാലുകേസുകളിലും ഉൾപ്പെട്ട നാലുപേരും മരി​െച്ചന്നതാണ്​ സംഭവത്തിന്‍റെ ഗൗരവം കൂട്ടുന്നത്​. ഏപ്രിലിൽ മാത്രം രണ്ട്​ മരണങ്ങളും സംഭവിച്ചു. 2030 ഓടെ പേവിഷബാധ മരണങ്ങൾ പൂജ്യത്തിലെത്തിക്കുക എന്ന ലക്ഷ്യവുമായി സർക്കാർ മുന്നോട്ടുപോകുമ്പോഴാണ്​ മരണങ്ങൾ ആശങ്ക ഉയർത്തുന്നത്​. കഴിഞ്ഞവർഷവും ഇതുതന്നെയായിരുന്നു അവസ്ഥ. പേവിഷബാധയേറ്റ 11 ആളുകളിൽ മുഴുവൻ പേരും മരിച്ചു. 2019 ൽ റിപ്പോർട്ട്​ ചെയ്തവരുടെ എണ്ണം കുറവായിരുന്നു. അഞ്ച്​ കേസുകളാണ്​ അന്ന്​ റിപ്പോർട്ട്​ ചെയ്തതെങ്കിലും അഞ്ചുപേരും മരിച്ചു. പേവിഷബാധ മരണങ്ങൾ ഗണ്യമായി ഉയർന്നത്​ ആരോഗ്യ- മൃഗസംരക്ഷണ വകുപ്പുകൾ ഗൗരവമായാണ്​ കാണുന്നത്​. മിക്കവാറും എല്ലാ മരണങ്ങളും തെരുവുനായ്ക്കളിൽ നിന്ന്​ കടിയേറ്റത്​ മൂലമെന്നാണ്​ ലഭിക്കുന്ന വിവരം. പൊതുജനാരോഗ്യ പ്രശ്‌നങ്ങളുടെ പട്ടികയിൽ പ്രധാനപ്പെട്ട വെല്ലുവിളികളിൽ ഒന്ന്​ തെരുവുനായ്ക്കളുടെ അനിയന്ത്രിതമായ പെരുപ്പമെന്നാണ്​ വിലയിരുത്തൽ. എന്നാൽ നിയ​ന്ത്രണമാർഗങ്ങൾ ഇപ്പോഴും കാര്യക്ഷമമല്ല. കേരളത്തിൽ കഴിഞ്ഞ ആറുവർഷത്തിനിടയിൽ തെരുവുനായ്ക്കളുടെ കടിയേറ്റ് ചികിത്സ തേടിയത് എട്ട് ലക്ഷത്തിലധികം പേരാണ്. ഈ കാലയളവിൽ തെരുവുനായ്ക്കളുടെ ആക്രമണം മൂലം 42 മരണങ്ങളാണുണ്ടായത്. കൂടാതെ തെരുവുനായ്ക്കളുടെ ആക്രമണം കാരണം ഉണ്ടായ വാഹനാപകടങ്ങൾ, പേവിഷ ബാധമൂലമുള്ള മരണങ്ങൾ എന്നിവ കൂടി ചേർക്കുമ്പോൾ മരണനിരക്ക് ഉയരും. നായ്ക്കളുടെ വന്ധ്യംകരണ ശസ്ത്രക്രിയയിലൂടെ മാത്രമേ ഫലപ്രദവും ശാസ്ത്രീയവുമായ നിയന്ത്രണം സാധ്യമാവൂ എന്നാണ്​ വിദഗ്​ധരും അഭിപ്രായപ്പെടുന്നത്​. 70 ശതമാനം നായ്​ക്കളെയെങ്കിലും വന്ധ്യംകരിച്ചാൽ അടുത്ത മൂന്നുവർഷം കൊണ്ട് നായ്​ക്കളുടെ ജനനനിരക്ക് നിയന്ത്രിക്കാൻ സാധിക്കും​. അനിമൽ വെൽ​െഫയർ ബോർഡ്‌ ഓഫ് ഇന്ത്യ നിഷ്കർഷിക്കുന്ന വന്ധ്യംകരണ-വംശനിയന്ത്രണ പ്രവർത്തനങ്ങളായ അനിമൽ ബർത്ത് കൺട്രോൾ (എ.ബി.സി) പ്രോഗ്രാം, ഏർലി ന്യൂട്ടറിങ്​ ഓഫ് ഡോഗ്സ് (എ.എൻ.ഡി) പ്രോഗ്രാം എന്നിവ ഫലപ്രദമാണ്​. ഒപ്പം നായ്ക്കളുടെ വാക്​സിനേഷനും കൃത്യമാക്കണമെന്നാണ്​ ആവശ്യം. പ​േക്ഷ, അതെല്ലാം ഇപ്പോൾ പ്രഖ്യാപനത്തിൽ ഒതുങ്ങുകയാണ്​. ബ്ലോക്ക്, താലൂക്ക് തലങ്ങൾ കേന്ദ്രീകരിച്ച്​ വെറ്ററിനറി ഹോസ്പിറ്റലുകൾ നവീകരിച്ച് ഡോക്ടർമാർ ഉൾപ്പെടെ ശസ്ത്രക്രിയാസംവിധാനങ്ങൾ സജ്ജീകരിച്ച്​ പ്രവർത്തനം കാര്യക്ഷമമാക്കിയില്ലെങ്കിൽ പേവിഷബാധ പുതിയ വെല്ലുവിളിയാകുമെന്നാണ്​ മുന്നറിയിപ്പ്​. എ. സക്കീർ ഹുസൈൻ