വി.എസ്. ആര്യൻ ചെണ്ടയിലും വി.എസ്. സൂര്യൻ തിറയിലും അനന്തകൃഷ്ണൻ പൂതൻ വേഷത്തിലും
ചെറുതുരുത്തി: ചെറുപ്രായത്തിൽ തന്നെ തനത് കലാരൂപങ്ങളെ നെഞ്ചിലേറ്റിയ മൂന്ന് കുഞ്ഞുസഹോദരങ്ങൾ കോഴിമാംപറമ്പ് പൂരത്തിന്റെ ശ്രദ്ധാകേന്ദ്രമായി . അഞ്ചും ഏഴും പത്തും വയസ് മാത്രം പ്രായമുള്ള ആര്യനും സൂര്യനും അനന്തകൃഷ്ണനുമാണ് ചെണ്ടമേളത്തിനൊപ്പം പൂതനും തിറയുമായി പൂരപ്രേമികളെ ആകർഷിച്ചത്. ഇവരുടെ പ്രകടനം സോഷ്യൽ മീഡിയയിൽ വൈറലായി. ചെറുതുരുത്തി കോഴിമാംപറമ്പ് പൂരത്തിന്റെ ഭാഗമായി പുതുശ്ശേരി ദേശത്തിന്റെ വരവിലാണ് ഈ കുട്ടിത്താരങ്ങൾ വിസ്മയം തീർത്തത്. പുതുശ്ശേരി മനപ്പടിയിൽ താമസിക്കുന്ന വടക്കേ പുരക്കൽ സൂരജ് - ബബിത ദമ്പതികളുടെ മക്കളായ അഞ്ച് വയസ്സുകാരൻ വി.എസ്. ആര്യൻ ചെണ്ടയുമായും, ഏഴ് വയസ്സുകാരൻ വി.എസ്. സൂര്യൻ തിറയായുമാണ് എത്തിയത്. ഇവർക്കൊപ്പം സൂരജിന്റെ സഹോദരൻ സജീവ് കുമാർ - രാധിക ദമ്പതികളുടെ മകനായ പത്തു വയസ്സുകാരൻ വി.എസ്. അനന്തകൃഷ്ണൻ പൂതൻ വേഷത്തിലും അണിനിരന്നു.
കുഞ്ഞിക്കൈകൾ കൊണ്ട് ആര്യൻ ചെണ്ടയിൽ താളമിട്ടപ്പോൾ, ജ്യേഷ്ഠന്മാർ താളത്തിനൊത്ത് ചുവടുവെച്ചത് കാണികൾക്ക് കൗതുകകരമായ കാഴ്ചയായി. പൂതനും തിറയും കെട്ടുന്ന പാരമ്പര്യമുള്ള കുടുംബത്തിൽ ജനിച്ച ഇവർക്ക് ചെറുപ്പം മുതലേ ഈ കലയോട് വലിയ താൽപര്യമായിരുന്നു. ആര്യൻ ചെറുതുരുത്തി ഗവ. എൽ.പി സ്കൂളിൽ എൽ.കെ.ജി വിദ്യാർഥിയാണ്. സൂര്യനും അനന്തകൃഷ്ണനും പുതുശ്ശേരി സ്കൂളിലെ രണ്ടും അഞ്ചും ക്ലാസുകളിൽ പഠിക്കുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.