ചൂട്​ മുതലെടുത്ത്​ ശീതളപാനീയ കടകൾ

തൃശൂർ: കനത്തചൂടിൽ വലയുന്നവരെ പിഴിഞ്ഞ്​ ശീതളപാനീയ കടകൾ. നഗരത്തിൽ കൂൺ കണക്കേ പൊന്തിമുളക്കുന്ന വേനൽകാല കടകളിൽ തോന്നിയ പോലെയാണ്​ വില ഈടാക്കുന്നത്​. കഴിഞ്ഞ ദിവസം ഒരുനാരങ്ങ സോഡക്ക്​ 25 രൂപ വരെ ഈടാക്കിയ സംഭവം നഗരത്തിലുണ്ടായി. ഗ്രാമപ്രദേശങ്ങളിൽ 10 മുതൽ 12 വരെ രൂപയുള്ള ഉപ്പിട്ട നാരങ്ങ സോഡക്കാണ്​ നഗരത്തിൽ തോന്നിയ വില ഈടാക്കുന്നത്​. 15 രൂപയാണ്​ സാധാരണ നഗരത്തിലെ നാരങ്ങസോഡ വില. ഇതര വസ്തുക്കൾക്കും സമാനമായി വില കൂട്ടിയാണ്​ വിൽക്കുന്നത്​. ചെറുനാരങ്ങ കിലോക്ക്​ 120 രൂപവരെ എത്തിയതാണ്​ വിലകൂട്ടാൻ കാരണമായി പറയുന്നത്​. അതിന്​ ഇത്രമേൽ വിലക്കൂട്ടണമോ എന്നാണ്​ ജനത്തിന്‍റെ ചോദ്യം. മാത്രമല്ല ശീതളപാനീയ കടകൾ അടക്കം ഭക്ഷ്യവസ്തുക്കൾ വിൽക്കുന്ന കടകൾക്ക്​ ഭക്ഷ്യസുരക്ഷ വകുപ്പിന്‍റെ രജിസ്​ട്രേഷൻ നിർബന്ധമാണ്. തദ്ദേശ സ്ഥാപനങ്ങൾ അറിയാതെ ഇത്തരം കടകൾ തുറക്കുന്നതും നിയമവിരുദ്ധമാണ്​. ഇക്കാര്യങ്ങളെല്ലാം കാറ്റിൽ പറത്തിയാണ്​ ഒഴിഞ്ഞുകിടക്കുന്ന പീടികമുറികളിലും പാതയോരങ്ങളിൽ ഷീറ്റ് കടകൾ ഒരുക്കിയും വെള്ളം തകൃതിയായി വിൽക്കുന്നത്​. ഇത്തരം കടകളിൽ ഉപയോഗിക്കുന്ന വെള്ളം, ഐസ്​, ഇതര വസ്തുക്കൾ എന്നിവ പരിശോധിക്കുന്നതിന്​ ഭക്ഷ്യ വകുപ്പ്​ ഇതുവരെ തയാറായിട്ടില്ല. ഇത്തരം കടകളിൽ രാവിലെ പത്തുമുതൽ തന്നെ കനത്ത കച്ചവടമാണ്​ നടക്കുന്നത്​. ഉച്ചയോടെ ചൂട്​ പാരമ്യത്തിൽ എത്തുമ്പോൾ കച്ചവടം പൊടിപൊടിക്കും. ജ്യൂസ്​, സർബത്ത്​, സോഡ സർബത്ത്​, നാരങ്ങ സോഡ, പാൽ സർബത്ത്​ അങ്ങനെ വൈവിധ്യമാർന്ന ശീതളപാനീയങ്ങളാണ്​ വിപണിയിലുള്ളത്​. ലൈസൻസ്​ ഇല്ലാത്ത സോഡ കമ്പനികൾ തയാറാക്കുന്ന സോഡയും മേഖലയിൽ ഉപയോഗിക്കുന്നുണ്ട്​. മത്സ്യത്തിന്​ ഉപയോഗിക്കുന്ന ഐസ്​ വരെ ഇത്തരത്തിൽ ഉപയോഗിക്കപ്പെടുന്നതായി ആരോപണമുണ്ട്​. കാര്യങ്ങൾ ഇങ്ങനെ പിടിവിടുമ്പോഴും കൃത്യമായ നടപടിയുമായി കോർപ്പറേഷൻ ആരോഗ്യ വിഭാഗമോ ഭക്ഷ്യസുരക്ഷ വകുപ്പോ രംഗത്തു വന്നിട്ടില്ല. അതേസമയം, സർബത്തിന്​ നറുനണ്ടി അടക്കം കിട്ടാനില്ലാത്ത സാഹചര്യത്തിൽ നേരത്തേ സർബത്ത്​ കച്ചവടം ചെയ്തവരിൽ ചിലർ ഇക്കുറി ഈ രംഗത്തില്ല. ാ പടം: jn wed 03 കനത്ത ചൂടിൽനിന്ന്​ രക്ഷ നേടാനായി നട്ടുച്ച സമയത്ത് മരത്തണലിൽ വിശ്രമിക്കുന്ന ലോറി തൊഴിലാളികൾ. വിയ്യൂരിൽ നിന്നുള്ള ദൃശ്യം .ഫോട്ടോ ജോൺസൺ വി. ചിറയത്ത്