'സ്വാതന്ത്ര്യാനന്തര ഇന്ത്യ നേരിടുന്ന വെല്ലുവിളികൾ': പ്രഭാഷണം നാളെ മുതൽ

തൃശൂർ: സ്വാതന്ത്ര്യാനന്തര ഇന്ത്യ നേരിടുന്ന ഉത്​കണ്​ഠകളും വെല്ലുവിളികളും മുൻനിർത്തി ബഹുജന സാംസ്കാരിക കൂട്ടായ്മ വ്യത്യസ്ത ദിവസങ്ങളിലായി സംഘടിപ്പിക്കുന്ന പ്രഭാഷണങ്ങളിൽ ആദ്യത്തേത്​ വെള്ളിയാഴ്ച നടക്കും. സാഹിത്യ അക്കാദമിയുമായി സഹകരിച്ച്​ സാഹിത്യ അക്കാദമി ഓഡിറ്റോറിയത്തിൽ വൈകീട്ട്​ അഞ്ചിനാണ്​ പ്രഭാഷണങ്ങളെന്ന്​ സംഘാടകർ വാർത്തസമ്മേളനത്തിൽ അറിയിച്ചു. വെള്ളിയാഴ്ച 'സ്വാതന്ത്ര്യത്തിന്‍റെ സാംസ്കാരിക പരിപ്രേക്ഷ്യങ്ങൾ' എന്ന വിഷയത്തിൽ സാഹിത്യ അക്കാദമി പ്രസിഡന്‍റ്​ കെ. സച്ചിദാനന്ദനും 22ന്​ 'ഇന്ത്യൻ ജനാധിപത്യത്തിന്‍റെ വർത്തമാനം' എന്ന വിഷയത്തിൽ ബി. രാജീവനും പ്രഭാഷണം നടത്തും. 29ന്​ രണ്ട്​ പ്രഭാഷണമുണ്ട്​. വൈകീട്ട്​ നാലിന്​ 'വെറുപ്പിന്‍റെ രാഷ്ട്രീയത്തെ എങ്ങനെ മാറ്റിമറിക്കാൻ കഴിയും' എന്ന വിഷയം ഡൽഹിയിലെ സ്വതന്ത്ര പത്രപ്രവർത്തകയും സിനിമ സംവിധായികയുമായ രേവതി ലോൾ, അഞ്ചിന്​ 'സ്വാത​​ന്ത്ര്യത്തിനുള്ള ദലിതരുടെ അവസാനിക്കാത്ത​ പോരാട്ടങ്ങൾ' എന്ന വിഷയം തമിഴ്​ കവിയും ആക്ടിവിസ്റ്റുമായ ആദവൻ ദീക്ഷണ്യ എന്നിവർ അവതരിപ്പിക്കും. 30ന്​ 'ഭൂരിപക്ഷ രാഷ്ട്രീയം, ജനാധിപത്യത്തിന്‍റെയും വിയോജിപ്പിന്‍റെയും മേഖലകളിൽ അതുളവാക്കുന്ന പ്രത്യാഘാതങ്ങൾ' വിഷയത്തിൽ കെ.ഇ.എൻ. കുഞ്ഞഹമ്മദിന്‍റെ പ്രഭാഷണമാണ്​. ഓരോ പ്രഭാഷണത്തിനു ശേഷവും സദസ്സുമായി സംവാദവുമുണ്ട്​. വാർത്തസമ്മേളനത്തിൽ കെ.എസ്​. ജോസ്​, പി.എസ്​. ഇക്​ബാൽ, അഡ്വ. ആശാ ഉണ്ണിത്താൻ, എം.എൻ. വിനയകുമാർ, പി.എൻ. ഗോപീകൃഷ്ണൻ എന്നിവർ പ​ങ്കെടുത്തു. -------------- ദേശീയപാത 66: കൂട്ടായ്മയുമായി കുടിയൊഴിപ്പിക്കപ്പെടുന്ന കച്ചവടക്കാർ തൃശൂർ: ദേശീയപാത 66നു വേണ്ടി സ്ഥലം ഏറ്റെടുക്കുന്നതിലൂടെ കുടിയൊഴിപ്പിക്കപ്പെടുന്ന കച്ചവടക്കാർ കൂട്ടായ്മ രൂപവത്​കരിച്ചു. പുനരധിവാസവും ന്യായമായ നഷ്ടപരിഹാരവും ആവശ്യപ്പെട്ട്​ അധികൃതരെ സമീപിക്കാനും ആവശ്യമെങ്കിൽ പ്രക്ഷോഭം നടത്താനും തീരുമാനിച്ചതായി കൂട്ടായ്മ പ്രസിഡന്‍റ്​ അബ്ദുന്നാസർ, വൈസ്​ പ്രസിഡന്‍റ്​ കെ.കെ. അലി, ഷജീർ എന്നിവർ വാർത്തസമ്മേളനത്തിൽ അറിയിച്ചു. സ്ഥലവും കെട്ടിടവും ഏറ്റെടുക്കുമ്പോൾ നൽകുന്ന നഷ്ടപരിഹാരം മാത്രമാണ്​ പുറമേക്ക്​ പ്രചരിക്കുന്നതെന്നും അതുവഴി ഒഴിപ്പിക്കപ്പെടുന്ന കച്ചവടക്കാരുടെ പ്രശ്നം ജനപ്രതിനിധികൾക്കും ഉദ്യോഗസ്ഥർക്കും അറിയില്ലെന്നും അവർ പറഞ്ഞു. ഭൂമിക്കും അതിലെ കെട്ടിടത്തിനും കവുങ്ങിനും മുരിങ്ങ മരത്തിനും വരെ വില കണക്കാക്കി നഷ്ടപരിഹാരം നൽകുമ്പോൾ കച്ചവടക്കാർക്ക്​ സ്ഥാപനത്തിന്‍റെ വലുപ്പച്ചെറുപ്പവും പഴക്കവും പരിഗണിക്കാതെ 75,000 രൂപ മാത്രം നൽകി ഒഴിപ്പിക്കുകയാണ്​. ഇതുവഴി ഒരു പുനരധിവാസവും സാധ്യമല്ല. മാത്രമല്ല, കച്ചവടക്കാരുടെ കുടുംബം വൻ പ്രതിസന്ധിയിൽ അകപ്പെടും. ഈ സാഹചര്യത്തിൽ ന്യായമായ നഷ്ടപരിഹാരവും പുനരധിവാസവും കിട്ടാതെ വ്യാപാര സ്ഥാപനം ഒഴിയേണ്ടതില്ലെന്ന്​ തീരുമാനിച്ചതായി ഭാരവാഹികൾ അറിയിച്ചു.​ എം.പി, എം.എൽ.എ, കലക്ടർ എന്നിവർക്ക്​ ഈ ആവശ്യം ഉന്നയിച്ച്​ നിവേദനം നൽകി​. മുഖ്യമ​ന്ത്രിക്കും പ്രതിപക്ഷ നേതാവിനും നിവേദനം നൽകുമെന്നും അവർ പറഞ്ഞു.