ആരവങ്ങളില്ലാതെ വിജയാഘോഷം

പത്തനംതിട്ട: ആരവങ്ങളും ബഹളങ്ങളും ഇല്ലാതെ വീടുകളിലിരുന്ന് വിജയം ആഘോഷിച്ചു. കോവിഡ് വ്യാപനം കണക്കിലെടുത്ത് ജില്ലയിലെങ്ങും കർശന നിയന്ത്രണങ്ങളാണ് ഏർപ്പെടുത്തിയിരുന്നത്. ഞായറാഴ്ച ആരും പുറത്തിറങ്ങിയില്ല. പ്രധാന കേന്ദ്രങ്ങളിൽ പൊലീസ് നിരീക്ഷണം ഉണ്ടായിരുന്നു. വോട്ടെണ്ണൽ കേന്ദ്രങ്ങളിൽ കർശന പരിശോധനകൾക്ക് ശേഷമാണ് ഉദ്യോഗസ്ഥരെയും കൗണ്ടിങ്​ ഏജൻറുമാരെയും കടത്തിവിട്ടത്. വോട്ടെണ്ണൽ കേന്ദ്രങ്ങൾക്കുപുറത്ത് ആരും കാത്തുനിന്നിരുന്നില്ല. എല്ലാവരും വീടുകളിൽ ടെലിവിഷന്​ മുന്നിലിരുന്ന് തെരഞ്ഞെടുപ്പുഫലം കാണുകയായിരുന്നു. ചില സ്ഥലങ്ങളിൽ പടക്കം പൊട്ടിച്ച് വിജയം ആഘോഷിച്ചു. നഗരങ്ങളിലും ഗ്രാമപ്രദേശങ്ങളിലും ഒരു വിജയാഘോഷവും ഉണ്ടായിരുന്നില്ല. എല്ലാ സ്ഥലങ്ങളും വിജനമായിരുന്നു. ലോക്ഡൗൺ പ്രതീതിയായിരുന്നു എല്ലായിടത്തും. പാർട്ടി ഓഫിസുകളിൽ പ്രവർത്തകർ എത്തിയിരുന്നു. ആഹ്ലാദ പ്രകടനങ്ങൾ അനുവദിക്കുന്നതല്ലെന്ന മുന്നറിയിപ്പ് ്അനൗൺസ്​െമൻറുകളും നഗരത്തിൽ ഉണ്ടായിരുന്നു.