കരിപ്പൂർ ​റെസ നീളം കൂട്ടൽ: ഭൂമി ഏറ്റെടുക്കുന്നതിന്​ ഗതാഗത വകുപ്പിന്‍റെ​ ഭരണാനുമതി

* സംസ്ഥാന സർക്കാർ മണ്ണിട്ട്​ നിരപ്പാക്കും, ചെലവ്​ അതോറിറ്റി വഹിക്കും കരിപ്പൂർ: കോഴിക്കോട്​ വിമാനത്താവളത്തിന്‍റെ റൺവേ എൻഡ്​ സേഫ്​റ്റി ഏരിയ (റെസ) നീളം കൂട്ടുന്നതിന്​ 14.5 ഏക്കർ ഭൂമി ഏറ്റെടുക്കുന്നതിന്​ ഗതാഗത വകുപ്പിന്‍റെ ഭരണാനുമതി. സംസ്ഥാന സർക്കാർ ഭൂമി ഏറ്റെടുത്ത്​ റൺവേക്ക്​ സമാനമായി നിരപ്പാക്കി നൽകും. ഇതിന്‍റെ ചെലവ്​ വിമാനത്താവള അതോറിറ്റി നൽകണം. പടിഞ്ഞാറ്​ വശത്ത്​ പളളിക്കൽ വില്ലേജിൽനിന്ന്​ ഏഴ്​ ഏക്കറും കിഴക്ക്​ വശത്ത്​ നെടിയിരുപ്പ്​ വില്ലേജിൽനിന്ന്​ ഏഴര ഏക്കറുമാണ്​ ഏറ്റെടുത്ത്​ നൽകേണ്ടത്​. പളളിക്കലിൽ ബ്ലോക്ക്​ നമ്പർ 11ൽ റീസർവേ നമ്പർ 170, 177, 178, നെടിയിരുപ്പിൽ ബ്ലോക്ക്​ നമ്പർ 36ൽ റീസർവേ നമ്പർ 63, 64, 65, 67, 68, 69, 70, 71 എന്നീ ഭൂമിയാണ്​ ഏറ്റെടുക്കേണ്ടത്​. വിഷയത്തിൽ ചീഫ്​ സെക്രട്ടറിയുടെ അധ്യക്ഷതയിൽ യോഗം ചേരുകയും നടപടികൾ വേഗത്തിലാക്കാൻ തീരുമാനിക്കുകയും ചെയ്തിരുന്നു. റവന്യു വകുപ്പിന്‍റെ അനുമതി കൂടി ലഭിച്ചാലാണ്​ തുടർനടപടികൾ ആരംഭിക്കുക. പിന്നീട്​ സർവേ അതിരടയാള നിയമപ്രകാരം ഭൂമി അളക്കുന്നതിനായി വിജ്​ഞാപനം ഇറക്കണം. ഭൂമി ഏറ്റെടുക്കൽ ചുമതലയുളള ഡെപ്യൂട്ടി കലക്ടറാണ്​ വിജ്ഞാപനം പുറപ്പെടുവിക്കുക. സർവേ നടത്തി ഭൂമി ഏറ്റെടുത്തു നൽകുന്നതിനായി 50 ലക്ഷം രൂപ റവന്യു വകുപ്പിന്​ സർക്കാർ അനുവദിച്ചിട്ടുണ്ട്​. 2013ലെ ഭൂമി ഏറ്റെടുക്കൽ നിയമപ്രകാരം ഇതിന്​ മുന്നോടിയായി പരിസ്ഥിതി ആഘാത പഠനം നടത്തണം. സ്വകാര്യ ഏജൻസി തയാറാക്കി നൽകുന്ന റിപ്പോർട്ടിന്‍റെ അടിസ്ഥാനത്തിലായിരിക്കും സർവേ നടത്തുന്നതിനും തുടർ നടപടികൾക്കും സർക്കാർ ഉത്തരവ്​ ഇറക്കുക. അടുത്ത മാർച്ചിനകം ഭൂമി കൈമാറണമെന്നാണ്​ അതോറിറ്റി ആവശ്യപ്പെട്ടിരിക്കുന്നത്​. വേഗത്തിൽ ഭൂമി ഏറ്റെടുത്ത്​ അതോറിറ്റിക്ക്​ കൈമാറുന്നതിനായി റവന്യൂ വകുപ്പും നടപടി ആരംഭിച്ചിട്ടുണ്ട്​. റെസ നീളം കൂട്ടുന്നതിനൊപ്പം റൺവേ റീകാർപ്പറ്റിങ്​, സെന്‍റർ ലൈൻ ലൈറ്റിങ്​ സംവിധാനം ഒരുക്കൽ തുടങ്ങിയ നടപടികളും പൂർത്തിയാക്കും. 2023 ഡിസംബറിനകം പ്രവൃത്തി പൂർത്തിയാക്കണമെന്നാണ്​ വ്യോമയാന മന്ത്രാലയം നിയോഗിച്ച സമിതി നിർദേശിച്ചിട്ടുള്ളത്​.