വിമാനാപകടത്തിൽപെട്ടവർ ഒരുമിക്കുന്നു; കൊണ്ടോട്ടിക്ക്​ സ്​നേഹസമ്മാനം കൈമാറാൻ

കൊണ്ടോട്ടി ചിറയിൽ പി.എച്ച്​.സിക്ക്​ 50 ലക്ഷം രൂപ ചെലവിൽ​ കെട്ടിടം നിർമിക്കും മലപ്പുറം: പരസ്പരം കൈകൊടുക്കാൻപോലും മടിച്ചിരുന്ന കോവിഡിന്‍റെ തുടക്കത്തിൽ കണ്ടെയ്​​ൻമെന്‍റ്​ സോൺ ഭീതിക്കിടയിലും എല്ലാം മറന്ന്​ ഓടിയെത്തിയവർ. ആ രക്ഷാപ്രവർത്തക​രുടെ ഒരിക്കലും മറക്കാനാത്ത ദൗത്യത്തിന്​ സ്​നേഹസമ്മാനവുമായി വിമാനയാത്രികർ​. 2020 ആഗസ്റ്റ്​ ഏഴിന്​ കോഴിക്കോട്​ വിമാനത്താവളത്തിലുണ്ടായ എയർ ഇന്ത്യ എക്സ്​പ്രസ്​ അപകടത്തിൽ പരിക്കേറ്റവരുടെയും മരിച്ചവരുടെയും കുടുംബാംഗങ്ങൾ ഉൾപ്പെടുന്ന കൂട്ടായ്മയാണ്​ കൊണ്ടോട്ടിക്കുള്ള സ്​നേഹസമ്മാനമെന്ന നിലയിൽ സർക്കാർ ആശുപത്രിക്ക്​ കെട്ടിടം നിർമിച്ചുനൽകുന്നത്​​. 50 ലക്ഷം രൂപ ചെലവിൽ കൊണ്ടോട്ടി ചിറയിൽ പ്രാഥമികാരോഗ്യകേന്ദ്രത്തിനാണ്​ പുതിയ കെട്ടിടം നിർമിച്ചുനൽകുകയെന്ന്​​ എം.ഡി.എഫ്​ വിമാനാപകട ചാരിറ്റി ഫൗണ്ടേഷൻ ചെയർമാൻ ഇടക്കുനി അബ്ദുറഹ്മാൻ 'മാധ്യമ'ത്തോട്​ പറഞ്ഞു. നഷ്ടപരിഹാരമായി ലഭിച്ച പണത്തിൽനിന്ന്​ എല്ലാവരും നൽകുന്ന തുക ഉപയോഗിച്ചാണ്​ കെട്ടിടം നിർമിക്കുക. രണ്ടാം വാർഷികദിനത്തിൽ അപകട സ്ഥലത്ത്​ ചേരുന്ന സംഗമത്തിൽ എം.ഡി.എഫ്​ ചാരിറ്റി ഫൗണ്ടേഷൻ ധാരണപത്രം ജില്ല മെഡിക്കൽ ഓഫിസർക്ക്​ കൈമാറും. ഞായറാഴ്ച രാവിലെ 10ന്​ അപകടം നടന്ന സ്ഥലത്താണ്​​ സംഗമം. മന്ത്രി വി. അബ്ദുറഹിമാൻ ഉദ്​ഘാടനം ചെയ്യും. കൊണ്ടോട്ടിയിലെയും പരിസരപ്രദേശത്തെയും നിരവധി പേരാണ്​ നിമിഷങ്ങൾക്കകം ഓടിയെത്തി രക്ഷാപ്രവർത്തനത്തിന്​ മുന്നിട്ടിറങ്ങിയത്​. പരിക്കേറ്റവരെ കൃത്യസമയത്ത്​ ആശുപത്രിയിലെത്തിക്കാനും മരണനിരക്ക്​ കുറക്കാനുമെല്ലാം സഹായകരമായത്​ രക്ഷാപ്രവർത്തനമായിരുന്നു. ഒരു വ്യക്തിക്ക്​ നൽകുന്നതിന്​ പകരം കൊണ്ടോട്ടിക്കാർക്ക്​ മൊത്തം ഉപകാരപ്പെടുന്ന രീതിയിലാണ്​ സർക്കാർ ആശുപത്രിക്ക്​ ​കെട്ടിടം നിർമിക്കാൻ തീരുമാനിച്ചത്​. ആശുപത്രിയോട്​ ചേർന്നുള്ള സ്ഥലത്താകും കെട്ടിടം. കോവിഡിന്‍റെ ​തുടക്കത്തിൽ വന്ദേഭാരത്​ ദൗത്യത്തിന്‍റെ ഭാഗമായി ദുബൈയിൽനിന്ന്​ എത്തിയ എയർ ഇന്ത്യ എക്സ്​പ്രസ്​ വിമാനം അപകടത്തിൽപെട്ട്​ ​പൈലറ്റ്​, കോപൈലറ്റ്​ എന്നിവരുൾപ്പെ​ടെ 21 പേർക്കാണ്​​ ജീവൻ നഷ്ടമായത്​.