എളമരം പാലം: അപ്രോച്ച് റോഡ് അടുത്ത ആഴ്ച ടാർ ചെയ്യും

മാവൂർ: മലപ്പുറം-കോഴിക്കോട് ജില്ലകളെ ബന്ധിപ്പിച്ച് എളമരം കടവിൽ നിർമിക്കുന്ന പാലത്തി‍ൻെറ അപ്രോച്ച്​ റോഡ് അടുത്ത ദിവസം ടാർ ചെയ്യും. മാവൂർ ഭാഗത്തെ അപ്രോച്ച് റോഡാണ് ടാർ ചെയ്യുന്നത്. നേരത്തേ പാകിയ വെറ്റ്മിക്സ് മെക്കാഡം മഴയത്ത് ഇളകിപ്പോയിരുന്നു. ഇത് ഉറപ്പിക്കുന്ന ജോലിയാണ് നടക്കുന്നത്. ഇതു പൂർത്തിയായാൽ തിങ്കളാഴ്ചയോ ചൊവ്വാഴ്ചയോ ടാറിങ് നടക്കും. പാലത്തി‍ൻെറ ശേഷിക്കുന്ന സ്പാനുകളുടെ കോൺക്രീറ്റ് ജനുവരി 10നകം പൂർത്തിയാകുമെന്നാണ് പ്രതീക്ഷ. ഏപ്രിൽ മാസത്തോടെ നിർമാണം പൂർത്തിയാക്കി പാലം തുറന്നുകൊടുക്കാനാകുമെന്നാണ് പ്രതീക്ഷ. കേന്ദ്ര റോഡ് ഫണ്ടിൽ ഉൾപ്പെടുത്തി അനുവദിച്ച 35 കോടി രൂപ ചെലവിട്ടാണ് എളമരം കടവിൽ പാലം പണിയുന്നത്. കോഴിക്കോട് കേന്ദ്രീകരിച്ചുള്ള പി.ടി.എസ് ഹൈടെക് പ്രോജക്ട്സ് ഇന്ത്യ പ്രൈവറ്റ് ലിമിറ്റഡും കെ.കെ ബിൽഡേഴ്സും ചേർന്നാണ് നിർമാണം നടത്തുന്നത്.