ഫാഷൻ ഗോൾഡ്​: വഞ്ചന ആസൂത്രിതമെന്ന്​ അന്വേഷണ സംഘം

കാസർകോട്​: എം.സി. ഖമറുദ്ദീൻ എം.എൽ.എ ചെയർമാനായ ഫാഷൻ ഗോൾഡ്​ പണം നിക്ഷേപ പദ്ധതി ആസൂത്രിത വഞ്ചനയാണെന്ന്​ ക്രൈംബ്രാഞ്ച്​. 2003ൽ സ്ഥാപിതമായ ഫാഷൻ ഗോൾഡ്​ ഇൻറർനാഷനൽ എന്ന കമ്പനിക്ക്​ പൊതുജനങ്ങളിൽനിന്ന്​ നിക്ഷേപമോ ഒാഹരിയോ സ്വീകരിക്കാൻ നിയമപരമായി സാധിക്കില്ല. ഇത്​ അറിഞ്ഞുകൊണ്ട്​ കമ്പനിയുടെ പേരിൽ പണം സമാഹരിക്കുകയായിരുന്നുവെന്നാണ്​ കണ്ടെത്തൽ. ഡയറക്​ടർമാർക്ക്​ മാത്രമേ നേരിട്ട്​ കമ്പനിയിൽ നിക്ഷേപിക്കാൻ കഴിയൂവെന്ന്​ 2013ൽ നിയമം വന്നിട്ടുണ്ട്​. 2006ൽ പ്രവർത്തനം തുടങ്ങിയ കമ്പനി 20 ഡയറക്​ടർ ബോർഡ്​ അംഗങ്ങളിൽനിന്ന്​ നിക്ഷേപം സ്വീകരിച്ചെങ്കിലും പൊതുജനങ്ങൾ എന്ന്​ പറയാവുന്ന 749 പേരിൽനിന്ന്​ 132 കോടി രൂപ സ്വീകരിച്ചത് ​കുറ്റകരമാണ്​. 2013 ഫെബ്രുവരി​ നാലിന്​ ​റിസർവ്​ ബാങ്ക്​ പുറപ്പെടുവിച്ച പുതിയ നിർദേശപ്രകാരം സ്വകാര്യ കമ്പനികൾക്ക്​്​ പൊതുജനങ്ങളിൽനിന്ന്​ നിക്ഷേപം സ്വീകരിക്കാൻ പാടില്ല. ഇത്​ അറിയാത്തവരല്ല ഫാഷൻ ഗോൾഡ്​ ഇൻറർനാഷനൽ നടത്തുന്നതെന്നാണ്​ അന്വേഷണ സംഘത്തി​ൻെറ വിലയിരുത്തൽ. നിയമം അറിഞ്ഞുകൊണ്ട്​ തന്നെ പണം സ്വീകരിച്ചത്​ തിരിച്ചു നൽകാതിരിക്കാനാണ്​ എന്നാണ്​ ക്രൈംബ്രാഞ്ചി​ൻെറ നിഗമനം. കാഞ്ഞങ്ങാട്​ ഡിവൈ.എസ്​.പിയുടെ നേതൃത്വത്തിൽ നടന്ന അന്വേഷണം പ്രശ്​നം സങ്കീർണമാണെന്ന്​ വ്യക്തമായതിനെ തുടർന്ന്​ കാസർകോട്, വയനാട്​ പൊലീസ് ​മേധാവികളെ ചേർത്ത്​ വിപുലപ്പെടുത്തിയിരുന്നു. ഇതുവരെയുള്ള അന്വേഷണത്തി​ൻെറ പുരോഗതി കഴിഞ്ഞ ദിവസം വിലയിരുത്തി. കൂടുതൽ പ്രതികളെ ചേർക്കുന്ന നടപടികളിലേക്കാണ്​ നീങ്ങുന്നത്​. ഇപ്പോൾ പ്രതികൾ മൂന്നുപേർ മാത്രമാണ്​. ചെയർമാൻ ഖമറുദ്ദീൻ എം.എൽ.എയും ജനറൽ മാനേജർ പൂക്കോയ തങ്ങളും ജീവനക്കാരനും. അന്വേഷണം കൂടുതൽ പരാതികളി​േലക്ക്​ നീങ്ങാതെ റിസർവ്​ ബാങ്കി​ൻെറയും കമ്പനി നിയമത്തി​ൻെറയും ലംഘനങ്ങളിൽ കേന്ദ്രീകരിച്ച് പ്രതികൾക്ക്​ കുരുക്കിടാനുള്ള ശ്രമമാണ്​ നടക്കുന്നത്​. അതിനിടെ, ഫാഷൻ ഗോൾഡ്​ കമ്പനിയുടെ ആസ്​തി നിർണയിക്കാൻ ചുമതലപ്പെട്ട മുസ്​ലിം ലീഗ് ​ജില്ല ട്രഷറർ മാഹിൻ ഹാജി സംസ്ഥാന നേതൃത്വത്തിന്​ റിപ്പോർട്ട്​ നൽകി. ആസ്​തി വിവരം ചോരുന്നത്​ കൂടുതൽ പരാതികൾക്ക്​ ഇടയാക്കുമെന്നതിനാൽ ഇതുസംബന്ധിച്ച തീരുമാനങ്ങളെടുക്കുന്നതിൽനിന്ന്​ മുസ്​ലിം ലീഗ് ​നേതൃത്വം താൽക്കാലികമായി വിട്ടുനിൽക്കുകയാണ്​. രവീന്ദ്രൻ രാവണേശ്വരം