കരളിനെ ചേർത്തുനിർത്തി, സുബീഷ്​ ആശുപത്രിവിട്ടു

ഗാന്ധിനഗർ(കോട്ടയം): കോട്ടയം മെഡിക്കൽ കോളജിന്​ അഭിമാനമായി ആദ്യ കരള്‍ മാറ്റിവെക്കല്‍ ശസ്ത്രക്രിയക്ക്​ വിധേയനായ തൃശൂര്‍ വേലൂർ വട്ടേക്കാട്ടിൽ സുബീഷ്​(40) ആശുപത്രിവിട്ടു. കരൾ പകുത്തുനൽകിയ ഭാര്യ പ്രവിജക്കൊപ്പം വ്യാഴാഴ്ച ഉച്ചക്ക്​ 2.45 ഓടെയായിരുന്നു മടക്കം. നേരത്തേ ആരോഗ്യ മന്ത്രി വീണ ജോര്‍ജ്​ ആശുപത്രിയിൽ നേരിട്ടെത്തി ഇവരുമായി സന്തോഷം പങ്കിട്ടിരുന്നു. വ്യാഴാഴ്ച രാവിലെ 7.30 ഓടെ ആശുപത്രിയിലെത്തിയ മന്ത്രി സുബീഷിന്​ ഡിസ്ചാർജ് സമ്മറിയും കൈമാറി. ശസ്ത്രക്രിയവിജയം വലിയൊരു നേട്ടമാണെന്നുപറഞ്ഞ മന്ത്രി വീണ ജോര്‍ജ്, മെഡിക്കൽ കോളജിലെ ആരോഗ്യ​പ്രവർത്തകരെ അഭിനന്ദിച്ചു. ശസ്ത്രക്രിയക്ക്​ പിന്നില്‍ പ്രവര്‍ത്തിച്ച, പിന്തുണച്ച എല്ലാവര്‍ക്കും നന്ദിയെന്നും ഇവർ പറഞ്ഞു. സ്വകാര്യ മേഖലയിൽ മാത്രം നടന്നിരുന്ന ലൈവ് ഡോണർ കരൾ മാറ്റിവെക്കൽ ശസ്ത്രക്രിയയാണ് ഇതാദ്യമായി സർക്കാർ മേഖലയിലും വിജയമായത്​. ഇത്​ സർക്കാർ ആരോഗ്യമേഖലക്കും കോട്ടയം മെഡിക്കൽ കോളജിനും അഭിമാനനിമിഷവുമായി. ഡോക്ടർമാർ അടക്കമുള്ളവരോട്​ ഏറെ കടപ്പാടുണ്ടെന്നും സഹോദരൻമാരെന്നപോലെയായിരുന്നു എല്ലാവരും ​പെരുമാറിയതെന്നും സുബീഷും പ്രവിജയും പറഞ്ഞു. പിന്നീട്​ നടപടിക്രമങ്ങൾ പൂർത്തിയാക്കി ഉച്ചയോടെയാണ്​ ആശുപത്രിക്ക്​ സമീപത്തെ വാടകവീട്ടി​ലേക്ക്​ മാറിയത്​. 30 ദിവസംകൂടി നിരീക്ഷണത്തിൽ തുടരേണ്ടതിനാലാണ്​ ഇവർ ആശുപത്രിക്ക്​ സമീപത്തുതന്നെ താമസിക്കുന്നത്​. മെഡിക്കല്‍ കോളജ് പ്രിന്‍സിപ്പല്‍ ഡോ.കെ.പി. ജയകുമാർ, സൂപ്രണ്ട് ഡോ. ടി.കെ. ജയകുമാർ, ആർ.എം.ഒ ഡോ. ആർ. പി. രഞ്ചിൻ, ശസ്​ത്രക്രിയക്ക്​ നേതൃത്വം നൽകിയ സര്‍ജിക്കല്‍ ഗ്യാസ്‌ട്രോഎന്‍ട്രോളജി വിഭാഗം മേധാവി ഡോ. ആർ.എസ്. സിന്ധു, ഡെപ്യൂട്ടി സൂപ്രണ്ടുമാരായ ഡോ.ആർ.രതീഷ് കുമാർ, ഡോ.രാജേഷ് എന്നിവരും യാത്രയാക്കാൻ എത്തിയിരുന്നു. ഫെബ്രുവരി 14നായിരുന്നു​ 12 മണിക്കൂർ നീണ്ട കരള്‍ മാറ്റിവെക്കല്‍ ശസ്ത്രക്രിയ. കരൾ നൽകിയ പ്രവിജയെ ഫെബ്രുവരി 23ന്​ ​ ഡിസ്​ചാർജ്​ ചെയ്​തിരുന്നു. സര്‍ക്കാര്‍ മേഖലയില്‍ രണ്ടാമ​ത്തെ ശസ്ത്രക്രിയയായിരുന്നു ഇത്​. ആദ്യത്തേത്​ പൂർണവിജയമായിരുന്നില്ല. --പടം DP--