മകളുടെ കൺമുന്നിൽ സ്കൂൾ ബസിനടിയിൽപെട്ട്​ ക്ലീനർ മരിച്ചു

​തൊടുപുഴ: കയറാൻ ശ്രമിക്കുന്നതിനിടെ ക്ലീനർ സ്കൂൾ ബസിനടിയിൽപെട്ട്​ മകളുടെ കൺമുന്നിൽ മരിച്ചു. മലയിഞ്ചി ആൾക്കല്ല്​ പടിഞ്ഞാറയിൽ ജിജോ ജോർജാണ്​​ (40) മരിച്ചത്​. വെള്ളിയാഴ്​ച രാവിലെ ഒമ്പതോടെ ഉടുമ്പന്നൂർ മങ്കുഴി സെന്‍റ്​ ജോർജ് ഹൈസ്കൂൾ ബസാണ് അപകടത്തിൽപെട്ടത്. ഏഴാനിക്കൂട്ടം സ്കൂളിന്​ സമീപം രണ്ട്​ കുട്ടികളെ ഇറക്കിയശേഷം ബസ്​ മുന്നോട്ട്​ എടുക്കുന്നതിനിടെയായിരുന്നു അപകടം. ജിജോ കയറാൻ ശ്രമിക്കുന്നതിനിടെ ഡോറിൽനിന്ന്​ റോഡിലേക്ക്​ വീഴുകയും പിന്നിലെ ടയറിൽ തല കുരുങ്ങുകയുമായിരുന്നു. അപകടസമയം ജിജോയുടെ ഇളയ മകൾ ആറാം ക്ലാസ്​ വിദ്യാർഥിനി എലിസബത്തും ബസിൽ ഉണ്ടായിരുന്നു. മകളും കൂടെയുള്ളവരും ചേർന്ന് മറ്റ്​ വാഹനങ്ങൾക്ക്​ ​ കൈകാണിക്കുകയും ഇതുവഴി വന്ന ചീനിക്കുഴി പള്ളിവികാരിയുടെ കാറിൽ ഉടൻ ജിജോയെ മുതലക്കോടത്തെ ആശുപത്രിയിൽ എത്തിക്കുകയും ചെയ്തെങ്കിലും രക്ഷിക്കാനായില്ല. ജി​ജോയുടെ ഭാര്യ റാണിയാണ്​ സാധാരണ സഹായിയായി ബസിൽ പോകുന്നത്​. വെള്ളിയാഴ്ച ഇവർക്ക്​ പോകാനാവാത്ത സാഹചര്യത്തിലാണ്​ സ്​കൂൾ പി.ടി.എ അംഗം കൂടിയായ ജി​ജോ പോയത്​​. പോസ്റ്റ്​മോർട്ടത്തിനുശേഷം മൃതദേഹം ശനിയാഴ്ച രാവിലെ എട്ടിന്​ വീട്ടിലെത്തിക്കും. 11ന്​ മലയിഞ്ചി സെന്‍റ്​​ തോമസ്​ പള്ളിയിൽ സംസ്കാരം നടത്തും. മറ്റൊരു മകൾ: എയ്​ഞ്ചൽ മരിയ. കരിമണ്ണൂർ പൊലീസ്​ ബസ് ഡ്രൈവർക്കെതിരെ കേസ് എടുത്തിട്ടുണ്ട്. ​TDG DEATH JIJO GEORGE ജിജോ ജോർജ്​