'ഹൈദരലി തങ്ങൾ രാഷ്ട്രീയത്തിലെ സൗമ്യ സാന്നിധ്യം'

തൊടുപുഴ: പാണക്കാട് ഹൈദരലി ശിഹാബ് തങ്ങളുടെ വിയോഗത്തിൽ ജലവിഭവ മന്ത്രി റോഷി അഗസ്റ്റിൻ അനുശോചിച്ചു. കേരള രാഷ്ട്രീയത്തിലെ സൗമ്യ സാന്നിധ്യമായിരുന്ന അദ്ദേഹത്തിന്‍റെ വേർപാട് മതേതര സമൂഹത്തിന് നികത്താനാകാത്ത നഷ്ടമാണെന്ന്​ മന്ത്രി അനുശോചന സന്ദേശത്തിൽ പറഞ്ഞു. കേരളത്തിലെ മതേതര സാമൂഹിക രാഷ്ട്രീയ ജീവിതത്തെ ആഴത്തിൽ സ്വാധീനിച്ച അപൂർവ വ്യക്തിത്വത്തിന് ഉടമയായിരുന്നു തങ്ങളെന്ന്​ അഡ്വ. ഡീൻ കുര്യാക്കോസ്​ എം.പി അനുശോചന സ​ന്ദേശത്തിൽ പറഞ്ഞു. സത്യസന്ധമായ പൊതുജീവിതത്തിന് ഉടമയായ ഹൈദരലി തങ്ങളുടെ ജീവിതം ജനനന്മ ലക്ഷ്യമിട്ട് സമൂഹത്തിനായി നീക്കിവെച്ചതായിരുന്നു എന്ന്​ കേരള കോൺഗ്രസ്​ ചെയർമാനും എം.എൽ.എയുമായ പി.ജെ. ജോസഫ്​ അനുസ്മരിച്ചു. മതേതര ജനാധിപത്യ ചേരിയെ മുന്നില്‍നിന്ന് നയിക്കുകയും സമുദായങ്ങള്‍ തമ്മിലുള്ള ഐക്യം ഊട്ടിയുറപ്പിക്കുകയും ചെയ്ത തങ്ങള്‍ മാനവികതയുടെ സന്ദേശവാഹകനായിരുന്നു എന്ന്​ മുസ്​ലിം ലീഗ് ജില്ല കമ്മിറ്റി അഭിപ്രായപ്പെട്ടു. മലയോര ജില്ലയോട് അ​ദ്ദേഹം പ്രത്യേക താൽപര്യം പുലര്‍ത്തിയിരുന്നു എന്നും സംസ്ഥാന സെക്രട്ടറി ടി.എം. സലിം, സെക്രട്ടേറിയറ്റ് അംഗം കെ.എം.എ. ഷുക്കൂര്‍, ജില്ല ഭാരവാഹികളായ എം.എസ്. മുഹമ്മദ്, പി.എം. അബ്ബാസ്, കെ.എസ്. സിയാദ് എന്നിവര്‍ പറഞ്ഞു. മതേതരത്വത്തിനുവേണ്ടി ശക്തമായി നിലകൊണ്ട വ്യക്തിത്വമാണ് തങ്ങളെന്ന്​ ഡി.സി.സി അധ്യക്ഷൻ സി.പി. മാത്യു പറഞ്ഞു. രാഷ്ട്രീയ കേരളത്തിൽ സാമുദായിക സൗഹൃദം ഊട്ടിയുറപ്പിക്കാൻ നേതൃത്വം നൽകിയ തങ്ങൾ, കക്ഷിരാഷ്ട്രീയ ഭേദമന്യേ ഏവർക്കും സർവസമ്മതനായ നേതാവായിരു​ന്നെന്ന് യൂത്ത് ലീഗ് ജില്ല ഭാരവാഹികളായ പി.എച്ച് സുധീർ, നിസാർ പഴേരി, കെ.എസ് കലാം എന്നിവർ പറഞ്ഞു. വിവിധ മതവിഭാഗങ്ങള്‍ക്കിടയില്‍ സ്‌നേഹവും സൗഹൃദവും സൃഷ്ടിക്കാൻ സാമൂഹിക ഇടപെടൽ നടത്തിയ വ്യക്തിത്വമായിരുന്നു ഹൈദരലി തങ്ങളെന്ന്​ ഐ.എൻ.എൽ ജില്ല പ്രസിഡന്‍റ്​ എം.എം. സുലൈമാൻ പറഞ്ഞു.