ഷോപ്പിങ്ങ്​ വിൻഡോ

വികസനക്കുതിപ്പിൽ മങ്ങാട്ടു​കവല അനുദിനം വളർന്നുകൊണ്ടിരിക്കുന്ന തൊടുപുഴയുടെ ഉപനഗരമാകുകയാണ്​ മങ്ങാട്ടുകവല. കിഴക്കൻ മേഖലയുടെ പ്രവേശന കവാടമെന്ന്​ മങ്ങാട്ടുകവലയെ വിശേഷിപ്പിക്കാം. ഷോപ്പിങ്​ മാളുകൾ, സൂപ്പർമാർക്കറ്റുകൾ, ആശുപത്രികൾ, ബാങ്ക്​, വസ്ത്രവ്യാപാരശാലകൾ തുടങ്ങി എല്ലാവിധ സൗകര്യങ്ങളും ഇവിടെ അണിനിരന്ന്​ കഴിഞ്ഞു. മങ്ങാട്ട്​ എന്ന വീട്ടുപേരിൽ ചെറിയൊരു കവലയായിരുന്നു പണ്ട്​ ഈ കവല. വീതി കുറഞ്ഞ റോഡും ഇടവഴികളും ഏതാനും​ കടകളും മാത്രമാണ്​ അന്ന്​ ഉണ്ടായിരു​ന്നത്​. എന്നാൽ, ഇന്ന്​ സ്​ഥിതി മാറി. അതിവേഗമാണ്​ വളർച്ച. ഒട്ടേറെ പുതിയ സംരംഭകരാണ്​ പ്രതീക്ഷയോടെ ഇവിടേക്ക്​ എത്തുന്നത്​. മങ്ങാട്ടുകവലയെ വാണിജ്യ കേന്ദ്രമാക്കിമാറ്റാനുള്ള ഇവരുടെ ശ്രമം കൂടിയാണ്​ ഈ പ്രദേശത്തിന്‍റെ വികസനത്തിന്​ ആക്കം കൂട്ടിയത്​. കിഴക്കൻ മേഖലയിൽ നിന്നുള്ള ബസുകളടക്കം മങ്ങാട്ടുകവലയിലെത്തിയാണ്​ തൊടുപുഴയി​ലേക്ക്​ പ്രവേശിക്കുന്നത്​. അത്​ തന്നെയാണ്​ ഈ ജങ്​ഷന്‍റെ പ്രസക്​തി​. മങ്ങാട്ടുകവല ബസ്​ സ്റ്റാൻഡും വെങ്ങല്ലൂർ നാലുവരി പാതയും​ യാഥാർഥ്യമായതോടെ വികസനം വേഗത്തിലായി​. ബൈപാസ്​ എത്തിയതോടെ ചെറുതും വലുതുമായ വ്യാപാര കേന്ദ്രങ്ങൾ ഇരുവശത്തുമായി സ്ഥാനം പിടിച്ചു. തൊടുപുഴയിൽ ഒട്ടേ​റെ ബൈപാസുകൾ ഉണ്ടെങ്കിലും ചുരുങ്ങിയ നാൾ കൊണ്ട്​ ഏറെ തിര​ക്കേറിയ ബൈപാസായും മങ്ങാട്ടുകവല​ മാറി. അടുത്തിടെയാണ്​ നഗരസഭയുടെ സ്വപ്നപദ്ധതികളിലൊന്നായ മങ്ങാട്ട്​ കവല ബസ്​ സ്റ്റാൻഡ്​ ഷോപ്പിങ് കോംപ്ലക്സിന്‍റെ നിർമാണം പൂർത്തിയായത്​. മൂന്ന്​ നിലകളിലായി 130 ൽ പരം മുറികളും ആധുനിക ബസ്​ കാത്തിരിപ്പ്​ കേന്ദ്രവുമാണ്​ കോംപ്ലക്സിലുള്ളത്​. സ്​റ്റാൻഡ്​ കേന്ദ്രീകരിച്ച്​ ബസ്​ ഓപറേറ്റിങ്​ സെന്‍റർ ആരംഭിക്കാൻ നഗരസഭ നേരത്തേ പ്ലാൻ ചെയ്തിരുന്നെങ്കിലും നടപ്പായില്ല. നിലവിൽ ജില്ല ആശുപത്രി, ആയുർവേദ ജില്ല ആശുപത്രി, ജില്ല വെറ്ററിനറി ആശുപത്രി, ആരാധനാലയങ്ങൾ, ബാങ്കുകൾ, കോളജുകൾ തുടങ്ങി ഒട്ടേറെ സ്ഥാപനങ്ങൾ ഈ ജങ്​ഷന്​​ സമീപം​​ സ്ഥിതി ചെയ്യുന്നു​. ഈ സ്ഥാപനങ്ങളിലേക്കായി ഒട്ടേറെ ആളുകളാണ്​ ഓരോ ദിവസവും വിവിധ ആവശ്യങ്ങൾക്കായി എത്തുന്നത്​. നിർമാണം പൂർത്തിയായ ബസ്​ സ്റ്റാൻഡ്​ ഷോപ്പിങ്​ കോംപ്ലക്സിന്‍റെ ​ പ്രവർത്തനം കൂടി തുടങ്ങുന്നതോടെ മങ്ങാട്ടുകവലയുടെ വികസനത്തിൽ വലിയൊരു കുതിച്ചു ചാട്ടമുണ്ടാകും. TDL MANGATTUKAVALA മങ്ങാട്ടുകവല