ഇടമലക്കുടിയെ ആക്ഷേപിച്ചെന്ന്​; എം.എം. മണി മാപ്പുപറയണമെന്ന്​

മൂന്നാർ: സി.പി.എം ഏരിയ സമ്മേളനത്തിൽ ഇടമലക്കുടിയെക്കുറിച്ച് എം.എം. മണി എം.എൽ.എ നടത്തിയ പരാമർശം ആദിവാസി ജനതയെ അപമാനിക്കുന്നതാണെന്ന്​ ബി.ജെ.പിയുടെ ആരോപണം. ഇടമലക്കുടിയിലെ ഉപതെരഞ്ഞെടുപ്പ് ഫലം പരാമർശിക്കവെ, ചരിത്രബോധമില്ലാത്ത വിഡ്​ഢികൾ എന്ന് പറഞ്ഞതാണ് വിവാദമായത്. ഇടതുമുന്നണി ജനങ്ങൾക്ക് നൽകിയ സേവനങ്ങൾ എണ്ണിപ്പറയുന്നതിനിടെയാണ് പഞ്ചായത്ത് തെരഞ്ഞെടുപ്പിനെക്കുറിച്ച് എം.എം. മണി സൂചിപ്പിച്ചത്. ദേവികുളം മികച്ച പ്രകടനം നടത്തിയപ്പോൾ മൂന്നാർ പിന്നാക്കം പോയതായും ഇടമലക്കുടിയിൽ ബി.ജെ.പി വന്നത് പരിശോധിക്കണമെന്നും ചൂണ്ടിക്കാട്ടി. എത്ര കോടി മുടക്കിയാണ് ഇടമലക്കുടിയെ ഈ നിലയിലെത്തിച്ചത്. വൈദ്യുതി എത്തിക്കാൻ എത്ര കഷ്​ടപ്പെട്ടു. എന്നിട്ടും ബി.ജെ.പിയെ വിജയിപ്പിച്ചതിനെക്കുറിച്ച് പറഞ്ഞുകൊണ്ട്, ചരിത്രബോധമില്ലാത്ത വിഡ്ഢികൾ എന്ന് പറഞ്ഞ് പ്രസംഗം അവസാനിപ്പിക്കുകയായിരുന്നു. ഈ പരാമർശമാണ് വിവാദമാക്കിയത്. എം.എം. മണിക്കാണ്​ ബോധം ഇല്ലാത്തത് എന്ന് ബി.ജെ.പി ജില്ല പ്രസിഡൻറ്​ കെ.എസ്. അജി പറഞ്ഞു. നിയമസഭ സാമാജികനുവേണ്ട മിനിമം മര്യാദയാണ് ലംഘിച്ചത്. ബി.ജെ.പി ഒരു വാർഡിൽ ജയിച്ചതി​ൻെറ അസഹിഷ്​ണുതയാണ്​ പ്രസ്​താവന. മുതുവാൻ സമുദായത്തോട് പരസ്യമായി എം.എം. മണി മാപ്പുപറയണമെന്നും കെ.എസ്. അജി ആവശ്യപ്പെട്ടു.