അവിശ്വാസ പ്രമേയചർച്ച; മൂന്നാർ പഞ്ചായത്ത് ഓഫിസ് പരിസരത്ത് സംഘർഷം

മൂന്നാർ: മൂന്നാർ പഞ്ചായത്തിലെ യു.ഡി.എഫ്​ ഭരണസമിതിക്കെതിരെ ഇടതുമുന്നണി കൊണ്ടുവന്ന അവിശ്വാസ പ്രമേയ ചർച്ചക്ക് മുന്നോടിയായി വാക്കേറ്റവും സംഘർഷവും. ഇടതുമുന്നണിയുടെ ഒപ്പംചേർന്ന കോൺഗ്രസ് അംഗങ്ങളെ തടയാനുള്ള നീക്കമാണ് സംഘർഷത്തിന്​ കാരണം​. രാവിലെ പ്രസിഡൻറിന് എതിരായ അവിശ്വാസ പ്രമേയം ചർച്ചചെയ്യാനായി രണ്ട് കോൺഗ്രസ് അംഗങ്ങൾ ഇടത് അംഗങ്ങൾ​െക്കാപ്പം എത്തിയതുമുതൽ പ്രശ്നങ്ങൾ ആരംഭിച്ചു. കോൺഗ്രസ് അംഗങ്ങളായ രാജേന്ദ്രനെയും പ്രവീണയെയും വാഹനത്തിൽനിന്ന് ഇറങ്ങാൻപോലും മറ്റ് കോൺഗ്രസ് അംഗങ്ങളും പ്രവർത്തകരും അനുവദിച്ചില്ല. ഇവർ ചുറ്റുംകൂടി രണ്ട് അംഗങ്ങളെയും കൂവാനും മുദ്രാവാക്യം വിളിക്കാനും തുടങ്ങി. ഇടത്​ പ്രവർത്തകരും മുദ്രാവാക്യം വിളികളോടെ ഇവരുടെ അടുത്തേക്ക് എത്തിയതോടെ സംഘർഷാവസ്ഥയായി. സ്ഥലത്തുണ്ടായിരുന്ന മൂന്നാർ ഡിവൈ.എസ്​.പി കെ.ആർ. മനോജിൻെറ നേതൃത്വത്തിലുള്ള പൊലീസ് സംഘം ഇടപെട്ടതോടെ സ്ഥിതി നീയന്ത്രണവിധേയമായി. ഇതിനിടെയാണ് പഞ്ചായത്ത് പ്രസിഡൻറ് എം. മണിമൊഴി നാടകീയമായി രാജി പ്രഖ്യാപിച്ചത്. ഇതോടെ അവിശ്വാസ പ്രമേയം ചർച്ച​െക്കടുക്കാതെ പിരിഞ്ഞു. ഉച്ചകഴിഞ്ഞ് വൈസ് പ്രസിഡൻറിനെതിരായ ചർച്ചക്ക് മുമ്പ് കോൺഗ്രസ് നിലപാട് മാറ്റി. ചർച്ചയിൽ പങ്കെടുത്ത് ഫലം വരുന്നതുവരെ കാത്തിരിക്കാനാണ് തീരുമാനിച്ചത്. കോൺഗ്രസിൻെറ എട്ട് അംഗങ്ങളും വിട്ടുനിന്നെങ്കിലും രാജേന്ദ്രനും പ്രവീണയും ഇടതുമുന്നണി അംഗങ്ങൾ​െക്കാപ്പം എത്തി പ്രമേയത്തിന് അനുകൂലമായി വോട്ട് ചെയ്തതോടെ വൈസ് പ്രസിഡൻറ് പുറത്തായി. ഇതോടെ ഇടതുമുന്നണി പ്രവർത്തകർ ടൗണിൽ ആഹ്ലാദപ്രകടനവും നടത്തി. സംഘർഷ സാധ്യത മുന്നിൽകണ്ട് കനത്ത പൊലീസ് വലയത്തിലായിരുന്നു പഞ്ചായത്ത് ഓഫിസും പരിസരങ്ങളും. ചിത്രം 1 ഇടതുമുന്നണിയുടെ ഒപ്പമെത്തിയ കൂറുമാറിയ അംഗങ്ങളെ കോൺഗ്രസ് പ്രവർത്തകർ തടയുന്നു