വടവുകോട് ബ്ലോക്ക് പ്രസിഡന്‍റ്​ സ്ഥാനം ട്വന്‍റി20 പിടിച്ചെടുത്തു

കോലഞ്ചേരി: വടവുകോട് ബ്ലോക്ക് പഞ്ചായത്ത് പ്രസിഡന്‍റ്​ സ്ഥാനം ട്വന്‍റി20 പിടിച്ചെടുത്തു. ട്വന്‍റി20യുടെ റസീന പരീതിനെ പ്രസിഡന്‍റായി തെരഞ്ഞെടുത്തു. റസീന അഞ്ച്​ വോട്ട്​ നേടിയപ്പോൾ എതിരായി മത്സരിച്ച യു.ഡി.എഫ് സ്ഥാനാർഥി അനു അച്ചുവിന് നാലും എൽ.ഡി.എഫ് സ്ഥാനാർഥി ജൂബിൾ ജോർജിന് മൂന്നും വോട്ട്​ ലഭിച്ചു. പ്രസിഡന്‍റായിരുന്ന കോൺഗ്രസിലെ വി.ആർ. അശോകൻ മരിച്ചതിനെ തുടർന്നാണ് തെരഞ്ഞെടുപ്പ്​ നടന്നത്. കുന്നത്തുനാട് നിയോജക മണ്ഡലത്തിലെ നാല് ഗ്രാമപഞ്ചായത്തുകളുടെ ഭരണവും ട്വന്‍റി20ക്കാണ്. ബ്ലോക്കിലെ വെമ്പിള്ളി ഡിവിഷനിൽനിന്നുള്ള അംഗമാണ് റസീന. കഴിഞ്ഞ തദ്ദേശ തെരഞ്ഞെടുപ്പിൽ ട്വന്‍റി20, കോൺഗ്രസ് പാർട്ടികൾക്ക് അഞ്ച് വീതവും സി.പി.എമ്മിന് മൂന്നും അംഗങ്ങളെയാണ് ലഭിച്ചത്. പ്രസിഡന്‍റിന്‍റെ മരണം മൂലം കോൺഗ്രസിന് ഒരംഗം നഷ്ടമാവുകയായിരുന്നു.