കാക്കനാട്ട്​ അപകടം പതിവാകുന്നു

കാക്കനാട്: ജില്ല ആസ്ഥാനത്തിനുസമീപം വാഹനാപകടം പതിവാകുന്നു. കാക്കനാട് ഐ.എം.ജി ജങ്​ഷനിൽ അത്താണി ഭാഗത്തേക്ക് പോകുന്ന വഴിക്കാണ് അപകടം പതിവാകുന്നത്. കഴിഞ്ഞദിവസം ഇവിടെയുണ്ടായ അപകടത്തിൽ യാത്രക്കാർ രക്ഷപ്പെട്ടത് അത്ഭുതകരമായായിരുന്നു. കാക്കനാടുനിന്ന് അത്താണി ഭാഗത്തേക്ക് പോയിരുന്ന കാറാണ് അപകടത്തിൽപെട്ടത്. ശനിയാഴ്ച പുലർച്ച 2.30നാണ് സംഭവം. എതിർവശത്തുനിന്ന് തെറ്റായ ദിശയിൽ വന്ന ബൈക്കിൽ ഇടിക്കാതിരിക്കാൻ വെട്ടിച്ചുമാറ്റിയപ്പോഴാണ് അപകടത്തിൽപെട്ടത്. നിയന്ത്രണം വിട്ട കാർ സമീപത്ത് നിർത്തിയിട്ടിരുന്ന ഓട്ടോയിൽ ഇടിച്ച് ഇലക്​ട്രിക് പോസ്റ്റ് തകർത്തശേഷമാണ് നിന്നത്. കാറിനും ഓട്ടോക്കും സാരമായ നാശനഷ്ടങ്ങൾ ഉണ്ടായിട്ടുണ്ട്. ഈ ഭാഗത്തെ കുപ്പിക്കഴുത്ത് പോലുള്ള റോഡാണ് അപകടത്തിന് കാരണമാകുന്നത്. വീതി കുറഞ്ഞുവരുന്നതിനാൽ എതിർദിശയിൽ വരുന്ന വാഹനങ്ങൾക്ക് കടന്നുപോകാനാവാതെ വരുമ്പോഴാണ് അപകടങ്ങൾ ഉണ്ടാകുന്നത്. ജീവൻ പൊലിയുന്ന അവസ്ഥ വരെ ഉണ്ടായിട്ടുണ്ട്. ഇതിനുപുറമെ, നിരവധി പേർക്കാണ് പരിക്കേൽക്കുന്നത്.