റോ റോ വെസൽ: പശ്ചിമകൊച്ചിയുടെ യാത്രപ്രശ്നത്തിന് ആശ്വാസമാകും

ഫോർട്ട്​കൊച്ചി: പശ്ചിമകൊച്ചി നേരിടുന്ന യാത്രപ്രശ്നങ്ങളിലൊന്നാണ് ഫോർട്ട്​കൊച്ചി-വൈപ്പിൻ കരകളെ ബന്ധിപ്പിക്കുന്ന റോ റോ സർവിസ്. ഒന്നര മാസത്തോളമായി റോ റോ വെസലുകളിൽ ഒന്ന് അറ്റകുറ്റപ്പണിക്ക്​ മാറ്റിയിട്ടിരിക്കുകയാണ്. ഇതുമൂലം യാത്രക്കാർ വലിയ ദുരിതമാണ് അനുഭവിച്ചുവരുന്നത്. മേഖലയിൽ സർവിസിനായി മൂന്ന് വെസലുകൾ വേണമെന്നായിരുന്നു ആദ്യ തീരുമാനം. എന്നാൽ, സാമ്പത്തികപ്രശ്നം മൂലം രണ്ട് വെസലുകൾ മാത്രമാണ് നഗരസഭ പണിയിച്ചത്. രണ്ട് വെസലുകൾ സർവിസ് നടത്തുമ്പോൾ ഒരു വെസലിന് തകരാറുകൾ സംഭവിക്കുമ്പോൾ മുൻകരുതൽ എന്ന നിലയിലാണ് മൂന്നാമതൊരു വെസൽ എന്ന ആശയം ഉടലെടുത്തത്. നേരത്തെ സ്വകാര്യ കമ്പനി സർവിസ് നടത്തിയിരുന്നപ്പോഴും ഈ ആശയം മുൻനിർത്തി മൂന്ന് ജങ്കാറുകൾ ഉണ്ടായിരുന്നു. ബജറ്റിൽ ഒരു വെസലിനായി 10 കോടി രൂപ അനുവദിച്ച പ്രഖ്യാപനം നാട്ടുകാർക്ക് ആശ്വാസത്തിന് വകനൽകി.