കൊച്ചി: അംഗപരിമിതരുടെ സംവരണ വ്യവസ്ഥ പാലിക്കാതെ 2018 നവംബർ 18 നുശേഷം എയ്ഡഡ് സ്കൂളുകളിൽ ഉണ്ടായ ഒഴിവുകളിൽ മാനേജ്മെന്റ് നടത്തിയ നിയമനങ്ങൾക്ക് സർക്കാർ അംഗീകാരം നൽകരുതെന്ന് ഹൈകോടതി. എയ്ഡഡ് സ്കൂൾ നിയമനങ്ങളിൽ അംഗപരിമിതർക്ക് സംവരണം ഏർപ്പെടുത്തിയ സർക്കാർ ഉത്തരവ് കർശനമായി പാലിക്കണമെന്നും ജസ്റ്റിസ് രാജ വിജയരാഘവന്റെ ഉത്തരവിൽ പറയുന്നു. ഉത്തരവ് നിലവിൽ വന്ന തീയതിക്ക് ശേഷമുള്ള നിയമനങ്ങൾക്ക് ബാധകമാക്കിയാണ് സിംഗിൾബെഞ്ചിന്റെ ഉത്തരവ്. ഇതിനകം അംഗീകാരം നൽകിയ നിയമനങ്ങളെ ഇതു ബാധിക്കില്ലെന്നും വ്യക്തമാക്കിയിട്ടുണ്ട്. എയ്ഡഡ് സ്കൂൾ നിയമനങ്ങളിൽ അംഗപരിമിതർക്കുള്ള സംവരണം നടപ്പാക്കുന്നില്ലെന്നാരോപിച്ച് കേരള ഫെഡറേഷൻ ഓഫ് ബ്ലൈൻഡ് സംസ്ഥാന പ്രസിഡന്റ് കെ.ജെ. വർഗീസ് അടക്കം നൽകിയ ഹരജികളാണ് കോടതി പരിഗണിച്ചത്. എയ്ഡഡ് സ്കൂളുകളിലെ അംഗപരിമിതരുടെ നിയമനം നിയമപരവും ഭരണഘടനാപരവുമായ അവകാശമാണെന്ന് കോടതി ചൂണ്ടിക്കാട്ടി. തൊഴിൽ മേഖലയിൽ അംഗപരിമിതരെ ഉൾപ്പെടുത്തേണ്ടത് ഈ വിഭാഗങ്ങളുടെ ശാക്തീകരണത്തിന് അനിവാര്യമാണെന്ന് കോടതി ചൂണ്ടിക്കാട്ടി. അംഗപരിമിതരുടെ അവകാശസംരക്ഷണ നിയമങ്ങളനുസരിച്ചാണ് എയ്ഡഡ് സ്കൂൾ നിയമനങ്ങളിൽ ഇവർക്ക് സംവരണമേർപ്പെടുത്താൻ സാമൂഹ്യനീതി വകുപ്പ് ഉത്തരവിറക്കിയത്. 1996 ഫെബ്രുവരി ഏഴു മുതൽ 2017 ഏപ്രിൽ 18 വരെയുള്ള ഒഴിവുകളിൽ മൂന്നു ശതമാനവും തുടർന്നുള്ള ഒഴിവുകളിൽ നാലുശതമാനവും സംവരണം നൽകാനാണ് ഉത്തരവിട്ടത്. അംഗപരിമിതർക്ക് ഇത്തരത്തിൽ നിയമനം നൽകിയിട്ടില്ലെങ്കിൽ 2018 നവംബർ 18ന് ശേഷമുള്ള ഒഴിവുകളിൽ ഈ കണക്കനുസരിച്ച് നിയമനം നൽകണം. ഈ നിയമനം നടത്താതെ മറ്റു നിയമനങ്ങൾക്ക് അംഗീകാരം നൽകരുത്. 1996 ഫെബ്രുവരി ഏഴു മുതൽ 2017 ഏപ്രിൽ 18 വരെയുള്ള സംവരണം കണക്കാക്കുമ്പോൾ 33 ഒഴിവുകളിൽ ആദ്യത്തേതും തുടർന്നുള്ള കാലയളവിലെ സംവരണം കണക്കാക്കുമ്പോൾ 25 ഒഴിവുകളിൽ ആദ്യത്തേതും അംഗപരിമിതർക്ക് നൽകണമെന്നും രണ്ടുമാസത്തിനകം ഇത്തരത്തിൽ സംവരണക്രമമുണ്ടാക്കണമെന്നും ഉത്തരവിൽ പറയുന്നു. അംഗപരിമിതർക്കുള്ള സംവരണം പാലിക്കണമെന്ന് നിർദേശിക്കാതെ എയ്ഡഡ് സ്കൂളുകളിൽ 2021 ജൂലൈ 15 വരെ നടത്തിയ നിയമനങ്ങൾക്ക് 2021 സെപ്റ്റംബർ 24ന് മുമ്പ് അംഗീകാരം നൽകാൻ ഡി.ഇ.ഒ മാർക്കും വിദ്യാഭ്യാസ ഡെപ്യൂട്ടി ഡയറക്ടർമാർക്കും നിർദേശം നൽകി പൊതു വിദ്യാഭ്യാസ ഡയറക്ടർ 2021 സെപ്റ്റംബർ ആറിനു പുറത്തിറക്കിയ ഉത്തരവ് കോടതി റദ്ദാക്കി. ഉത്തരവ് നേരത്തേ സ്റ്റേ ചെയ്തിരുന്നു. 2021 നവംബർ എട്ടിന് ശേഷമുള്ള ഒഴിവുകളിൽ മാത്രം സംവരണം പാലിച്ചാൽ മതിയെന്ന വിദ്യാഭ്യാസ വകുപ്പിന്റെ ഉത്തരവുകളും റദ്ദാക്കിയിട്ടുണ്ട്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.