യുവാവിനെ തട്ടിക്കൊണ്ടുപോയ കേസ്​: ലുക്കൗട്ട് നോട്ടീസ് പുറപ്പെടുവിച്ചു

മൂവാറ്റുപുഴ: മൂവാറ്റുപുഴയിൽ യുവാവിനെ തട്ടിക്കൊണ്ട് പോയി ദേഹോപദ്രവം ഏൽപിച്ച കേസിലെ പ്രതികളെ പിടികൂടാൻ പൊലീസ് ലുക്കൗട്ട് നോട്ടീസ് പുറപ്പെടുവിച്ചു. മലപ്പുറം തേഞ്ഞിപ്പലം അരിയല്ലൂർ കാവുകലത്തിൽ വീട്ടിൽ സനീഷ് (46), തലയോലപ്പറമ്പ് മറവൻതുരുത്ത് കുലശേഖരമംഗലം നടുക്കാരിയിൽ വീട്ടിൽ സജി (45), മറവൻതുരുത്ത് കടൂക്കര ജങ്​ഷൻ ഭാഗത്ത് കാട്ടിപ്പറമ്പിൽ വീട്ടിൽ അനൂപ് (പോത്തുകുട്ടൻ -36), വൈക്കം ഉദയനാപുരം കറ്റുവേലിയിൽ വീട്ടിൽ അർജുൻ മോഹൻ (25), കോട്ടയം വെള്ളൂർ വടകര പെരുങ്കളത്തിൽ വീട്ടിൽ രതീഷ് (38) എന്നിവർക്കെതിരെയാണ് ലുക്കൗട്ട് നോട്ടീസ് പുറപ്പെടുവിച്ചത്. കഴിഞ്ഞമാസം ഏഴിനാണ് കേസിനാസ്പദമായ സംഭവം. കോഴിക്കോട്ടുനിന്ന്​ ഇപ്പോൾ വാളകം മേക്കടമ്പ് ഭാഗത്ത് താമസിക്കുന്ന യുവാവിനെയാണ് കലൂരിൽനിന്ന്​ തട്ടിക്കൊണ്ട് പോയി വൈക്കത്തെ ഹോട്ടലിൽ വെച്ച് പീഡിപ്പിച്ചത്. പിറ്റേദിവസം യുവാവ് വാടകക്ക്​ താമസിക്കുന്ന മേക്കടമ്പിലുള്ള വീട്ടിൽ അതിക്രമിച്ചുകയറി അവിടെ സൂക്ഷിച്ചിരുന്ന സിനിമക്ക്​ വാടകക്ക്​ നൽകുന്ന ഒരു കോടി രൂപയോളം വിലവരുന്ന ഉപകരണങ്ങൾ കാറിൽ കയറ്റിക്കൊണ്ട് പോകുകയും യുവാവിന്‍റെ ഭാര്യയെയും മകളെയും അമ്മയെയും ഉപദ്രവിക്കുകയും ചെയ്തു. ഒളിവിലുള്ള പ്രതികളെക്കുറിച്ച്​ വിവരം ലഭിക്കുന്നവർ 9497987122, 9497980503, 04852832304 നമ്പറുകളിൽ വിവരം കൈമാറണമെന്നും പൊലീസ് അറിയിച്ചു. ചിത്രങ്ങൾ. EKG Saji, EKG Anoop, EKG Ratheesh, EKG Saneesh, EKG Arjun Mohan