ആലപ്പുഴ: 2024 ലോക്സഭ തെരഞ്ഞെടുപ്പിൽ പോസ്റ്റൽ വോട്ട് ചെയ്യാൻ 12-ഡി ഫോറങ്ങൾ ബൂത്ത് ലെവൽ ഓഫിസർമാർ (ബി.എൽ.ഒ) ഞായറാഴ്ച മുതൽ വിതരണം ചെയ്യും.
85 വയസ്സ് മുകളിലുള്ളവർക്കും ഭിന്നശേഷിക്കാരായ വോട്ടർമാർക്കുമാണ് 12-ഡി ഫോറങ്ങൾ നൽകുന്നത്. ഏപ്രിൽ ഒന്നിന് മുമ്പ് പൂരിപ്പിച്ച് നൽകുന്നവർക്കാണ് പോസ്റ്റൽ വോട്ട് ചെയ്യാൻ അവസരം. പ്രായാധിക്യംകൊണ്ട് ബുദ്ധിമുട്ടുള്ളവർക്കും ഭിന്നശേഷിക്കാർക്കും പോളിങ് കേന്ദ്രത്തിൽ പോകാതെ വോട്ട് ചെയ്യാനുള്ള അവസരമാണ് ഒരുക്കുന്നത്. സെക്ടർ ഓഫിസർമാരുടെ നിരീക്ഷണത്തിലാണ് ബി.എൽ.ഒമാർ വീടുകളിൽ ഫോറങ്ങൾ വിതരണം ചെയ്യുന്നത്. ഏപ്രിൽ ഒന്നിന് മുമ്പ് പൂരിപ്പിച്ച ഫോറങ്ങൾ തിരികെ നൽകണം.
ജനുവരി 22ന് പ്രസിദ്ധീകരിച്ച വോട്ടർ പട്ടികയുടെ അടിസ്ഥാനത്തിലാണ് അർഹരായ സമ്മതിദായകരെ തിരഞ്ഞെടുക്കുന്നത്. അപേക്ഷകൾ പരിശോധിച്ച് വോട്ട് ചെയ്യുന്നവരുടെ പട്ടിക വരണാധികാരി തയാറാക്കും. പോളിങ് ഉദ്യോഗസ്ഥർ ഇവരെ സന്ദർശിച്ച് പോസ്റ്റൽ ബാലറ്റ് സുരക്ഷിതമായി നൽകും. വോട്ട് രേഖപ്പെടുത്തി നൽകുന്ന ബാലറ്റ് കൈപ്പറ്റി അധികൃതർക്ക് നൽകുമെന്ന് ഇലക്ഷൻ വിഭാഗം അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.