പൈപ്പ്​ ലൈൻ വീണ്ടും പൊട്ടി; ശുദ്ധജല വിതരണം മുടങ്ങും

അമ്പലപ്പുഴ: ആലപ്പുഴ ശുദ്ധജല പദ്ധതിയുടെ പൈപ്പ് വീണ്ടും പൊട്ടിയതിനാൽ ശനിയാഴ്ച വരെ ശുദ്ധജല വിതരണം മുടങ്ങും. ആലപ്പുഴ നഗരസഭയിലും സമീപത്തെ ആറു പഞ്ചായത്തിലുമാണ് വിതരണം തടസ്സപ്പെടുക. അമ്പലപ്പുഴ-തിരുവല്ല സംസ്ഥാന പാതയിൽ തകഴി കന്നാമുക്കിൽ ആശുപത്രിക്കുസമീപമാണ് കഴിഞ്ഞ ദിവസം വീണ്ടും ചോർച്ച കണ്ടെത്തിയത്. നിലവാരം കുറഞ്ഞ പൈപ്പ് സ്ഥാപിച്ചതിനെത്തുടർന്ന് നിരവധി തവണയാണ് തകഴിയിൽ കുടിവെള്ള പൈപ്പ്​ പൊട്ടിയത്. നിലവാരം കുറഞ്ഞ പൈപ്പ് മാറ്റുന്ന ജോലികളുടെ ആദ്യഘട്ടം പൂർത്തിയാക്കി വെള്ളം കടത്തിവിടാൻ തുടങ്ങിയപ്പോഴാണ് വീണ്ടും ചോർച്ചയുണ്ടായത്​. അറ്റകുറ്റപ്പണി തുടങ്ങിയതോടെ തീരപ്രദേശത്തടക്കം ജനം ശുദ്ധജലത്തിന് നെട്ടോട്ടമായി. ചിത്രം: തകഴി കന്നാമുക്കിൽ ആശുപത്രിക്കുസമീപം പൈപ്പ് പൊട്ടി വെള്ളം ഒഴുകുന്നു