കാലിടറി കല്ലട ജലസേചന പദ്ധതി

ചാരുംമൂട്: നാടിന് ഏറെ ആശ്വാസമാകേണ്ട കല്ലട ജലസേചന പദ്ധതി സംരക്ഷിക്കാൻ കഴിയാതെ നാശത്തിലേക്ക്. കാർഷികരംഗത്ത് സമഗ്ര വികസനം ലക്ഷ്യമാക്കി നടപ്പാക്കിയ പദ്ധതിയാണിത്​. 1961ൽ രൂപം നൽകി 1986ൽ കമീഷൻ ചെയ്ത പദ്ധതിയുടെ പ്രയോജനം കൊല്ലം, പത്തനംതിട്ട, ആലപ്പുഴ ജില്ലകളിൽ ലഭിക്കുന്നു. തെന്മല ജലസംഭരണിയിൽനിന്ന്​ രണ്ട് മെയിൻ കനാലുകളും ഉപകനാലുകളും വഴി ജലമെത്തിച്ച് 12 നിയോജകമണ്ഡലങ്ങളിലെ 92 വില്ലേജുകളിൽ കൃഷിക്ക് ഉപയോഗിക്കാവുന്ന രീതിയിലാണ്​ പദ്ധതിയുടെ രൂപകൽപന. പദ്ധതിയുടെ ഉദ്ഘാടനം നടന്നെങ്കിലും കനാൽ നിർമാണം ഇനിയും പൂർത്തിയാകാത്ത മേഖലകളുണ്ട്​. ചാരുംമൂട് കരിമുളക്കൽ ജങ്​ഷൻ മുതൽ കായംകുളം വരെ 13 കിലോമീറ്റർ ദൂരമാണ്​ പൂർത്തിയാക്കാനുള്ളത്​. കനാൽ നിർമാണത്തിന്​ പൊന്നുംവില കൊടുത്ത് ഏറ്റെടുത്ത ഭൂമിയും കാടുകയറിയും കൈയേറ്റങ്ങളാലും അന്യാധീനപ്പെട്ടു. അഞ്ചര പതിറ്റാണ്ട്​ പിന്നിടുന്ന പദ്ധതിക്ക് അറ്റകുറ്റപ്പണി ഇല്ലായെന്നതാണ് പ്രധാന പോരായ്മ. തുടക്കത്തിൽ 3000ലധികം ജീവനക്കാരുണ്ടായിരുന്ന വകുപ്പിൽ ഇപ്പോഴുള്ളത് 300പേർ. ഓഫിസുകൾ നിർത്തലാക്കി ജീവനക്കാരെ വെട്ടിക്കുറച്ചതാണ് വലിയ പ്രതിസന്ധി. പ്രധാന കനാലുകളിൽ മണ്ണിടിഞ്ഞത്​ ഒഴുക്കിനെ തടസ്സപ്പെടുത്തുന്നു. കനാൽ മേൽപാലങ്ങൾ ഏതുനിമിഷവും നിലംപൊത്താവുന്ന നിലയിലാണ്. പലയിടത്തും കാട് വളർന്നു. കനാൽ റോഡുകൾ മെറ്റലിളകി തകർച്ചയിലാണ്. വേനൽക്കാലം കഴിഞ്ഞാൽ കനാൽ വഴി വെള്ളം ഒഴുകാത്തതിനാൽ സർവമാലിന്യങ്ങളും തള്ളുന്ന സ്ഥലമായി മാറി. അടുത്ത വേനലിൽ ഈ മാലിന്യം നീക്കാതെയാണ് വെള്ളം തുറന്നുവിടുന്നത്. 60,000 ഹെക്ടർ സ്ഥലത്തെ കൃഷിക്കും ലക്ഷക്കണക്കിന് ആളുകളുടെ കുടിവെള്ള പ്രശ്നത്തിനും പരിഹാരമാകുന്ന പദ്ധതിക്ക് കാര്യമായ പരിഗണന നൽകുന്നില്ല എന്നതാണ് യാഥാർഥ്യം. കനാലുകൾ കാലോചിതമായി പരിഷ്കരിച്ച് കൂടുതൽ സ്ഥലങ്ങളിലേക്ക് വ്യാപിപ്പിച്ച് കല്ലട ജലസേചന പദ്ധതി സംരക്ഷിക്കണമെന്ന്​ ആവശ്യപ്പെട്ട്​ അഖിലേന്ത്യ കിസാൻസഭയുടെ നേതൃത്വത്തിൽ ഏപ്രിൽ 15ന് കൊട്ടാരക്കര കെ.ഐ.പി ഓഫിസിലേക്ക് മാർച്ച്‌ നടത്തും. ഇതിന്​ മുന്നോടിയായി ബുധനാഴ്ച വൈകീട്ട് നാലിന് വിപഞ്ചിക ഓഡിറ്റോറിയത്തിൽ ചാരുംമൂട് മേഖല കൺവെൻഷൻ ചേരുമെന്ന് നേതാക്കൾ അറിയിച്ചു. APL kip kanal കാടുകയറിയ കെ.ഐ.പി കനാൽ