മണ്ണഞ്ചേരിയിൽ കുടിവെള്ളം കിട്ടാക്കനി; പൈപ്പ് വെള്ളം മുടങ്ങിയിട്ട് ആഴ്ചകൾ

കിട്ടുന്നത്​ മലിനജലം മണ്ണഞ്ചേരി: വേനൽ കടുക്കുംമുമ്പേ വെള്ളം കിട്ടാക്കനിയായി മണ്ണഞ്ചേരിയും പരിസരപ്രദേശങ്ങളും. കായലോര പ്രദേശങ്ങളിലാണ് കുടിവെള്ളക്ഷാമം രൂക്ഷം. ആഴ്ചകളായി പൈപ്പുകളിൽ വെള്ളമില്ല. കിട്ടുന്നതാകട്ടെ ചളിയും അഴുക്കും കലർന്ന മലിനജലമാണ്​. പ്രദേശത്തെ പരമ്പരാഗത കുടിവെള്ള സ്രോതസ്സുകളായ കുളങ്ങളും കിണറുകളും വറ്റിയതാണ് പ്രശ്നം രൂക്ഷമാക്കിയത്​. കായലോര വാർഡുകളായ നാല്, അഞ്ച്, ആറ്, ഏഴ് ഭാഗത്തുള്ളവർക്കാണ്​ ഏറെ ക്ലേശം. പതിയാംതറ, പുത്തൻപറമ്പ്, ഇലഞ്ഞിക്കാത്തറ, എച്ചിക്കുഴി, വിരുശ്ശേരി, ഷണ്മുഖം, അമ്പലക്കടവ്, മാർക്കറ്റ് നിവാസികൾക്ക് വെള്ളം ലഭിക്കാൻ കിലോമീറ്ററുകൾ താണ്ടണം. സ്ത്രീകൾ അടക്കമുള്ളവർ തലച്ചുമടായാണ്​ കുടിവെള്ളം ശേഖരിക്കുന്നത്. കുടിവെള്ളം ലഭ്യമാക്കാൻ കോടികൾ മുടക്കി നിരവധി പദ്ധതികൾ തുടങ്ങിയെങ്കിലും മണ്ണഞ്ചേരിയിൽ ഒന്നും ഫലം കണ്ടില്ല. ജങ്​ഷന്​ കിഴക്കുള്ള ഏക ആർ.ഒ പ്ലാന്‍റ്​ പണിമുടക്കിയിട്ട് നാളുകളായി. റോഡ്മുക്ക് ഭാഗത്തെ പമ്പിങ്ങും മിക്കവാറും തകരാറിലാണ്​. കായലോര മേഖലയിലെ ജലക്ഷാമം പരിഹരിക്കാൻ വലിയവീട് ഭാഗത്ത്‌ കൂറ്റൻ ജലസംഭരണി പണിതെങ്കിലും അത്​ നോക്കുകുത്തിയായി. ഈ ഭാഗത്ത് കുടിവെള്ള പദ്ധതിയുടെ പൈപ്പ് സ്ഥാപിച്ചെങ്കിലും പമ്പിങ് നടക്കുന്നില്ല. ജലവിഭവ വകുപ്പിന്‍റെ പൈപ്പിലൂടെ വരുന്ന അശുദ്ധജലമാണ് ഏക ആശ്രയം. ഗത്യന്തരമില്ലാതായതോടെ മിക്കപ്പോഴും ഉപ്പും അഴുക്കും കലർന്ന ഈ വെള്ളമാണ് കുടിക്കാനും പാചകത്തിനും മറ്റ് ആവശ്യങ്ങൾക്കും ഉപയോഗിക്കുന്നത്​. ആലപ്പുഴ കുടിവെള്ള പദ്ധതി ദിവസങ്ങളായി പണിമുടക്കിയതോടെ ഈ വെള്ളവും മണ്ണഞ്ചേരിക്കാർക്ക് അന്യമാണ്. പൊന്നാട്, മണ്ണഞ്ചേരി കിഴക്കേ പള്ളി പ്രദേശങ്ങളിൽ സുമനസ്സുകളായ ചില വ്യക്തികൾ സൗജന്യമായി നൽകുന്ന വെള്ളമാണ് ഏക ആശ്വാസം. ശുദ്ധജലക്ഷാമം രൂക്ഷമാകുമ്പോൾ നേരത്തേ വാഹനങ്ങളിലും മറ്റും ഈ പ്രദേശങ്ങളിൽ വെള്ളം എത്തിക്കാറുണ്ടായിരുന്നു. ഏറെ പ്രതീക്ഷയോടെ ജനം കാത്തിരുന്ന ജപ്പാന്‍ കുടിവെള്ളം മുഹമ്മ പഞ്ചായത്തിലെ അയ്യാടുപറമ്പ് ഭാഗത്തുവരെ മാത്രമാണുള്ളത്​. ഈ പദ്ധതിയിലും മണ്ണഞ്ചേരിയെ ഉൾപ്പെടുത്തിയിട്ടില്ല. ജപ്പാൻ കുടിവെള്ള പദ്ധതി മണ്ണഞ്ചേരിയിലേക്ക് നീട്ടുകയോ ആലപ്പുഴ കുടിവെള്ള പദ്ധതി കൃത്യമായ രീതിയിൽ പ്രവർത്തിപ്പിക്കുകയോ ചെയ്യണ​മെന്നാണ്​ ആവശ്യം. പടം : 1. ജലവിഭവ വകുപ്പിന്‍റെ പൈപ്പിലൂടെ എത്തുന്ന വെള്ളത്തിലെ മാലിന്യം 2. മണ്ണഞ്ചേരിയിലെ പണിമുടക്കിയ ആർ.ഒ പ്ലാന്‍റ്​