തണ്ണീർമുക്കം ബണ്ട്​ അടച്ചത്​ നേരത്തേ

leeeeeaaaaaaaaaaaadddddddd ആറുവർഷത്തിനിടെ വേമ്പനാട്ട്​ കായലിൽ രണ്ട്​ കോടിയിലധികം മത്സ്യക്കുഞ്ഞുങ്ങളെ ഫിഷറീസ്​ വകുപ്പ്​ നിക്ഷേപിച്ചിരുന്നു ആലപ്പുഴ: കാലാവസ്ഥ വ്യതിയാനത്തിലും ജലം ക്രമീകരിക്കുന്ന തണ്ണീർമുക്കം ബണ്ട്​ ഷട്ടർ കൃത്യമായ വിലയിരുത്തലില്ലാതെ അടച്ചതിലും കായൽ മത്സ്യസമ്പത്തിൽ വൻകുറവ്​ വന്നതായി നിഗമനം. അടിക്കടിയുണ്ടായ വേലിയേറ്റത്തെ തുടർന്ന്​ ഇത്തവണ പതിവിലും നേര​ത്തേയാണ്​ തണ്ണീർമുക്കം ബണ്ടിന്‍റെ ഷട്ടറുകൾ അടച്ചത്. ബണ്ടിന്‍റെ തെക്ക്​ ഭാഗത്തുനിന്നുള്ള മത്സ്യലഭ്യത ഇപ്പോൾ തീരെക്കുറഞ്ഞു. വൃശ്ചിക വേലിയേറ്റത്തോടെ ബണ്ടിന്‍റെ വടക്ക്​ ഭാഗത്തുനിന്ന്​ ഇവിടേക്ക്​ മത്സ്യങ്ങൾ എത്തുന്നതിന്​ മുമ്പ്​ ഷട്ടറുകൾ താഴ്ത്തുകയായിരുന്നു. ഇതാണ്​ പ്രധാനമായും വേമ്പനാട്ട്​ കായലിൽനിന്നുള്ള മത്സ്യലഭ്യതയിൽ വൻകുറവുണ്ടാക്കിയത്​. ഇതോടെ മുഹമ്മ, തണ്ണീർമുക്കം, മണ്ണഞ്ചേരി, ആര്യാട്​ പഞ്ചായത്തുകളിലേതു ഉൾപ്പെടെ കാൽ ലക്ഷം വരുന്ന ഉൾനാടൻ മത്സ്യത്തൊഴിലാളികളുടെ വരുമാന മാർഗം അടഞ്ഞു. കായലിലെ മത്സ്യസമ്പത്ത്​ സംരക്ഷിക്കാൻ ആറു​ വർഷത്തിനിടെ വിവിധ ഇനങ്ങളിലെ രണ്ടു​ കോടിയിലധികം മത്സ്യക്കുഞ്ഞുങ്ങളെ ഫിഷറീസ്​ വകുപ്പ്​ നിക്ഷേപിച്ചിരുന്നു. കരിമീൻ, കൊഞ്ച്​, ചെമ്മീൻ, കണമ്പ്​, കൊഴുവ, കട്ട്​ള, കാളാഞ്ചി, അരിഞ്ഞിൽ തുടങ്ങിയ ഇനം മത്സ്യങ്ങളാണ്​ നിക്ഷേപിച്ചത്​. രണ്ടു​ മാസം മുമ്പ്​ അനുഭവപ്പെട്ട ശക്തമായ മഴയിൽ കിഴക്കൻ വെള്ളത്തിന്‍റെ വരവ്​ വർധിപ്പിച്ചപ്പോൾ കായലിലെ ജലനിരപ്പ്​ നിയന്ത്രിക്കുന്നതിന് ഏതാനും ഷട്ടറുകൾ വേലിയിറക്ക സമയത്ത്​ തുറക്കുകയും വേലിയേറ്റ സമയം അടക്കുകയും ചെയ്തു. കാർഷിക മേഖലയിൽ ഉപ്പുവെള്ള ഭീഷണിയുണ്ടാകുന്ന സാഹചര്യത്തിൽ ഇത്തവണ പതിവിലും നേര​ത്തേ ഷട്ടർ പൂർണമായും അടച്ചിരുന്നു. ഇതോടെ നാരൻ, ചൂടൻ, കാര, തുടങ്ങിയ ചെമ്മീൻ ഇനങ്ങളും ഞണ്ട്​ വർഗങ്ങളും കണമ്പ്​, വറ്റ, പൂമീൻ, തെരണ്ടി തുടങ്ങിയ ഇനം മത്സ്യങ്ങളും ബണ്ടിന്​ തെക്ക്​ ഭാഗത്ത്​ കായലിൽ കിട്ടാതായി. ഉപ്പുവെള്ളം കയറുംമുമ്പ്​ ഷട്ടറുകൾ അടച്ചത്​ മത്സ്യം കൂടാതെ കക്കയുടെയും പ്രജനനത്തെ ബാധിച്ചു. ഷട്ടറുകൾ ഡിസംബർ 15ന്​ താഴ്ത്തുകയും മാർച്ച്​ 15ന്​ ഉയർത്തുകയും ചെയ്യുന്ന സമയക്രമമാണ്​ കാലങ്ങളായി പാലിച്ചുവരുന്നത്​. --------- ഷട്ടറിൽ ഉറപ്പുവേണമെന്ന് തൊഴിലാളികൾ മഴ കനത്ത്​ വെള്ളപ്പൊക്ക ഭീതിയിലായതോടെ ഇത്​ തെറ്റിച്ച്​ വേലിയേറ്റത്തിന്‍റെ പേരിൽ തോന്നിയപോലെ ഷട്ടറുകൾ ഉയർത്തുകയും താഴ്ത്തുകയും ചെയ്യുന്നത്​ മത്സ്യസമ്പത്തിനെ ദോഷകരമായി ബാധിക്കുന്നെന്ന് തൊഴിലാളികൾ ചൂണ്ടിക്കാട്ടുന്നു. കാലാവസ്ഥ മാറ്റം മറികടക്കുന്ന പ്രായോഗിക മാർഗങ്ങൾ ഷട്ടർ ഉയർത്തുന്നതിലും താഴ്ത്തുന്നതിലും ഉണ്ടായേ തീരുവെന്നും തൊഴിലാളികൾ പറയുന്നു. പരീക്ഷണാടിസ്ഥാനത്തിൽ തണ്ണീർമുക്കം ബണ്ടിന്‍റെ ഷട്ടറുകൾ ഒരുവർഷം മുഴുവൻ ഉയർത്തിവെക്കണമെന്ന്​ തൊഴിലാളികൾ ആവശ്യപ്പെടുന്നു. മുൻ ബജറ്റിൽ ഇക്കാര്യത്തിലെ ഉറപ്പ്​ പാലിക്കണം. ------ നാടൻ ഇനങ്ങൾ നൂറിൽ താ​ഴെയായി​ 250ലേറെ ഇനം നാടൻ മത്സ്യങ്ങൾ നേര​േത്ത വേമ്പനാട്ട്​ കായലിലുണ്ടായിരുന്നു. ഇത്​ നൂറിൽ താഴെയായി ചുരുങ്ങിയത്​ കാലാവസ്ഥമാറ്റത്തിന്‍റെ പ്രത്യാഘാതങ്ങളാണ്​. ഹൗസ്​ ബോട്ട്​ മാലിന്യവും ജലവാഹനങ്ങളിൽനിന്നുള്ള ഇന്ധനവും കായലിൽ കലരുന്നുണ്ട്​. പാടശേഖരങ്ങളിൽനിന്ന്​ രാസവളവും കീടനാശിനികളും ഒഴുകി കായലിൽ എത്തുന്നതും മത്സ്യസമ്പത്തിന് ഭീഷണിയാണ്​​.