തെരുവുനായ്ക്കളുടെ ആക്രമണം: നൂറിലധികം താറാവുകൾ ചത്തു

അരൂർ: തെരുവുനായ്ക്കളുടെ ആക്രമണത്തിൽ നൂറിലധികം താറാവുകൾ ചത്തു. എഴുപുന്ന ഗ്രാമപഞ്ചായത്തിൽ പള്ളിപ്പറമ്പിൽ ജോർജുകുട്ടിയുടെ വീട്ടുവളപ്പിൽ കൂടുകെട്ടി വളർത്തിയ താറാവുകളെയാണ് കൊന്നത്. കൂടു പൊളിച്ചാണ് നായ്ക്കൾ അകത്തുകയറിയത്. വ്യാഴാഴ്ച പുലർച്ച താറാവുകളുടെ കൂട്ടക്കരച്ചിൽ കേട്ട് എത്തിയപ്പോൾ നായ്ക്കൾ ഓടി മറയുന്നത്​ കണ്ടു. കുറച്ച് താറാവുകളെ മാത്രമേ നായ്ക്കൾ കഴിച്ചിരുന്നുള്ളു. ബാക്കിയുള്ളവയെ കൊന്നൊടുക്കിയിരുന്നു. 35,000 രൂപയുടെ നഷ്ടം കണക്കാക്കുന്നു. ചത്ത താറാവുകളെ കുഴിച്ചുമൂടി. മാസങ്ങൾക്കു മുമ്പ്​ സമാനമായ സംഭവം ചന്തിരൂരിലും നടന്നിരുന്നു. ചിത്രം തെരുവുനായ്ക്കൾ കൊന്നൊടുക്കിയ താറാവിൻകൂട്ടം