കലവൂരിനും മാരാരിക്കുളത്തിനും ഇടയിൽ ദേശീയപാത കുരുതിക്കളം

ആറുമാസത്തിനിടെ പൊലിഞ്ഞത്​ എട്ടു ജീവൻ ആലപ്പുഴ: കലവൂർ മുതൽ മാരാരിക്കുളം കളിത്തട്ട് ജങ്ഷൻവരെ ദേശീയപാതയിൽ പൊലിയുന്നത്​ നിരവധി ജീവൻ. മരിച്ചവരുടെ കണക്കിന്‍റെ മൂന്നിരട്ടിയിലേറെയാണ്​ അപകടത്തിനിരയാകുന്നവരുടെ എണ്ണം. ആറുമാസത്തിനിടെ എട്ടു ജീവനാണ്​ ഇവിടെ മാത്രം നഷ്ടമായത്​. അശ്രദ്ധമായ വാഹനം ഓടിക്കലും ട്രാഫിക് സിഗ്നലിലെ അപാകതയും റോഡിലെ വെളിച്ചക്കുറവുമാണ് അപകടങ്ങൾ വർധിക്കാൻ ഇടയാക്കുന്നത്​.​ ബുധനാഴ്ച പുലർച്ച കലവൂർ കൃപാസനത്തിന്​ മുൻവശം കാറും ഓട്ടോയും കൂട്ടിയിടിച്ച് ഓട്ടോറിക്ഷ ഡ്രൈവർ ആലപ്പുഴ വലിയമരം വാർഡിൽ ചിറയിൽ വീട്ടിൽ നിഹാസ് (29) മരിച്ചതാണ് ഒടുവിലത്തെ സംഭവം. ഓട്ടോ യാത്രക്കാരായ മൂന്ന്​ സ്ത്രീകൾക്ക്​ പരിക്കേറ്റു. കൃപാസനത്തിന്​ സമീപം കാറും ബൈക്കും കൂട്ടിയിടിച്ച് ബൈക്കുയാത്രക്കാരൻ കാവുങ്കൽ കുന്നേൽവെളി മധുവിന്റെ മകൻ മനു മരിച്ചത് ഒരാഴ്ച മുമ്പ്​ രാത്രിയിലാണ്. കാസർകോട്‌ സ്വദേശി മൂന്ന്​ മാസം മുമ്പാണ്‌ കൃപാസനത്തിന്​ മുന്നിൽ ലോറിയിടിച്ചു മരിച്ചത്. ധ്യാനകേന്ദ്രത്തിൽ എത്തുന്നവർ അശ്രദ്ധമായി റോഡ്​ മുറിച്ചുകടക്കുന്നതും അപകടത്തിന്​ കാരണമാകുന്നതായാണ് ​പൊലീസിന്റെ നിഗമനം. ഇവിടെ സ്വകാര്യ സുരക്ഷ ജീവനക്കാർ അശാസ്ത്രീയമായി വാഹനം നിയന്ത്രിക്കുന്നത് കൂട്ടിയിടിക്ക്​ കാരണമാകുന്നതായും സംശയിക്കുന്നു. അഞ്ച്​ കാറുകളാണ് ആഴ്ചകൾക്ക്​ മുമ്പ്​ ഇവിടെ കൂട്ടിയിടിച്ചത്. ഇവിടെയുള്ള ബസ്‌ സ്റ്റോപ്പ് മാറ്റിയാൽ തിരക്ക് നിയന്ത്രിക്കാനാകുമെന്നാണ് നാട്ടുകാർ പറയുന്നത്. വെളിച്ചക്കുറവും ഇടറോഡുകളിൽനിന്ന്​ വരുന്നവർക്ക് ദേശീയപാതയാണെന്നുള്ള മുന്നറിയിപ്പ് കിട്ടാത്തതുമാണ് വളവനാട് കോൾഗേറ്റ് ജങ്ഷനിൽ അപകടങ്ങൾക്ക് ഇടയാക്കുന്നത്. ലോറിതട്ടി വീണ ബൈക്ക്​ യാത്രക്കാരന്റെയും ലോറിയുടെ പിന്നിൽനിന്ന്​ വീണ യുവാവിന്റെയും ശരീരത്തിലൂടെ പിന്നാലെ​ വന്ന വാഹനങ്ങൾ കയറിയിറങ്ങിയ അപകടങ്ങളും മാസങ്ങൾക്കുമുമ്പ്​ കോൾഗേറ്റ് ജങ്ഷനിൽ സംഭവിച്ചിരുന്നു. തീരദേശപാതയിൽനിന്ന് ദേശീയപാതയിലേക്ക്​ കയറിയ കാറിനെ ഇടിക്കാതെ പാഴ്‌സൽ ലോറി വെട്ടിച്ചുമാറ്റുന്നതിനിടെ സമീപത്തെ പാടത്തേക്കിറങ്ങി. അതിനിടെ മറ്റൊരു കാറിൽ ഇടിക്കുകയും ചെയ്തു. റോഡുകളുടെ ഉയരവ്യത്യാസമാണ് കളിത്തട്ട് ജങ്ഷനിൽ അപകടം വർധിപ്പിക്കുന്നത്.