സ്വയംതൊഴില്‍ പദ്ധതികളിലേക്ക് അപേക്ഷിക്കാം

കാസർകോട്: എംപ്ലോയ്‌മെന്റ് എക്‌സ്‌ചേഞ്ച് മുഖേന നടപ്പാക്കുന്ന വിവിധ സ്വയംതൊഴില്‍ പദ്ധതികളിലേക്ക് എംപ്ലോയ്‌മെന്റ് എക്‌സ്‌ചേഞ്ചിൽ രജിസ്റ്റര്‍ ചെയ്തവരില്‍നിന്ന്​ അപേക്ഷ ക്ഷണിച്ചു. പദ്ധതികളുടെ വിശദാംശങ്ങള്‍: കെസ്‌റു സ്വയം തൊഴില്‍ പദ്ധതി: കുടുംബ വാര്‍ഷിക വരുമാനം ഒരു ലക്ഷം രൂപ വരെയുള്ള 21-50 മധ്യേ പ്രായമുള്ളവര്‍ക്ക് സ്വയം തൊഴില്‍ ആരംഭിക്കാനായി ബാങ്ക് മുഖേന ഒരു ലക്ഷം രൂപ വരെ വായ്പയും 20,000 രൂപ വരെ സബ്‌സിഡിയും * മള്‍ട്ടി പര്‍പ്പസ് ജോബ് ക്ലബ് സ്വയം തൊഴില്‍ പദ്ധതി: കുടുംബ വാര്‍ഷിക വരുമാനം ഒരു ലക്ഷം രൂപ വരെയുള്ള 21-45 മധ്യേ പ്രായമുള്ള ഒന്നില്‍ കൂടുതല്‍ പേര്‍ക്ക് സംയുക്ത സംരംഭം ആരംഭിക്കാനായി ബാങ്ക് മുഖേന 10 ലക്ഷം രൂപ വരെ വായ്പയും രണ്ടു ലക്ഷം രൂപ വരെ സബ്‌സിഡിയും. *നവജീവന്‍ സ്വയം തൊഴില്‍ പദ്ധതി: കുടുംബ വാര്‍ഷിക വരുമാനം ഒരു ലക്ഷം രൂപ വരെയുള്ള 50-65 മധ്യേ പ്രായമുള്ളവര്‍ക്ക് സ്വയം തൊഴില്‍ ആരംഭിക്കാനായി ബാങ്ക് മുഖേന 50,000 രൂപ വരെ വായ്പയും 12,500 രൂപ വരെ സബ്‌സിഡിയും. ശരണ്യ സ്വയം തൊഴില്‍ പദ്ധതി: *വിധവകള്‍, നിയമാനുസൃതമായി വിവാഹ ബന്ധം വേര്‍പെടുത്തിയവര്‍, ഭര്‍ത്താവ് ഉപേക്ഷിച്ചവര്‍, ഭര്‍ത്താവിനെ കാണാതായവര്‍, പട്ടികവർഗത്തിലെ അവിവാഹിതരായ അമ്മമാര്‍, 30 കഴിഞ്ഞ അവിവാഹിതരായവര്‍, ശയ്യാവലംബരും നിത്യരോഗികളുമായ ഭര്‍ത്താവുള്ളവര്‍ എന്നീ വിഭാഗത്തില്‍പ്പെട്ട, കുടുംബ വാര്‍ഷിക വരുമാനം രണ്ടു ലക്ഷം രൂപ വരെയുള്ള 18-55 മധ്യേ പ്രായമുള്ള സ്ത്രീകള്‍ക്ക് സ്വയംതൊഴില്‍ ആരംഭിക്കാനായി 50,000 രൂപ പലിശ രഹിത വായ്പയും 25,000 രൂപ സബ്‌സിഡിയും. *കൈവല്യ സ്വയംതൊഴില്‍ പദ്ധതി: കുടുംബ വാര്‍ഷിക വരുമാനം രണ്ടു ലക്ഷം രൂപ വരെയുള്ള 21-55 പ്രായമുള്ള ഭിന്നശേഷിക്കാര്‍ക്ക് സ്വയം തൊഴില്‍ ആരംഭിക്കാനായി 50,000 രൂപ പലിശ രഹിത വായ്പയും 25,000 രൂപ സബ്‌സിഡിയും. എംപ്ലോയ്‌മെന്റ് എക്‌സ്‌ചേഞ്ചിലും www.employment.kerala.gov.in വെബ്‌സൈറ്റിലും അപേക്ഷ ഫോറം ലഭിക്കും. ഫോണ്‍: 0467 2209068, 04994 255582.