നിർദ്ദിഷ്ട ഷിമോഗ വിമാനത്താവള ടെർമിനലിന്റെ രൂപരേഖ
ബംഗളൂരു: ബി.ജെ.പിയുടെ തെരഞ്ഞെടുപ്പ് ചിഹ്നമായ താമരയുടെ ആകൃതിയില് ഷിമോഗ വിമാനത്താവളം നിര്മ്മിക്കുന്നതില് എതിര്പ്പുമായി കോണ്ഗ്രസ്. ഷിമോഗയില് നിര്മ്മാണം പുരോഗമിക്കുന്ന വിമാനത്താവളത്തിന്റെ ടെർമിനൽ താമരയുടെ ആകൃതിയിലാണ് രൂപകൽപന ചെയ്തിരിക്കുന്നത്. ഈ ഡിസൈൻ മാറ്റണമെന്ന് ആവശ്യപ്പെട്ടാണ് കോൺഗ്രസ് രംഗത്തെത്തിയത്.
'വിമാനത്താവളത്തിന്റെ ടെര്മിനല് താമരയുടെ രൂപത്തിലാണ് നിര്മ്മിക്കുന്നത്. ഇത് ബി.ജെ.പിയുടെ പാര്ട്ടി ചിഹ്നമാണ്. പൊതുജനങ്ങളുടെ പണം ഉപയോഗിച്ച് പാര്ട്ടി ചിഹ്നങ്ങളുടെ ആകൃതിയില് നിര്മ്മാണങ്ങള് നടത്തരുതെന്ന് ഡല്ഹി ഹൈകോടതി 2016ല് പറഞ്ഞിട്ടുണ്ട്'- കോണ്ഗ്രസ് വക്താവ് ബ്രിജേഷ് കളപ്പ ചൂണ്ടിക്കാട്ടി.
അതേസമയം, താമര ദേശീയ പുഷ്പമാണെന്നും അതിനാല് ഇക്കാര്യത്തില് രാഷ്ട്രീയം കലർത്തരുതെന്നുമാണ് ബി.ജെ.പി വാദിക്കുന്നത്. 2022ഓടെ ഷിമോഗ വിമാനത്താവളത്തിന്റെ നിര്മ്മാണം പൂര്ത്തിയാക്കുമെന്നാണ് ഷിമോഗ ജില്ലയിൽ നിന്നുള്ള കർണാടക മുഖ്യമന്ത്രി ബി.എസ്. യദിയൂരപ്പ ഫെബ്രുവരിയിൽ പ്രഖ്യാപിച്ചത്. 384 കോടി രൂപ ചെലവില് നിര്മ്മിക്കുന്ന വിമാനത്താവളത്തിന്റെ 1.8 കിലോമീറ്റര് റണ്വേയുടെ നിര്മ്മാണം അടുത്തിടെ പൂര്ത്തിയായിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.