ബംഗളൂരു: കർണാടകയിലെ ഐ.എ.എസ് ഉദ്യോഗസ്ഥനായ ഗ്യാനേന്ദ്ര കുമാർ ഗാംഗ്വാറിനെ കാണാനില്ലെന്ന് ഔദ്യോഗിക വൃത്തങ്ങൾ. കഴിഞ്ഞ രണ്ട് ദിവസമായി ഫോണിൽ ലഭ്യമാകുന്നില്ലെന്നാണ് വിവരം. സംഭവത്തിൽ ഇതുവരെ കുടുംബം പരാതി നൽകിയിട്ടില്ലെങ്കിലും തിരോധാനത്തെക്കുറിച്ചുള്ള വിവരം സർക്കാറിന് ലഭിച്ചിട്ടുണ്ടെന്ന് സംസ്ഥാന ആഭ്യന്തര മന്ത്രി പ്രിയങ്ക് ഖാർഗെ പറഞ്ഞു. ഗാംഗ്വാറിനെ അവസാനമായി കെംപെഗൗഡ അന്താരാഷ്ട്ര വിമാനത്താവളത്തിലാണ് കണ്ടെത്തിയതെന്നും വിഷയം വിശദമായി പരിശോധിച്ചുവരികയാണെന്നും ഖാർഗെ വ്യക്തമാക്കി.
2016 ബാച്ച് ഐ.എ.എസ് ഉദ്യോഗസ്ഥനായ ഗാംഗ്വാർ നിലവിൽ വ്യവസായ വാണിജ്യ വകുപ്പിൽ എം.എസ്.എം.ഇ ഡയറക്ടറായി സേവനമനുഷ്ഠിക്കുകയാണ്. നേരത്തെ കർണാടക പബ്ലിക് സർവീസ് കമ്മീഷനിൽ (കെ.പി.എസ്.സി) പരീക്ഷാ കൺട്രോളറായി സേവനമനുഷ്ഠിച്ചിരുന്ന ഗാംഗ്വാറിനെ ഈ വർഷം മാർച്ചിൽ ആ സ്ഥാനത്ത് നിന്ന് മാറ്റിയിരുന്നു.
നിയമന പരീക്ഷകളിലെ അഴിമതി ആരോപണങ്ങളും കർണാടക പബ്ലിക് സർവീസ് കമ്മീഷനെക്കുറിച്ചുള്ള (കെ.പി.എസ്.സി) അന്വേഷണങ്ങളും വലിയ ചർച്ചയായിരിക്കുന്നതിനിടയിലാണ് പുതിയ സംഭവവികാസങ്ങൾ ഉണ്ടായിരിക്കുന്നത്. കമ്മീഷനിലെ സേവനകാലത്തെ സംഭവവികാസങ്ങളുമായി ഗ്യാനേന്ദ്ര കുമാർ ഗാംഗ്വാറിന്റെ തിരോധാനത്തിന് ബന്ധമുണ്ടോ എന്ന് സംശയമുയരുന്നുണ്ട്.
ഇതിനിടെ, കെ.പി.എസ്.സി ചെയർമാൻ ശിവശങ്കരപ്പ സാഹുകറിനെ സസ്പെൻഡ് ചെയ്യാനും അന്വേഷണം ആരംഭിക്കാനും ഗവർണറോട് ശുപാർശ ചെയ്യാൻ കർണാടക മന്ത്രിസഭ തീരുമാനിച്ചതായി ആഭ്യന്തര മന്ത്രി പ്രിയങ്ക് ഖാർഗെ പറഞ്ഞു. വ്യാജ വരുമാന സർട്ടിഫിക്കറ്റിന്റെ അടിസ്ഥാനത്തിൽ മകൾക്ക് സർക്കാർ ജോലി ലഭിച്ചതടക്കം നിരവധി അഴിമതി ആരോപണങ്ങൾ സാഹുകർ നേരിടുന്നുണ്ട്.
പ്രധാന വിവരങ്ങൾ മറച്ചുവെച്ചു, മോശം പെരുമാറ്റം എന്നീ കാരണങ്ങൾ ചൂണ്ടിക്കാട്ടി ജൂലൈ 13ന് ഗവർണർ സാഹുകറിനെ സസ്പെൻഡ് ചെയ്തിരുന്നു. എന്നാൽ മന്ത്രിസഭയുടെ ഉപദേശം തേടാതെയാണ് ഉത്തരവിട്ടതെന്ന ഹൈക്കോടതി നിരീക്ഷണത്തെത്തുടർന്ന് ഓഗസ്റ്റ് 18ന് തിരികെ ജോലിയിൽ പ്രവേശിപ്പിച്ചു. സാഹുകറിനെ സസ്പെൻഡ് ചെയ്യണമെന്ന മുൻ തീരുമാനവുമായി മുന്നോട്ട് പോകാനും അന്വേഷണം നടത്താനും മന്ത്രിസഭ വീണ്ടും ഗവർണർക്ക് നിർദേശം നൽകിയിട്ടുണ്ട്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.