യാസ്​ ചുഴലിക്കാറ്റ്​: ​പ്രധാനമന്ത്രിക്ക്​ മമത റിപ്പോർട്ട്​ നൽകി, അവലോകന യോഗത്തിൽ പ​ങ്കെടുത്തില്ല

കൊൽക്കത്ത: യാസ്​ ചുഴലിക്കാറ്റിന്‍റെ പശ്ചാത്തലത്തിൽ പ്രധാനമന്ത്രി നരേന്ദ്ര മോദി വിളിച്ചുചേർത്ത യോഗത്തിൽ പശ്ചിമ ബംഗാൾ മുഖ്യമന്ത്രി മമത ബാനർജി പ​ങ്കെടുത്തില്ല. അതേസമയം, നാശനഷ്​ടങ്ങളുടെ റിപ്പോർട്ട്​ അവർ പ്രധാനമന്ത്രിക്ക്​ സമർപ്പിക്കുകയും 15 മിനിറ്റ്​ കൂടിക്കാഴ്ച നടത്തുകയും ചെയ്​തു. ബംഗാളിലെ വെസ്റ്റ് മിഡ്‌നാപൂർ ജില്ലയിലെ കലൈകുന്ദ എയർ ബേസിൽ വെള്ളിയാഴ്ച ഉച്ചക്കുശേഷമായിരുന്നു കൂടിക്കാഴ്ച. ദുരിതാശ്വാസമായി 20,000 കോടി ആവശ്യ​പ്പെട്ടുള്ള റിപ്പോർട്ടാണ്​ അവർ മോദിക്ക്​ കൈമാറിയത്​.

പ്രധാനമന്ത്രി യോഗം വിളിച്ചെങ്കിലും മുഖമന്ത്രിയു​െട ഓഫിസിനെ അറിയിച്ചിരുന്നില്ലെന്ന്​ മമത പിന്നീട്​ പറഞ്ഞു. 'എനിക്ക്​ ദിഘയിൽ ഒരു യോഗത്തിൽ പ​ങ്കെടുക്കേണ്ടതുണ്ട്​. അതിനാൽ, കലൈകുന്ദയിൽ പോയി 20,000 കോടി രൂപ ആവശ്യപ്പെട്ടുള്ള റിപ്പോർട്ട് നൽകി. സംസ്​ഥാനത്തെ ഉദ്യോഗസ്​ഥർ ദിഘയിലെ യോഗത്തിൽ പ​ങ്കെടുക്കാനായി കാത്തിരിക്കുകയാണ്​. പ്രധാനമന്ത്രിയുടെ അനുമതി വാങ്ങി അവിടേക്ക്​​ പോവുകയായിരുന്നു' -മമത പറഞ്ഞു.

അതേസമയം, പ്രധാനമന്ത്രി പങ്കടുത്ത യോഗത്തിൽ ബംഗാൾ ഗവർണർ ജഗദീപ് ധൻഖർ, പ്രതിപക്ഷ നേതാവ് സുവേന്ദു അധികാരി എന്നിവർ സന്നിഹിതരായിരുന്നു. മമത ഭരണഘടനയെയും നിയമവാഴ്ചയെയും ലംഘിക്കുകയാണെന്ന്​ ഗവർണർ യോഗത്തിനുശേഷം കുറ്റപ്പെടുത്തി. മമതക്കായി ഗവർണർ 30 മിനിറ്റ്​ കാത്തുനിന്നതായും റിപ്പോർട്ടുണ്ട്​.

പശ്ചിമ ബംഗാളിലെ തെരഞ്ഞെടുപ്പിന്​ ശേഷം ആദ്യമായിട്ടാണ്​ മമത ബാനർജിയും മോദിയും കണ്ടുമുട്ടുന്നത്​. നേതാജി സുഭാഷ് ചന്ദ്രബോസിന്‍റെ 125ാം ജന്മവാർഷികത്തോടനുബന്ധിച്ച് കൊൽക്കത്തയിലെ വിക്ടോറിയ മെമ്മോറിയലിൽ ജനുവരി 23നാണ് അവർ അവസാനമായി മുഖാമുഖം കണ്ടത്. അന്ന് ബി.ജെ.പി പ്രവർത്തകരുടെ 'ജയ് ശ്രീ റാം' വിളികളെ തുടർന്ന്​ പ്രസംഗം തടസ്സപ്പെടുകയും അതിൽ പ്രകോപിതയായ മമത പരിപാടിയിൽനിന്ന്​ ഇറങ്ങിപ്പോവുകയും ചെയ്​തിരുന്നു.

ബംഗാളിൽ ഒരു കോടി ആളുകളെയാണ്​ 'യാസ്​' ചുഴലിക്കാറ്റ്​ ബാധിച്ചത്​. മൂന്നു ലക്ഷം വീടുകൾക്കെങ്കിലും കേടു പറ്റിയിട്ടുണ്ടെന്നും കൊടുങ്കാറ്റ്​ ഏറ്റവും അധികം ബാധിച്ച സംസ്​ഥാനമായി ബംഗാൾ മാറിയെന്നും മമത പറഞ്ഞിരുന്നു.