ഡല്‍ഹിയിൽ അഞ്ചുനില കെട്ടിടം തകർന്ന് അപകടം; മരണം മൂന്നായി, നാൽപതോളം പേര്‍ കുടുങ്ങിക്കിടക്കുന്നതായി റിപ്പോർട്ട്
ന്യൂഡൽഹി: സൗത്ത്-വെസ്റ്റ് ഡൽഹിയിലെ സത്യനികേതനിൽ ഡൽഹി സർവകലാശാല സൗത്ത് കാമ്പസിന് സമീപമുള്ള അഞ്ചുനില ബോയ്സ് പി.ജി (പേയിങ് ഗെസ്റ്റ്) ഹോസ്റ്റൽ കെട്ടിടം തകർന്നുവീണ് മൂന്നുപേർ മരിച്ചു. അവശിഷ്ടങ്ങൾക്കിടയിൽനിന്ന് 11 പേരെ രക്ഷപ്പെടുത്തി. മൂന്നുപേരുടെ നില ഗുരുതരമാണ്. കെട്ടിടത്തിനടിയിൽ നിരവധി വിദ്യാർഥികൾ കുടുങ്ങിക്കിടക്കുന്നതായി സംശയിക്കുന്നുണ്ട്. 30 മുതൽ 50 വരെ വിദ്യാർഥികൾ കെട്ടിടത്തിലുണ്ടായിരുന്നതായി നാട്ടുകാർ പറഞ്ഞു.
രാത്രി വൈകിയും തിരച്ചിൽ തുടരുകയാണ്. ഞായറാഴ്ച ഉച്ചക്ക് ഒന്നരയോടെയാണ് ബഹുനില കെട്ടിടം നിലംപൊത്തിയത്. അരമണിക്കൂറിനുള്ളിൽ രക്ഷാപ്രവർത്തകർ സ്ഥലത്തെത്തി തിരച്ചിൽ ആരംഭിച്ചു. ഇടുങ്ങിയ വഴികളായതിനാൽ അഗ്നിശമന സേനാ വാഹനങ്ങളും മണ്ണുമാന്തിയന്ത്രങ്ങളും ഇവിടേക്ക് എത്തിക്കുന്നതിന് തടസ്സങ്ങൾ നേരിട്ടത് രക്ഷാ പ്രവർത്തനം വൈകാനിടയാക്കി. അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവർക്ക് ശ്വാസമെടുക്കാൻ ഓക്സിജൻ സിലിണ്ടറുകൾ എത്തിച്ചുനൽകി.
ബേസ്മെന്റിൽ കഴിഞ്ഞ രണ്ടാഴ്ചയായി നടന്നുവന്ന നിർമാണപ്രവർത്തനങ്ങളാണ് ദുരന്തത്തിന് കാരണമായതെന്ന് പ്രദേശവാസികൾ പറയുന്നു. ബേസ്മെന്റിൽ വെള്ളം കെട്ടിനിന്നത് കെട്ടിടത്തിന്റെ അടിത്തറയിലെ തൂണുകൾക്ക് ബലക്ഷയം സംഭവിച്ചതാണ് തകർച്ചക്ക് വഴിവെച്ചത്. പഴക്കംചെന്ന കെട്ടിടത്തിൽ മതിയായ സൗകര്യങ്ങളോ സുരക്ഷയോ ഉണ്ടായിരുന്നില്ലെന്നും ചുമരുകളിൽ വിള്ളലുകൾ ഉണ്ടായിരുന്നുവെന്നും മുമ്പ് അവിടെ താമസിച്ചിരുന്ന വിദ്യാർഥി പറഞ്ഞു. അപകടത്തെ തുടർന്ന് കേന്ദ്ര ആഭ്യന്തരമന്ത്രി അമിത് ഷാ ഗോവയിലെ ബി.ജെ.പി ഓഫിസ് ഉദ്‍ഘാടനം റദ്ദാക്കി ഡൽഹിയിൽ തുടർന്നു. ഹോസ്റ്റലുകളുടെ അഭാവംമൂലം വിദ്യാർഥികൾ ദുരിതപൂർണമായ സാഹചര്യങ്ങളിൽ പി.ജി മുറികളിൽ കഴിയാൻ നിർബന്ധിതരാകുകയാണെന്ന് പ്രതിപക്ഷ നേതാവ് രാഹുൽ ഗാന്ധി കുറ്റപ്പെടുത്തി.
ഡൽഹി മുനിസിപ്പൽ കോർപറേഷന്റെ അഴിമതിയും അനധികൃത നിർമാണങ്ങളുമാണ് ഇടക്കിടെയുള്ള കെട്ടിട തകർച്ചകൾക്ക് കാരണമെന്ന് ആം ആദ്മി പാർട്ടി ആരോപിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.