ലോക്​ഡൗണിന്​ ശേഷം എന്താണ് പദ്ധതി?; കേന്ദ്രത്തോട്​ കോൺഗ്രസ്​

ന്യൂഡൽഹി: ലോക്ഡൗൺ മൂന്നാം ഘട്ടത്തിലേക്ക് നീട്ടിയ കേന്ദ്ര സർക്കാരിന്​ മെയ് 17ന് ശേഷം എന്ത് ചെയ്യണമെന്ന് സംബന്ധിച്ച് എന്തെങ്കിലും ധാരണയുണ്ടോ എന്ന്​ കോൺ​ഗ്രസ് നേതാക്കളായ സോണിയ​ ​ഗാന്ധിയും മൻമോഹൻ സിങും. കോൺ​ഗ്രസ് മുഖ്യമന്ത്രിമാരുടെ ഒാൺ​ലൈൻ യോഗത്തിലാണ്​ സോണിയയും മൻമോഹനും കേന്ദ്രത്തിനെതിരെ വിമർശനം ഉന്നയിച്ചത്. കോൺ​ഗ്രസ് നേതാക്കളായ രാഹുൽ ​ഗാന്ധി, പി ചിദംബരം തുടങ്ങിയവരും യോ​ഗത്തിൽ പങ്കെടുത്തിരുന്നു.

മെയ് 17ന് ശേഷം എന്ത് ചെയ്യണമെന്നത് സംബന്ധിച്ച് മോദി സർക്കാരിന് വ്യക്തതയില്ലെന്നും സർക്കാരി​​െൻറ മുന്നിൽ യാതൊരു പദ്ധതികളുമില്ലെന്നും സോണിയ ഗാന്ധി പറഞ്ഞു. മുഖ്യമന്ത്രിമാർക്ക് അടുത്ത ഘട്ടത്തിൽ എന്ത് ചെയ്യണമെന്നത് സംബന്ധിച്ച് കൃത്യമായ ധാരണയുണ്ടാകണമെന്ന നിർദേശമാണ് മൻമോഹൻ സിങ് മുന്നോട്ട് വെച്ചത്. സാമ്പത്തികാശ്വാസ പാക്കേജുകൾ മുന്നോട്ട് വെക്കേണ്ടത് അനിവാര്യമാണെന്ന് യോ​ഗത്തിൽ പി. ചിദംബരവും രാഹുൽ ​ഗാന്ധിയും അഭിപ്രായപ്പെട്ടു.

ചെറുകിട വ്യവസായ സംരംഭങ്ങൾ നേരിടുന്ന പ്രതിസന്ധി മറികടക്കാനുള്ള മാർ​ഗം ആലോചിക്കണമെന്നാണ് ചത്തിസ്​ഗഡ് മുഖ്യമന്ത്രി മുന്നോട്ട് വച്ച ആവശ്യം. പഞ്ചാബ് മുഖ്യമന്ത്രി അമരീന്ദർ സിങും രാജസ്ഥാൻ മുഖ്യമന്ത്രി അശോക് ​ഗെഹ്​ലോട്ടും സംസ്ഥാനങ്ങൾക്ക് കേന്ദ്രത്തിൽ നിന്നും ആശ്വാസ പാക്കേജുകൾ ലഭിക്കാത്തത് വലിയ സാമ്പത്തിക പ്രതിസന്ധിയാണ് ഉണ്ടാക്കുന്നതെന്ന് പറഞ്ഞു.