രോഗലക്ഷണങ്ങളില്ല; ഏഴുതവണയും കോവിഡ്​ പോസിറ്റീവ്​

വഡോദര: വഡോദരയിലെ ജയ്​ പട്​നി എന്ന 19കാരൻ ഒരുമാസത്തിലേറെയായി ഐസൊലേഷനിലാണ്​.  ഏഴുതവണയാണ്​ കോവിഡ്​ പരിശോധനക്ക്​ വിധേനയായത്​. ഏഴു തവണയും പോസിറ്റീവ്​ തന്നെ. എന്നാൽ രോഗലക്ഷണങ്ങൾ ഒന്നും പ്രകടമല്ല. 

വഡോദരയിലെ ഹൈ സ്​പീഡ്​ റെയിൽവെ ട്രെയിനിങ്​ ഇൻസ്​റ്റിറ്റ്യൂട്ടിൽ സജ്ജമാക്കിയ ഐസെ​ാലേഷൻ വാർഡിലാണ്​ പട്​നി. പട്​നിയെ കൂടാതെ നിരവധി കോവിഡ്​ രോഗികളുണ്ട്​ ഇവിടെ. ഇവരിൽ പലരും രോഗലക്ഷണങ്ങൾ പ്രകടമാകാത്തവരോ, ചെറിയ ലക്ഷണങ്ങൾ മാത്രമോ ഉള്ളവരാണ്​. 

‘‘ചുമയില്ല, ക്ഷീണമില്ല, തലവേദനപോലുമില്ല. ഓരോ ദിവസം കഴിയും തോറും ആരോഗ്യം കൂടുതൽ മെച്ചപ്പെട്ടതു പോലെയാണ്​ തോന്നുന്നത്​. ഈ വാർഡിൽ ഒന്നും ചെയ്യാനില്ലാത്തതുകൊണ്ട്​ വെറുതെ ഇടനാഴികളിലൂടെ നടക്കുന്നു. സിനിമ കണ്ടും ഫോണിൽ സംസാരിച്ചും ഗെയിംകളിച്ചും സമയം തള്ളിനീക്കുകയാണ്’’​-പട്​നി പറയുന്നു. മേയ്​ 12 ആയാൽ പട്​നി നിരീക്ഷണത്തിലായിട്ട്​ ഒരുമാസം കഴിയും. 

ഏപ്രിൽ 12നാണ്​ പട്​നിക്കും മാതാപിതാക്കൾക്കും കോവിഡ്​ സ്​ഥിരീകരിച്ചത്​. അയൽപക്കത്തെ കുട്ടി രോഗബാധിതനായി മരിച്ചതിനെ തുടർന്നാണ്​ അവർ കോവിഡ്​ പരിശോധനക്കെത്തിയത്. കുട്ടിയുടെ മരണകാരണം കോവിഡാണെന്നാണ്​ അവർ വിശ്വസിച്ചത്​. എന്നാൽ പരിശോധിച്ചപ്പോൾ ഡെങ്കിപ്പനി ആണെന്ന്​ കണ്ടെത്തുകയായിരുന്നു. 

വഡോദരയിലെ എം.എസ്​ കോളജിലെ ഒന്നാംവർഷ ബിരുദ വിദ്യാർഥിയാണ്​ പട്​നി. വഡോദരയിലെ കോവിഡ്​ വ്യാപനകേന്ദ്രമായ നഗർവാഡയിലാണ്​ കുടുംബം കഴിയുന്നത്​. 
പരിശോധനക്കു ശേഷം മൂവരെയും ഗോത്രി മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു.  20 ദിവസം പട്​നി അവിടെ കഴിഞ്ഞു. 13 ദിവസത്തിനു ശേഷം മാതാപിതാക്കൾക്ക്​ വീണ്ടും കോവിഡ്​ പരിശോധന നടത്തി. ഫലം നെഗറ്റിവായതിനാൽ അവരെ വീട്ടിലേക്ക്​ വിട്ടു. ഒരാഴ്​ച മുമ്പ്​ പട്​നിയെ നിരീക്ഷണ കേന്ദ്രത്തിലേക്ക്​ മാറ്റി. 

‘‘എ​െൻറ കോവിഡ്​ പരിശോധന ഫലം കണ്ട്​ അമ്മ ഒരുപാട്​ ഭയപ്പെട്ടു. എന്നാൽ എനിക്ക്​ വലിയ ആകുലതയൊന്നുമില്ല. ഇതിനുമാത്രം പേടിക്കാനെന്തിരിക്കുന്നു’’ -പട്​നി ചോദിക്കുന്നു. കോവിഡ്​ പോസിറ്റീവായിട്ടും എന്തുകൊണ്ട്​ പട്​നി ലക്ഷണങ്ങൾ കാണിക്കുന്നി​ല്ല എന്നതിന്​ ഡോക്​ടർമാർ ഉത്തരംനൽകിയിട്ടില്ല. ചെറിയ ലക്ഷണങ്ങൾ മാത്രം ഉള്ള രോഗികൾക്ക്​ വീടുകളിൽ തന്നെ നിരീക്ഷണത്തിൽ കഴിയാൻ അനുമതിയുണ്ട്​. എന്നാൽ ഫലം നെഗറ്റിവാകുന്നതു വരെ വീട്ടിലേക്ക്​ മടങ്ങാൻ പട്​നി തയാറല്ല. താൻ മൂലം മാതാപിതാക്കൾക്കും മറ്റുള്ളവർക്കും രോഗം വരരുതെന്ന നിഷ്​കർഷയാണ്​ അതിനു പി​ന്നിൽ.