കാണാം; ഒഴുകുന്ന പൊലീസ്​ സ്​റ്റേഷൻ

യു.എ.ഇ: ഒഴുകി നടക്കുന്ന സ്മാർട്ട്​ പൊലീസ്​ സ്​റ്റേഷനെ കുറിച്ച്​ അറിയണമെങ്കിൽ എക്സ്​പോയിൽ എത്തിയാൽ മതി. യു.എ.ഇ ഇന്നൊവേഷൻ മാസാചരണത്തിന്‍റെ ഭാഗമായി ദുബൈ ​പൊലീസാണ്​ ഫസ പവലിയനിൽ ഒഴുകുന്ന പൊലീസ്​ സ്​റ്റേഷന്‍റെ മാതൃക അവതരിപ്പിച്ചത്​. ഇതുൾപെടെ നിരവധി നൂതന ആശയങ്ങളുമായാണ്​ ദുബൈ പൊലീസ്​ ഇന്നൊവേഷൻ മാസത്തിന്‍റെ ഭാഗമാകുന്നത്​.

വേൾഡ്​ ഐലൻഡ്​ പോലുള്ള ദ്വീപുകളിൽ താമസിക്കുന്നവർക്കായാണ്​ ​​​േഫ്ലാട്ടിങ്​ പൊലീസ്​ സ്​റ്റേഷൻ തയാറാക്കിയിരിക്കുന്നത്​. മൂന്ന്​ നിലകളാണ്​ ഈ സ്​റ്റേഷനുള്ളത്​. വെള്ളത്തിനടിയിലായിരിക്കും ഒരു നില.

ഇവിടെ പൊലീസുകാരോ സഹായികളോ ഉണ്ടാകില്ല. പകരം സ്വയം പരാതികൾ നൽകാൻ സൗകര്യമുള്ള ഇ-പൊലീസ്​ സേവനമാണ്​ ഇവിടെ ലഭിക്കുക. വാട്ടർ സ്​പോർട്​സ്​ പ്രേമികൾ, ബോട്ട്​ യാത്രികർ തുടങ്ങിയവർക്കും ഉപകാരപ്പെടും. ഐലൻഡിൽ താമസിക്കുന്നവർക്ക്​ ബോട്ടുകളിൽ ഈ സ്​റ്റേഷനിൽ എത്തി പരാത സമർപ്പിക്കാം. ഫൈനുകൾ അടക്കാനും കുറ്റകൃത്യങ്ങൾ റിപ്പോർട്ട്​ ചെയ്യാനും സൗകര്യമുണ്ട്​. 27 സേവനങ്ങളാണ്​ നൽകുന്നത്​. 24 മണിക്കൂറും പ്രവർത്തിക്കുന്ന പൊലീസ്​ ഹെഡ്​ക്വാർട്ടേഴ്​സുമായി ബന്ധിപ്പിച്ചിരിക്കുകയാണ്​ സ്മാർട്ട്​ സ്​റ്റേഷൻ.

വെള്ളത്തിനടിയിലുള്ള ഭാഗത്താണ്​ ഇതിന്‍റെ സാ​ങ്കേതിക പ്രവർത്തനം. വെള്ളത്തിന്​ മുകളിലുള്ള ആദ്യ നിലയിലാണ്​ പരാതി സമർപ്പിക്കാനുള്ള സൗകര്യം. മുകളിലെ നിലയിൽ ചുറ്റും നിരീക്ഷിക്കനുള്ള സംവിധാനമാണ്​ ഒരുക്കിയിരിക്കുന്നത്​.

ദുബൈ പൊലീസിന്​ നഗരത്തിൽ 15 സെൽഫ്​ സർവീസ്​ സ്​റ്റേഷനുകളുണ്ട്​. ഇതിൽ നാലെണ്ണം എക്​പോയിലാണ്​. 24 മണിക്കൂറും പ്രവർത്തിക്കുന്ന ഈ സ്​റ്റേഷനുകളിൽ 45 സ്മാർട്ട്​ സർവീസുകൾ ലഭിക്കും. അറബി, ഇംഗ്ലീഷ്​, സ്പാനിഷ്​, ഫ്രഞ്ച്​, ജർമൻ, റഷ്യൻ, ചൈനീസ്​ എന്നീ ഭാഷകളിലാണ്​ സേവനം.

പൊതുജനങ്ങൾക്ക്​ പൊലീസുമായി ബന്ധപ്പെട്ട നൂതന ആശയങ്ങൾ പങ്കുവെക്കാൻ ഇവിടെ അവസരമുണ്ട്​. മികച്ച ആശയങ്ങൾ തെരഞ്ഞെടുത്ത്​ സമ്മാനം നൽകും.

ട്രാഫിക്​ പിഴകൾ തവണകളായി അടക്കാനുള്ള സൗകര്യവും ദുബൈ പൊലീസ്​ അവതരിപ്പിക്കുന്നു. 5000 ദിർഹമിന്​ മുകളിലുള്ള പിഴകൾ പലിശയില്ലാതെ തവണകളായി അടക്കാനുള്ള സൗകര്യം ലഭിക്കും.

3, 6, 9 മാസങ്ങളുടെ തവണകളായാണ്​ അടക്കാവുന്നത്​. വിവിധ കോളജുകളിലെയും യൂനിവേഴ്​സിറ്റികളിലെയും വിദ്യാർഥികൾ ഇവിടെ സന്ദർശനത്തിന്​ എത്തുന്നുണ്ട്​. ഈ മാസം 28 വരെ പ്രദർശനം തുടരും.