സിനിമയുടെ ലാഭനഷ്ട കണക്കുകൾ പുറത്തുവിടുന്നത്​ ശരിയല്ല -നിവിൻ പോളി

ദുബൈ: സിനിമയുടെ ലാഭനഷ്ട കണക്കുകൾ പുറത്തുവിടുന്ന രീതിയോട്​ യോജിപ്പില്ലെന്ന്​ നടൻ നിവിൻ പോളി. പുതിയ ചിത്രമായ സർവ്വംമായയുടെ റിലീസിനോടനുബന്ധിച്ച്​ ദുബൈയിൽ സംസാരിക്കുകയായിരുന്നു അദ്ദേഹം. എല്ലാ മേഖലകളിലും ലാഭവും നഷ്ടവുമുണ്ടാകും. അതൊന്നും പരസ്യമായി പുറത്തുവിട്ട്​ കാണാറില്ല. പക്ഷെ, മലയാള സിനിമ വ്യവസായ മേഖലയിൽ കണക്കുകൾ പുറത്തുവിടുന്നത്​ എന്തിനാണെന്ന്​ മനസിലായില്ല. അത്​ ഒഴിവാക്കണമെന്നാണ്​ വ്യക്​തിപരമായ അഭിപ്രായം. ഒരുമിച്ച്​ ഒരു കൂട്ടായ്മയെ മുന്നോട്ട്​ കൊണ്ടുപോകാൻ ശ്രമിക്കുമ്പോൾ ഇത്തരം രീതികൾ നിക്ഷേപകരെ ആകർഷിക്കുന്നത്​ തടയും. എല്ലാവരും ചേർന്ന്​ നല്ല സിനിമകൾ നിർമിക്കാൻ ശ്രമിക്കുന്നതാകും നല്ലതെന്നും നിവിൻ അഭിപ്രായപ്പെട്ടു.

കുടുംബത്തോടൊപ്പം ​ഇരുന്ന്​ കാണാൻ കഴിയുന്ന ഒരു ഫീൽഗുഡ്​ സിനിമക്കായി കാത്തിരിക്കുകയായിരുന്നു. സർവ്വം മായ പ്രേക്ഷകർ സ്വീകരിച്ചതിൽ സന്തോഷം. എല്ലാ അഭിനേതാക്കളുടെയും കരിയറിൽ ഉയർച്ച താഴ്ചകളുണ്ടാകും. തന്നെ സംബന്ധിച്ച്​ കരിയറിന്‍റെ തുടക്കത്തിൽ നല്ല വിജയങ്ങളുണ്ടായി. പിന്നീട്​ പരാജയങ്ങളും. വിമർശനങ്ങളെ മുഖവിലക്കെടുക്കും. ആക്ഷൻ ഹീറോ ബിജുവിന്‍റെ രണ്ടാം ഭാഗം ആലോചനയിലാണ്​. ചില ആശയക്കുഴപ്പങ്ങൾ നീങ്ങിയാൽ അത്​ യാഥാർഥ്യമാകുമെന്നും അദ്ദേഹം പറഞ്ഞു.

പൊളിറ്റിക്കൽ കറക്ടനസ്​ എന്നത്​ നല്ലകാര്യമാണെന്ന്​ സംവിധായകൻ അഖിൽ സത്യൻ പറഞ്ഞു. പക്ഷെ, അത്​ ഒരു എഴുത്തുകാരനെ സംബന്ധിച്ച്​ ചട്ടക്കൂടാണ്​. കഥാപാത്രങ്ങൾ മറ്റുള്ളവർക്ക്​ വേണ്ടി സംസാരിക്കുന്ന രീതിയിലേക്ക്​ അത്​ മാറും. അത്​ സിനിമയെ ബാധിക്കുമെന്ന്​ അഖിൽ പറഞ്ഞു. നടൻ റിയ ഷിബു, നിർമാതാക്കളിൽ ഒരാളായ രാജീവ്​, കണ്ണൻ രവി എന്നിവരും വാർത്ത സമ്മേളത്തിൽ പ​ങ്കെടുത്തു.