ഇന്ത്യൻ ഇസ്ലാഹി സെന്റർ ഭാരവാഹികൾ റിയാദിൽ വാർത്തസമ്മേളനത്തിൽ
റിയാദ്: ലേൺ ദ ഖുർആൻ ദേശീയ സംഗമം വെള്ളിയാഴ്ച റിയാദ് സുലൈയിലുള്ള താഖത് വ്യൂ ഓപൺ ഗ്രൗണ്ടിലും ഓഡിറ്റോറിയത്തിലുമായി നടക്കും. എം.എം. അക്ബർ, അൻസാർ നന്മണ്ട തുടങ്ങിയവർ പങ്കെടുക്കും. നാലു വേദികളിലായി നടക്കുന്ന സംഗമത്തിന്റെ ഉദ്ഘാടന സമ്മേളനം രാവിലെ 10ന് ആരംഭിക്കും.
വേദി രണ്ടിൽ നടക്കുന്ന ഉദ്ഘാടന സമ്മേളനം ഇന്ത്യൻ ഇസ്ലാഹി സെന്റർ സൗദി നാഷനൽ കമ്മിറ്റി പ്രസിഡന്റ് അബൂബക്കർ മേഴത്തുർ ഉദ്ഘാടനം ചെയ്യും. മൗലവി ഉസാമ മുഹമ്മദ് ഉദ്ബോധനം നൽകും. രാവിലെ നടക്കുന്ന രണ്ടാമത്തെ സെഷനിൽ സംഘടനാ മീറ്റ് വേദി രണ്ടിൽ നടക്കും. റിയാദ് ഇന്ത്യൻ ഇസ്ലാഹി സെന്റർ പ്രസിഡൻറ് അബ്ദുൽഖയ്യൂം ബുസ്താനി ഉദ്ഘാടനം ചെയ്യും. നാഷനൽ കമ്മിറ്റി ഓർഗനൈസിങ് സെക്രട്ടറി ഹബീബ് റഹ്മാൻ വിഷയം അവതരിപ്പിക്കും.
ഉച്ചക്ക് രണ്ടിന് ആരംഭിക്കുന്ന നവോത്ഥാന സെഷൻ വേദി രണ്ടിൽ നടക്കും. 'ഖുർആൻ പരിഭാഷ - ചരിത്രം, കാലാത്മകത, മുസ്ലിം നവോത്ഥാനം' എന്ന പ്രമേയത്തിൽ എം.എസ്.എമ്മിന്റെ നാഷനൽ കൺവീനർ ഫർഹാൻ കാരക്കുന്ന് വിഷയം അവതരിപ്പിക്കും. എം.എം. അക്ബർ ചോദ്യോത്തര സെഷന് നേതൃത്വം നൽകും. സൗദി അറേബ്യയിലെ ദഅ്വ സെന്ററുകളിലെ പ്രബോധകരുടെ മീറ്റ് വേദി മൂന്നിൽ ഉച്ചക്ക് ശേഷം രണ്ട് മുതൽ നടക്കും. അജ്മൽ മദനി, അബ്ദുസലാം ബുസ്താനി എന്നിവർ നേതൃത്വം നൽകും.
വൈകിട്ട് 4.30ന് എം.ജി.എം പ്രവർത്തകരുടെ നേതൃത്വത്തിൽ 'വനിതാവേദി' പരിപാടി പ്രത്യേകം തയാറാക്കിയ വേദി മൂന്നിൽ സംഘടിപ്പിക്കും. റിയാദ് ഇന്റർനാഷനൽ ഇന്ത്യൻ സ്കൂൾ പ്രിൻസിപ്പൽ മീരാ റഹ്മാൻ ഉദ്ഘാടനം ചെയ്യും. എം.ജി.എം തൃശ്ശൂർ ജില്ലാ പ്രസിഡന്റ് ഉമ്മുകുൽസൂം ടീച്ചർ മുഖ്യാതിഥിയാവും. 'സ്ത്രീ സ്വത്വം ഇസ്ലാമിൽ' എന്ന വിഷയത്തിൽ അൻസാർ നന്മണ്ട മുഖ്യ പ്രഭാഷണം നിർവഹിക്കും. 'ആത്മവിചാരണ' എന്ന വിഷയത്തിൽ റാഹില അൻവർ, 'അപരിചിതർക്ക് അനുമോദനം' എന്ന വിഷയത്തിൽ അമീന അനിവാരിയ്യ എന്നിവർ സംസാരിക്കും.
വേദി രണ്ടിൽ വൈകീട്ട് നാലിന് നടക്കുന്ന ദേശീയ സംഗമത്തിന്റെ ഭാഗമായുള്ള സാംസ്കാരിക സമ്മേളനം നടക്കും. ഇന്ത്യൻ ഇസ്ലാഹി സെന്റർ നാഷനൽ കമ്മിറ്റി ജനറൽ സെക്രട്ടറി അബ്ബാസ് ചെമ്പൻ ഉദ്ഘാടനം ചെയ്യും. 'മതേതരത്വ കേരളം - സാമൂഹിക സൗഹാർദം' എന്ന പ്രമേയത്തിൽ ശിഹാബ് സലഫി ജിദ്ദ വിഷയം അവതരിപ്പിക്കും. കുട്ടികൾക്ക് വേണ്ടി സംഘടിപ്പിക്കുന്ന പ്രത്യേക പരിപാടിയായ 'കളിത്തട്ട്' വേദി നാലിൽ നടക്കും.
സമാപന സമ്മേളനവും സമ്മാനവിതരണവും ഓപൺ ഗ്രൗണ്ടിൽ (വേദി ഒന്നി) വൈകീട്ട് ഏഴിന് ആരംഭിക്കും. 2021ലെ ലേൺ ദ ഖുർആൻ അന്താരാഷ്ട്ര ഓൺലൈൻ പരീക്ഷാവിജയികളെ ചടങ്ങിൽ ആദരിക്കും. ഒന്നാം സമ്മാനം നേടിയ വിജയിക്ക് ഒരു ലക്ഷം രൂപയുടെ ക്യാഷ് പ്രൈസ് നൽകും. സൗദി മാനവവിഭവ ശേഷി മന്ത്രാലയത്തിന് കീഴിലുള്ള ദഅ്വ ആൻഡ് അവയർനസ് സൊസൈറ്റിയുടെ ഡയറക്ടറും കിങ് സഊദ് യൂനിവേഴ്സിറ്റിയിലെ ഫിഖ്ഹ് വിഭാഗം മേധാവിയുമായ ഡോ. അലി ബിൻ നാസർ അൽശലആൻ ഉദ്ഘാടനം ചെയ്യും.
സമാപന സംഗമത്തിൽ എം.എം. അക്ബർ, അൻസാർ നന്മണ്ട എന്നിവർ മുഖ്യപ്രഭാഷണം നടത്തും. സംഗമത്തിനുള്ള എല്ലാ ഒരുക്കങ്ങളും പൂർത്തിയായതായും പരിപാടിയിൽ പങ്കെടുക്കുന്നവർക്ക് ഭക്ഷണമടക്കമുള്ള എല്ലാ സൗകര്യങ്ങളും ദേശീയസംഗമ വേദികളിൽ ഒരുക്കിയതായും സൗദിയിലെ എല്ലാ മലയാളികളെയും ദേശീയ സംഗമത്തിലേക്ക് സ്വാഗതം ചെയ്യുന്നതായും സംഘാടക സമിതി ചെയർമാൻ അബ്ദുൽഖയ്യും ബുസ്താനി, ജനറൽ കൺവീനർ മുഹമ്മദ് സുൽഫിക്കർ, റിയാദ് ഇന്ത്യൻ ഇസ്ലാഹി സെന്റർ ജനറൽ സെക്രട്ടറി അബ്ദുറസാഖ് സ്വലാഹി എന്നിവർ വാർത്താസമ്മേളനത്തിൽ അറിയിച്ചു. മുഹമ്മദ് കുട്ടി കടന്നമണ്ണ, അഡ്വ. അബ്ദുൽജലീൽ, നൗഷാദ് അലി, മുജീബ് അലി തൊടികപ്പുലം, ഫൈസൽ ബുഹാരി, അബ്ദുൽ വഹാബ് പാലത്തിങ്ങൽ എന്നിവരും വാർത്താസമ്മേളനത്തിൽ പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.