വിരലടയാളത്തിനു​ പകരം നേത്രപടലം; സൗദി എമിഗ്രേഷൻ മാറ്റത്തിനൊരുങ്ങുന്നു

റിയാദ്​: സൗദി വിമാനത്താവളങ്ങളിൽ എമിഗ്രേഷൻ നടപടികൾക്ക്​ യാത്രക്കാരുടെ വിരലടയാളത്തിനു പകരം അവരുടെ നേത്രപടലം ശേഖരിക്കാൻ പാസ്പോർട്ട് (ജവാസത്ത്​) വിഭാഗം ഒരുങ്ങുന്നതായി റിപ്പോർട്ട്​. ജൈവിക അടയാളങ്ങൾ ഉപയോഗിച്ച്​ യാത്രക്കാര​െൻറ വിവരങ്ങൾ രേഖപ്പെടുത്തുന്നതാണ്​ രീതി. ഇതിനായി യാത്രക്കാര​െൻറ വിരലടയാളമാണ് നിലവിൽ​ പതിപ്പിക്കുന്നത്​. എന്നാൽ, ഇതിനു​ പകരം നേത്രപടലം പരിശോധിക്കുകയും അത്​ അടയാളമായി സ്വീകരിക്കുകയും ചെയ്യുന്ന രീതിയിലേക്കു​ മാറാനുള്ള ഒരുക്കങ്ങളാണ്​ പൂർത്തിയാകുന്നതെന്ന്​ പ്രാദേശിക മാധ്യമങ്ങൾ റിപ്പോർട്ട്​ ചെയ്യുന്നു. വിരലടയാളത്തിനു​ പകരം നേത്രപടലങ്ങളുടെ ചിത്രം നാഷനൽ ഇൻഫർമേഷൻ സെൻറർ രേഖകളിൽ ഉൾപ്പെടുത്തും. ഇതിനായി ഏറ്റവും നൂതനമായ ഉപകരണങ്ങൾ ഉടനെത്തും.

വിരലടയാളത്തെക്കാൾ സുരക്ഷിതമാണ്​ നേത്രപടലം അടയാളമായി സ്വീകരിക്കുന്നതെന്നും ഇത്​ ആളെ തിരിച്ചറിയാൻ സഹായിക്കുന്ന ഏറ്റവും കുറ്റമറ്റ ജൈവിക അടയാളമാണെന്നുമാണ്​ തെളിയിക്കപ്പെട്ടിട്ടുള്ളത്​.

മനുഷ്യന്​ പ്രായമാകുന്നതിനനുസരിച്ച് വിരലടയാളത്തിൽ മാറ്റം സംഭവിക്കാം. അതുകൊണ്ട്​ ആളെ തിരിച്ചറിയുന്നതിൽ അപൂർവമായെങ്കിലും പിഴവ്​ സംഭവിക്കാനിടയുണ്ട്​.

യാത്രാവിലക്കുള്ളവർക്കുപോലും ഇത് മറികടന്ന് രാജ്യത്ത് പ്രവേശിക്കാൻ കഴിയും. ഇതിന്​ തടയിടാനും കൂടുതൽ സുരക്ഷ ഉറപ്പുവരുത്താനും നേത്രപടലം അടയാളമാവു​േമ്പാൾ സാധിക്കും. മരണം വരെ നേത്രപടലത്തിൽ മാറ്റമുണ്ടാകില്ലെന്നും ഓരോ വ്യക്തിയുടേതും വ്യത്യസ്തമായിരിക്കുമെന്നും ഈ രംഗത്തെ വിദഗ്​ധർ ചൂണ്ടിക്കാട്ടുന്നു. ഇടതു, വലതു കണ്ണുകളിലെ നേത്രപടലങ്ങൾപോലും വിഭിന്നമാണ്. ഇവ ശേഖരിച്ചുവെക്കുന്നത് സുരക്ഷിതത്വം വർധിപ്പിക്കുമെന്നാണ് നാഷനൽ ഇൻഫർമേഷൻ സെൻററി​െൻറ വിലയിരുത്തൽ. എന്നാൽ, എന്നു മുതലാണ്​ ഇത്​ നടപ്പാകുകയെന്ന​ വിവരങ്ങൾ പുറത്തുവന്നിട്ടില്ല.