സൗദിയിൽ സുഖം പ്രാപിച്ചവരുടെ എണ്ണം പതിനായിരം കടന്നു

റിയാദ്​: സൗദി അറേബ്യയിലെ കോവിഡ് പ്രതിരോധ പ്രവർത്തനങ്ങൾക്ക്​ ആശ്വാസം പകർന്ന്​ സുഖം ​​പ്രാപിക്കുന്നവരുടെ എണ്ണം പതിനായിരം കടന്നു.​ 1024 പേർ ശനിയാഴ്​ച  സുഖം പ്രാപിച്ചതോടെ ആകെ രോഗമുക്തരുടെ എണ്ണം 10144 ആയി ഉയർന്നു.​ എന്നാൽ മുൻ ദിവസങ്ങളിലേത്​ പോലെ ഇന്നും 10 പേർ മരിച്ചു. എല്ലാരും വിദേശികളാണ്.  മക്കയിലും ജിദ്ദയിലും നാല്​ പേർ വീതവും റിയാദ്​, ജുബൈൽ എന്നിവിടങ്ങളിൽ ഒാരോരുത്തരുമാണ്​ മരിച്ചത്​. മരിച്ചവർ 33നും 66നും ഇടയിൽ പ്രായമുള്ളവരാണ്​​.

ഇതോടെ  ആകെ മരണ സംഖ്യ 239 ആയി. 1704 പേർക്ക്​ പുതുതായി രോഗം സ്ഥിരീകരിച്ചു. ഇതോടെ​ രാജ്യത്ത്​ ഇതുവരെ റിപ്പോർട്ട്​ ചെയ്യ​പ്പെട്ട കോവിഡ്​ കേസുകളുടെ എണ്ണം 37136 ആയി. രാജ്യത്തെ വിവിധ ലാബുകളിലായി ഇതുവരെ 418,722  കോവിഡ്​ ടെസ്​റ്റുകൾ നടന്നു. പുതിയ രോഗികളിൽ 82 ശതമാനം പുരുഷന്മാരും 18 ശതമാനം സ്​ത്രീകളുമാണെന്ന്​ ആരോഗ്യമന്ത്രാലയ വക്താവ്​ ഡോ. മുഹമ്മദ്​ അബ്​ദു  അൽഅലി വാർത്താസമ്മേളനത്തിൽ പറഞ്ഞു. ഇതിൽ 30 ശതമാനം സൗദികളും 70 ശതമാനം വിദേശികളുമാണ്​.

ആറ്​​ ശതമാനം കുട്ടികളും നാല്​​​​​​​ ശതമാനം കൗമാരക്കാരും  90 ശതമാനം മുതിർന്നവരുമാണ്​. ചികിത്സയിൽ കഴിയുന്ന 26753 ആളുകളിൽ 140 പേർ ഗുരുതരാവസ്ഥയിൽ തീവ്രപരിചരണ വിഭാഗത്തിലാണ്​. രോഗികളെ കണ്ടെത്താൻ  ആരോഗ്യ വകുപ്പ്​ രാജ്യവ്യാപകമായി നടത്തുന്ന ഫീൽഡ്​ സർവേ 23ാം ദിവസത്തിലേക്ക്​ കടന്നു. വീടുകളിലും മറ്റ്​ താമസകേന്ദ്രങ്ങളിലും ചെന്നുള്ള മെഡിക്കൽ ടീമി​​​​െൻറ  പരിശോധനയ്​ക്ക്​ പുറമെ ആളുകളെ ഫോൺ ചെയ്​ത്​ വിളിച്ചു വരുത്തി പരിശോധന നടത്തുന്ന റാണ്ടം ടെസ്​റ്റിങ്ങും നടക്കുന്നു. 

പുതിയ രോഗികൾ:
മക്ക 417, റിയാദ്​ 316, ജിദ്ദ 265, മദീന 112, ദമ്മാം 111, ത്വാഇഫ്​ 107, ജുബൈൽ 67, ഖോബാർ 54, ജദീദ അറാർ 38, ഹദ്ദ 33, ഹുഫൂഫ്​ 23, അൽഖർജ്​ 23, ദറഇയ 20,  ബുറൈദ 18, ഖത്വീഫ്​ 15, തബൂക്ക്​ 12, സഫ്​വ 9, റാസതനൂറ 7, യാംബു 7, മഹായിൽ 6, ദഹ്​റാൻ 6, ബേയ്​ഷ്​ 5, നാരിയ 4, ഖുറയാത്​ 4, മുലൈജ 3, അൽമജാരിദ 2, ഖഫ്​ജി 2,  അബ്​ഖൈഖ്​ 2, ബീഷ 2, അൽജഫർ 1, അബ്​ഹ 1, സറാത്​ അബീദ 1, സൽവ 1, അൽബദാഇ 1, ഉനൈസ 1, മിദ്​നബ്​ 1, ഉഖ്​ലത്​ സുഖൈർ 1, മഹദ്​ അൽദഹബ്​ 1, അദം 1,  അൽബാഹ 1, സബ്​യ 1, ഹാഇൽ 1, വാദി ദവാസിർ 1

മരണസംഖ്യ:
മക്ക 103, ജിദ്ദ 65, മദീന 37, റിയാദ്​ 13, ഹുഫൂഫ്​ 4, ദമ്മാം 4, അൽഖോബാർ 3, ജുബൈൽ 3, ബുറൈദ 2, ജീസാൻ 1, ഖത്വീഫ് 1​, ഖമീസ്​ മുശൈത്ത് 1​,  അൽബദാഇ 1,  തബൂക്ക്​ 1.