ഖത്തർ ഉപരോധം ഉടൻ നീക്കണമെന്ന് യു.എൻ പ്രത്യേക റാപ്പോർട്ടർ

ദോഹ: ഖത്തറിനെതിരായ എല്ലാ നിയന്ത്രണങ്ങളും വിലക്കുകളും ഉടൻ നീക്കണമെന്നാവശ്യപ്പെട്ട് യു.എൻ മനുഷ്യാവകാശ പ്രത്യേക റാപ്പോർട്ടർ അലീന ദുഹാൻ. ഖത്തറിനെതിരായ ഉപരോധം ഏർപ്പെടുത്തിയതിലൂടെ ഉപരോധരാജ്യങ്ങൾ അന്താരാഷ്​ട്ര നിയമങ്ങൾ ലംഘിച്ചിരിക്കുകയാണെന്നും ദുഹാൻ ചൂണ്ടിക്കാട്ടി. നവംബർ ഒന്നു മുതൽ 12 വരെ നീണ്ടുനിന്ന ഖത്തർ സന്ദർശനത്തിെൻറ സമാപനത്തോടനുബന്ധിച്ച് മാധ്യമപ്രവർത്തകരുമായി സംസാരിക്കുകയായിരുന്നു അവർ. ഖത്തർ സന്ദർശനത്തിനിടെ മുതിർന്ന സർക്കാർ ഉദ്യോഗസ്​ഥർ, പാർലമെൻറ് അംഗങ്ങൾ, ജുഡീഷ്യറി അംഗങ്ങൾ, അന്താരാഷ്​ട്ര സംഘടന പ്രതിനിധികൾ, നയതന്ത്ര പ്രതിനിധികൾ, സിവിൽ സൊസൈറ്റി, ദേശീയ മനുഷ്യാവകാശ സമിതി പ്രതിനിധികൾ, നിയമവിദഗ്ധർ, ഗവേഷകർ, ആക്ടിവിസ്​റ്റുകൾ, ഇരകൾ, കുടുംബങ്ങൾ തുടങ്ങിയവരുമായി അവർ കൂടിക്കാഴ്ച നടത്തി. ഖത്തറിനെതിരെ ഉപരോധമേർപ്പെടുത്തിയിരിക്കുന്ന അയൽരാജ്യങ്ങളുൾപ്പെടെയുള്ള നാല് രാജ്യങ്ങളും എത്രയും വേഗത്തിൽ അത് പിൻവലിക്കണം. അഭിപ്രായസ്വാതന്ത്ര്യം, ഗതാഗതം, സ്വത്ത് കൈകാര്യം ചെയ്യുക, വാണിജ്യം എന്നീ മേഖലകളിലേർപ്പെടുത്തിയിരിക്കുന്ന നിയന്ത്രണങ്ങളും ഉടൻ നീക്കണമെന്നും അവർ ആവർത്തിച്ചു.

മരുന്നുകളുടെയും മറ്റ്​ മെഡിക്കൽ സാമഗ്രികളുടെയും ഭക്ഷ്യവസ്​തുക്കളുടെയും അവശ്യവസ്​തുക്കളുടെയും കൈമാറ്റത്തെ തടയുന്നതിലൂടെ അന്താരാഷ്​ട്ര നിയമങ്ങളുടെ പ്രത്യക്ഷമായ ലംഘനമാണ് നടത്തിയിരിക്കുന്നത്​. ഖത്തറിനെതിരായ നിയന്ത്രണങ്ങൾ നീക്കുന്നതിന് നാല് രാജ്യങ്ങളോടും താൻ ആവശ്യപ്പെടുകയാണെന്നും അവർ പറഞ്ഞു.സമാധാനപരമായും അക്രമരഹിതവുമായി നടത്തപ്പെടുന്ന പ്രവർത്തനങ്ങളെ ഞെരുക്കുന്നതിനായി ഭീകരവാദവിരുദ്ധ, ദേശീയ സുരക്ഷാ നിയമങ്ങൾ അടിച്ചേൽപ്പിക്കുന്നതിൽനിന്ന് ഉപരോധരാജ്യങ്ങൾ പിന്മാറണം.

2017ൽ ഖത്തറിനെതിരായ ഉപരോധം കാരണം ഖത്തരികളായ വിദ്യാർഥികളടക്കമുള്ള ആളുകൾ കടുത്ത വിവേചനത്തിനാണ് ഇരയാകുന്നത്​. ഇവർക്ക് വിവേചനരഹിതമായി മറ്റു രാജ്യങ്ങളിൽ നിയമപീഠത്തെ സമീപിക്കുന്നതിന് സൗകര്യം നൽകണമെന്നും അവർ വ്യക്തമാക്കി.